Olaleerya oGalileya ni Owiixuttiha Arummwa

Yesu aahilaleerya mooluttuweliwa etthu yowiiraka iyaakha piili. Niireke aarowa ovukula muteko awe wira ophumurye? Nnaari, Yesu aahincererya muteko awe woolaleerya “mittetthe n’ilapo sothene [sa oGalileya], ixuttihaka mpani mwaya mothukumana, alaleyaka ehapari yorera y’Omwene wa Muluku, àvonihaka aretta othene a khula enamuna”. (Matheyo 9:35) Itthu oona awe saanimutumererya wuncererya muteko awe woolaleerya. Masi aarowa opaka sai eyo?

Eettaka mukwaha awe, Yesu aahiwoona atthu yaatthuneya olipihiwa ni wiixuttihiwa ekeekhai. Maana yaakhala ntoko ipwittipwitthi soonyanyaliwa ni soorimeela, sihikhalanne makampusi aya. Yesu aahiwoonela othunku, aaleela awiixutti awe wira: “Solya khirere mmatta: masi alipa-òhatta ari vakhani. Munvekeleke mwanene ematta, wira àrumihele anamuteko mmatta mwawe”.​—Matheyo 9:37, 38.

Yesu aahisuwela etthu yaarowa waakhaliherya. Owo aahiwiitthana arummwa awe 12, aakawa anli-anli, khukhala igrupu 6 wira yalaleeryeke. Nave aahaavaha malakiheryo ala: “Muhihapuwelé iphiro s’amalapo, nnákhala muhikelé mittetthe s’oSamariya. Masi mwaphavele atthu a Isarayeli, ari ntoko ipwittipwitthi sirimenle. Virani mwettaka, mulaleyaka wira: ‘Omwene wa wirimu ori vakhiviru!’”​—Matheyo 10:5-7.

Omwene yaarowa aya olaleyaka ti yoole Yesu aalavunle awe nivekelo na ntakiheryo. ‘Omwene wari vakhiviru’, maana ole Muluku omuthanlale awe okhala Mwene, Yesu Kristu, aari ni yaawo. Exeeni yaarowa waakupaliha atthu wira awiixutti a Yesu yaari anamitthaka a Omwene? Yesu aahaavaha owerya wowaapenuxa aretta ni waahihimuxa mahala atthu akhwiiye. Vano, arummwa ale yaarowa ophwanyaka sai itthu saathowa ni yoolya?

Yesu aahaaleela awiixutti awe wira ahikuxe etthu yaarowaka olaleerya. Nave khiyaatthuneya okuxa eweero, eparatha aahiiso musurukhu. Nnakhala okuxa murupa wa yoolya, soowara sikina aahiiso ixapattho. Nthowa xeeni? Nthowa noowi, atthu yaalaleerya aya yaarowa waavahaka itthu saathowa. Maana Yesu aalipihenrye wira: “Namuteko onniphwanela ovahiwa yolya”. (Matheyo 10:10) Nave Yesu aahimmye wira: “Mwavahiwá opuro, mukhaleke ntthoko nenlo mpakha nihiku ninkhumanyu elapo eyo”.—Marko 6:10.

Nave Yesu aahaalakiherya moota woolaleerya muhupi wa Omwene khula empa, oriki: “Mukelaka mpani-mmo, muxonttele murettele. Etthoko eyo yaphwanelelá, murettele anyu okhuruwele-mo; nto yahiphwanelele, murettele owo wotthikeleni. Atthu yahiwakheleni, walá yahitthune wiwa masu anyu, mwavenyaka etthoko eyo walá muttetthe owo, mutatheke ntthupi na munawuni mwanyu”.—Matheyo 10:12-14.

Waaniheryasa, atthu otheene a muttetthe aahiiso epooma ele yaarowa okhootta muhupi aya. Exeeni yaarowa wiiraneya? Yesu aahimmye wira muttetthe owo waarowa ophukeliwa. Nto aatthokihenrye so: “Kinolèlani ekhweli wira: nihiku n’olamuliwa, atthu ò Sodoma ni ò Gomora anomoreliwa ikharari ovikana elapo eyo”.—Matheyo 10:15.