Omwene Onirowa Olamulela Elapo Yotheene

Kiniphavela oweha mwaasuwelaka: Omwene xeeni ninlavula ahu va?— Aayo, ninlavula sa Omwene wa Muluku, yoowo onrowa olokiherya elapo wira ekhale eparayiisu. Nyuwo munniphavela wiixutta voohimya sa Omwene owo?—

Khuta omwene, wookhalana mwene aya. Nto mwene ti yoole onaalamulela atthu a elapo awe. Nyuwo munnimusuwela Mwene a Omwene wa Muluku?— Aayo, Yesu Kristu. Owo onikhala wiirimu. Nto owo onirowa waalamulelaka atthu otheene a valaponi! Niireke nnoohakalala vaavo Yesu onrowa awe olamulelaka elapo yotheene?—

Aayo, nnoohakalala vanceene! Oparayiisu atthu khanrowa owanaka ekhotto. Otheene anrowa ophentanaka. Khuuvo onrowa owereiwaka wala okhwa. Atthu ahinoona anrowa woonaka; ale ahiniiwa anrowa wiiwaka; ale ahineetta anrowa otthimakaka ni otupha. Atthu otheene anookhalana yoolya. Onookhala murettele eriyari ya apinaatamu ni inama. Atthu akhwiiye anoohihimuwa. Alopwana ni athiyana anceene yaale mwaasuwenle anyu mbroxurani-mu ntoko: Rebeka, Rahabi, Davidi ni Eliya, anoohihimuxiwa wira ephwanye ekumi! Nyuwo munniphavela waaweha vaavo anirowa aya ohihimuxiwa?—

Yehova onnoophentani ni oniphavela wira nyuwo muhakalaleke. Akhala wira munoovikaniha wiixutta voohimya sa Yehova ni omwiiwelela, munoowerya okhala oparayiisu mahiku otheene! Nyuwo munniphavela okhala oparayiisu?—