Yesu Aari Mutthu Oowiiwelela

Niireke munnoona okhweya omwiiwelela paapa anyu ni maama anyu okathi wotheene?— Okathi mukina khivanikhweya. Nyuwo mwaanisuwela wira Yesu aanimwiiwelela Yehova ni anamuyari awe?— Ntakiheryo nawe pooti wookhaliheryani owiiwelela anamuyari anyu hata okathi mukina vavilaka. Nrowe noone ntakiheryo na Yesu.

Ohinatthi orwa valaponi, owo aakhala wiirimu ni Tiithi awe, Yehova. Masi-tho, Yesu aahikhalana anamuyari valaponi. Masina aya yaari Yosefe ni Maria. Niireke munnisuwela moota awo yaakhanle aya anamuyari a Yesu?—

Yehova aahikuxa okumi wa Mwanawe ni aahihela mmirimani mwa Maria. Eyo yaahiiriha wira Yesu oyariwe valaponi. Owo waari mwiiriirya wala etthu yootikiniha! Yesu annuwale mmirimani mwa Maria ntoko anamwane akina sininnuwa aya mmirimani mwa aximama aya. Nuuvira myeeri 9, Yesu aahiyariwa. Ti maana aya Yosefe ni Maria yaari aya anamuyari a Yesu valaponi.

Okathi Yesu aarina awe iyaakha 12, owo aahipaka etthu yooniherya wira aanimphenta Paapawe, Yehova. Eyo yaakhumelenle vaavo owo ni emusi awe yeettale aya mukwaha muulupale erowaka oYerusalemu omulompa Yehova. Nto mphironi atthikelaka owaani, Yosefe ni Maria khiyaamoona Yesu. Nyuwo munnisuwela aaryaawe?—

Moohipisa Yosefe ni Maria yaahitthikela oYerusalemu, ni yaahimwaavya mapuro otheene. Awo yaahixanka vanceene okhala wira khiyaasuwela aaryaawe. Masi nuuvira mahiku mararu, yaahimphwanya oryeene mpaani mwa Muluku! Niireke munnisuwela ele Yesu aapaka awe mpaani mwa Muluku?— Mwaha woowi owo aaphavela wiixutta masu a Paapawe, Yehova. Owo aanimphenta Yehova ni aaniphavela omuhakalaliha. Hata vaavo annuwale awe ni khukhala mutthu muulupale, okathi wotheene Yesu aanimwiiwelela Yehova. Yesu aanipaka eyo hata okathi oona awe oovila, ni osuwelaka wira aarowa ohaawa. Nto niireke Yesu aanimwiiwelela Yosefe ni Maria?— Aayo, Biibiliya onihimya wira Yesu aanipaka eyo.

Muniixutta exeeni sa ntakiheryo na Yesu?— Nyuwo muhaana omwiiwelelaka paapa anyu ni maama anyu, hata okathi mukina vavilaka. Nyuwo munoopaka eyo?—