Yesu Aahipaka Mwiiriirya Woopacerya

Vano yaahivira mahiku mararu nuumala Natanayeli okhala mwiixutti a Yesu. Nto Yesu vamosa ni awiixutti awe akina a niinaano, yaahirowa mpantta onikela epheyo ya edistritu ya oGalileya, elapo aya. Awo yaaronwe epooma ya oKanani elapo ya Natanayeli. Epooma ya oKanani, yaakhala omyaakoni wa mpantta onikela epheyo wa oNazarethi, opuro yoowo Yesu annunwa awe. Awo yaalattuliwe efesta ya ekasamento oKanani.

Nave maama awe Yesu, aahilattuliwa. Okhala wira amusi aya ale anithelana yaari apatthani a Maria, nto Maria aahivekeliwa okhaliherya waakhapelela aletto. Tivonto, Maria aahisuwela wira eviinyu yaahimala, nto aahirowa omuleela Yesu, wira: “Evinyu ehamalela!”​—Yohani 2:3.

Tthiri, Maria aahinvekela Yesu wira opake etthu maana eviinyu yaahimala. Orumeelaka moolumo anooniherya okhootta, Yesu aakhunle so: “Muthiyana, erivo yawihu exeni?” (Yohani 2:4) Okhala wira Yesu Mwene othanliwe ni Muluku, owo aahaana ovara miteko olakiheriwaka ni Tiithi awe a wiirimu, ohiya amusi aahiiso apatthani. Mwa miruku, Maria aahihiya mwaha ole mmatatani mwa mwanawe, masi aahaalakiherya arumeyi ale wira: “Mwire sothene sintthunawe wolèlani”.​—Yohani 2:5.

Saahikhala mino 6 sa maluku. Khula muno yaanikela maasi yaavikana iliituru 40. Yesu aahiwiirela arumeyi awo wira: “Musarihe màsi minó iye”. Nuumala-vo, Yesu aahihimya wira: “Murike, vano: mmuroihele mulupale a nìra nla”.​—Yohani 2:7, 8.

Nuumala olawiha, mukhulupale a efesta aahitikinihiwa ni eviinyu ele yaapakiwe mwa mwiiriirya. Olavulaka ni mutheli, mukhulupale ole aahimmye so: “Atthu othene annipajerya okawa evinyu yowawa. Numalá, alipa-òlattuliwa yawuryá sana, ekelelá wakuxa, t’onavahawe evinyu yohisiva sana. Masi nyuwo mwarosuka evinyu yowawa mpakha vano!”​—Yohani 2:10.

Ola waari mwiiriirya woopacerya Yesu aapanke awe. Vaavo awiixutti awe oopacerya yoonale aya, omwaamini waya waahilipa. Nuumala-vo, Yesu, amamawe ni annawe yaahirowa oKafarnawu, mpantta onikela epheyo wa Ephareya ya oGalileya.