Moota Wowiiwanana ni Amusi Anyu

Ekasamento ennipaka emusi esya. Ekeekhai wira muhaana ovikaniha waaphen-ta ni waattittimiha amusi anyu. Masi, ole othelanne anyu, ti mutthu ootepa otthuneya mookumini mwanyu valaponi. Eyo pooti waaxankiha amusi anyu akina. Masi Biibiliya onoowerya wookhaliheryani okhalana moonelo wooloka, wira mwiiwananeke ni amusi anyu vaavo muniphavela anyu olipiha ekasamento anyu.

1 MOONELO WOOLOKA VOOHIMYA SA AMUSI ANYU

ELE BIIBILIYA ONIHIMYA AWE: “Mwattittimihe atith’inyu n’ame anyu”. (aÉfeso 6:2) Voohicikha etthu sa iyaakha murina anyu, muhaana waattittimihaka anamuyari anyu. Nave, musuweleke wira ole othelanne anyu, onnitthuneya waathokorerya anamuyari awe. Biibiliya oni: ‘Ole òphenta khonikhalana nrima’. (1 aKorinto 13:4) Nto muhixankeke vaavo ole othelanne anyu onaathokorerya awe anamuyari awe.​—aGalasia 5:26.

ELE EKHANLE ANYU OOPAKA:

• Musyakeke olavula masu ntoko ala: “Amusi anyu okathi wotheene khanikoonela vatthu”, wala “Khiivo etthu enivara aka enaasivela amaminyu”.

• Mmananiheke oweha itthu mmoonelo wa ole othelanne anyu

2 MULAVULEKE ELE ENOOXANKIHANI VAATTHUNEYAKA

ELE BIIBILIYA ONIHIMYA AWE: ‘Mulopwana onimwaahiya atithi awe n’ame awe, wira okhaleke vamosa ni amwar’awe: òwanli aya anookhala ntoko mutthu mmosaru pahi’. (Maphattuwelo 2:24) Okathi onithela anyu wala otheliwa, amusi anyu pooti wuupuwelaka wira nlelo ahaana wooleelakani moota woovara khula etthu. Nto awo pooti ophavela wiirela mpantta mootepana myaha sa ekasamento.

Nyuwo ni ole othelanne anyu muhaana wiiwanana voohimya sa mikano munrowa anyu opaka. Nto mwa niphento mwaasuwelihe anamuyari anyu. Nyuwo munoowerya olavula moonelo anyu moohiveeha. (Miruku 15:1) Wiiyeviha, omaala, opixa murima, ni ‘ovilelana mukina ni mukhw’awe, n’uphenta’, onoowiirihani wiiwanana ni amusi anyu.​—aÉfeso 4:2.

ELE EKHANLE ANYU OOPAKA:

• Akhala wira munuupuwela wira amusi anyu annipaka itthu sinixankiha ekasamento anyu, nvaanele mwaha owo nuule othelanne anyu

• Mwiiwananeke moota mukhanle anyu oothokorerya myaha iyo