Yesu Aahittottopeliwa Ohinatthi Oyariwa

Nlaikha Gabriyeli naahimuleela Maria wira aarowa omuyara mwaana. Naahimuleela-tho wira, aarowa onvaha nsina na Yesu, yoowo aarowa okhala Mwene mahiku otheene. Nto Maria aahimukoha wira: “Vanrowa wiraneya sai sihimyalyanyu, miyo kihimusuwelaka mulopwana?”​—Luka 1:34.

Nlaikha Gabriyeli naahimwaakhula wira: Munepa wootteela ni “owerya wa Muluku wulupalexa onimokhuruwelani n’iruku aya. Tivó mwana onrowanyu omuyara onokhala òwarya, onimwihaniwa Mwana a Muluku”.​—Luka 1:35.

Woonasa wene, wira omukhaliherye Maria weemererya muhupi ole, Gabriyeli aahihimya wira: “Nave-tho mmusi anyu Elizabeti, orimùluvalaru, òrupala: ola mweri wanethanu na mosa varupanlyawe, yowo ìreliwa khaniyara. Vekekhai, khivo etthu Muluku enojelawe”.​—Luka 1:36, 37.

Waakhula wa Maria waanooniherya wira aaheemererya ele Gabriyeli aahimya awe. Maria aakhunle so: “Miyo ki murumeyi a Muluku: yireyeke mwa miyo ntoko sihimmyanyu”.​—Luka 1:38.

Nuumala nlaikha Gabriyeli orowa, Maria aahilokiherya wira amuxukurye Elizabeti ni Zakariya, yaawo yaakhala waattamela oYerusalemu muttetthe wowaatta myaako, oYudeya. Okhuma owannyawe Maria mpakha oNazarethi, mutthu aaneetta mahiku mararu aahiiso maxexe.

Vano, Maria aahiphiya etthoko ya Zakariya. Nto vaavo aakela awe aahimukhomasa Elizabeti, mmusi awe. Vano, Elizabeti aahisareya munepa wootteela, khumuleela Maria wira: “Òttottopeliwa ti nyuwo mw’athiyana othene ni òttottopeliwa mwana a mmirimani mwanyu. Vano, kimphwanela sai ame aya Apwiya orwá wa miyo? Vekekhai, kirimwira kìwakaru nikhomaso nanyu, mwana orinaka mmirimani-mu òtannyeya n’utteliwa murima”.​—Luka 1:42-44.

Nuumala-vo, Maria aahaakhula oxukhurelaka vanceene, oriki: “Eroho aka eniwunnuwiha Apwiya: murim’aka onnitthapa n’usiveliwa mwaha wa Muluku, Mòpoli aka. Owo òkiweha miyo, murumeyi awe mwamukhani. Vekekhai, okhuma olelo vava, atthu a maloko othene anrowa okìhanaka òreriwa. Muluku òwerya sothene okìrele miyo itthu sulupale”. Nnaamwi Maria aavahiwe eparakha ele, owo anvuwiha Muluku paahi. Maria aahihimya wira: “Nsina nawe ti nowarya. Mahiku othene owo onnamorela ikharari ale animuttittimiha”.—Luka 1:46-50.

Maria aahivikaniha onvuwiha Muluku ni masu awe oowuupuxeriwa ani: “Ohamwarexa atthu òwìsona òwakha omwene atthu òwerya, òwìnnuwiha ale yahòneliwa vatthu; ohasarihela sorera alipa-òvoliwa, vano athajiri òwòmola matatarú. Ohakhaliherya atthu a Isarayeli, arumeyi awe: khaliyanle wamorela ikharari. Ti siso sàhimenryawe axitith’ihu, amurerihaka Abrahamu n’an’awe wa mahiku othene”.​—Luka 1:51-55.

Maria aahiviriha myeeri miraru omukhaliheryaka Elizabeti. Nto saahala isumana vakhaani wira Elizabeti oyare. Vaari vooloka athiyana ale anli okhala vamosa okathi ole wira alipihaneke. Tthiri athiyana ale anli oororomeleya yaahikhaliheriwa ni Muluku wira ayare!

Muupuweleke wira Yesu aahittottopeliwa ohinatthi oyariwa. Elizabeti aahimuhimya Yesu okhala ‘Pwiya awe’, nave, mwaana aari mmirimani mwawe ‘àhitannyeya n’utteliwa murima’ vaavo Maria aphiyale awe. Eyo ennivirikana ni moota atthu akina yaamuthokorenrye aya Maria ni mwanawe, ntoko ninrowa ahu woona muhoolo.