Yesu Aahimmaaliha Munamukhaya Ophareya

Yesu khaareere okhulumuwa. Vahalaka wiila, Yesu aahaaleela awiixutti awe wira: “Nrowé nlapuwele okhopela”, mpantta wa oKafarnawu.—Marko 4:35.

Mpantta onikhuma nsuwa wa Ephareya ya oGalileya, waahikhala muttetthe wa oGerasa. Nave-tho muttetthe ola waanisuweliwa okhala oDekaapoli. Nnaamwi aYuda anceene yaakhala ipooma sa oDekaapoli, muttetthe ole waari opuro wahaareere soolema sa aGriki.

Okathi Yesu aarowa awe oKafarnawu, atthu anceene yaahisuwela. Maana saahikhala ikalawa sikina saalapunwe ephareya ele. (Marko 4:36) Masi mukwaha ole khahiyo waari woorakama. Ephareya ya oGalileya eri ntoko ntthiya nuulupale na maasi oohikhala maakha. Orakama waya ti wa ikiloomo 21, nto wunnuwa waya ti wa ikiloomo 12. Masi mapuro makina toowiixa.

Nnaamwi Yesu aari mutthu oomalela, owo aahikhulumuwa mwaha wa muteko woolaleerya ahaareere awe ovara. Nto nuumala ekalawa okhuma, Yesu aahimmaathi ottuli wa ekalawa onarupa.

Arummwa anceene yaanisuwela weettiha saana ekalawa, masi mukwaha ola khiwaarowa okhala wookhweya. Saahikhala myaako sinceene Ephareya ya oGalileya, nave ephareya ele ti yoomaaleleya. Ikwaha sikina, epheyo yooriirya enkhuma omwaako, yatakaahana ni maasi oohivihexa a ephareya ele, mowaakuveya yaahimukumiherya munamukhaya. Tthiri eyo ti etthu yaakhumelenle. Moohipisa mawimpi yaahipacerya omana ekalawa. Nto “màsi yanisareya mukalawani, awo khíyahala opweteya”. (Luka 8:23) Masi, nlelo Yesu iira orupaka!

Okhala wira yaahitoko owanana mawimpi maalupale, yaahirumeela sookumanana iyo wira awanane munamukhaya ole. Masi mukwaha ola khiyaawenrye. Aphavelaka woopowa, yaahinvenxa Yesu anahimya wira: “Pwiya, munòpole! Nihokhwa!” (Matheyo 8:25) Tthiri awiixutti ale yaanoova okhwa mmaasini mme!

Vaavo Yesu aavennya awe, aahaaleela awiixutti awe wira: “Munòvela-ni? Wamini wanyu ori vakhanene!” (Matheyo 8:26) Nuumala-vo, Yesu aahiruma epheyo ele ni ephareya wira: “Mmàle! Mwikhalele!” (Marko 4:39) Moohipisa epheyo yaahimaala ni ephareya yaahiikhalela. (Marko ni Luka yaahihimya etthu ele attittimiheryaka wira, wanipacerya Yesu aahimmaaliha mwa mwiiriirya munamukhaya, nave aahilavula waamini vakhaani wa awiixutti awe.)

Tthiri awiixutti ale yaahitikinihiwa vanceene! Awo yaahoona ephareya ele yahaareere munamukhaya yiikhalelaka. Nto yaahipacerya-tho woova. Awo yaahipacerya oleelana wira: “Mano, mutth’ula tani? Hatá epheyo n’iphareya ennimwiwelela!” Nto yaahiwerya olapuwa ephareya ele ni yaahoopowa. (Marko 4:41–5:1) Woonasa wene, ikalawa sikina saahiwerya otthikela muxerexere wa mpantta onikela nsuwa wa ephareya ele.

Tthiri ti voomaaliha osuwela wira Mwaana a Muluku ookhalana owerya wooxintta ihasara sa ephattu! Okathi Omwene awe onrowa aya olamulelaka elapo, atthu otheene anrowa okhalana murettele ni khasinrowa okhumelelaka ihasara sa ephattu!