Otthuneya Waya Olevelela

Pedru aahimwiiwa Yesu ovahaka malakiheryo a moota woophuka mixankiho eriyari ya anna. Masi vanikhala ntoko wira Pedru aaphavela osuwela ikwaha sene mutthu onireerela awe omulevelela mukhwaawe.

Pedru aamukonhe wira: “Pwiya, mukhw’aka akitthekelaka, kimuleveleleke vakavi? Mpakha vathanu na venli?” Ahooleli akina a itiini yiixuttiha wira mutthu aahaana olevelela ikwaha tthaaru paahi. Tivonto, Pedru uupuwela wira waari omureerela murima vanceene munnawe, akhala wira ammulevelela ikwaha “vathanu na venli [7]”.​—Matheyo 18:21.

Masi olepa ikwaha mutthu onimulevelela awe mukhwaawe, khiwaavarihana ni mwiixuttiho wa Yesu. Tivonto, Yesu aamukhalihenrye awe Pedru wira: “Nkinolèlani wira mpakha vathanu na venli: mmuleveleleke imara sothene!” (Matheyo 18:22) Eyo yaataphulela wira Pedru khaatthuneya olepa ikwaha aarowa awe omulevelela munnawe.

Nuumala-vo, Yesu aahilavula nlikanyiho wira omukhaliherye Pedru ni atthu akina woona otthuneya waya olevelela. Nto aalavunle nlikanyiho na murumeyi ahaatakinhe omoriwa ikharari wa pwiya awe. Mwene mmosa aaphavela olokiha musurukhu aakopheliwa awe. Murumeyi mmosa aakomphe italento 10.000 [niire so, idenaario 60.000.000]. Nto murumeyi ole khaawerya oliva. Tivonto, mwene ole aahiruma wira otumihiwe murumeyi ole, amwaarawe ni anaawe wira olive. Vano murumeyi ole, aahikokhora ohoolo wa mwene ole, onamuxonttela wira: “Xontte! Mukilipelele: kinimolivani sothene”.​—Matheyo 18:26.

Omoonelaka othunku ni ommorela ikharari, mwene ole aahimulevelela. Nuumala wiiraneya eyo, murumeyi ole aahimphwanya murumeyi mukhwaawe aamukophenle idenaario 100. Vano aahinvara exiko, onamphinyaka mmilo, amwiirelaka: “Mukilive sikikophenlyanyu!” Murumeyi ole aakomphe idenaario 100, aahikokhora ohoolo wawe onamuxonttela, oriki: “Xontte! Mukilipelele: kinimolivani!” (Matheyo 18:28, 29) Masi ole aakopheliwe khaatthanre ntakiheryo na mwene ole. Nnaamwi murumeyi ole aakopheliwe musurukhu vakhaani, aahiruma oriheliwa mukhatteya ole aamukophenle mpakha oliva.

Nto, Yesu aahimmye wira murumeyi mukina oonale ele yiiraneyale, aahirowa omuleela mwene. Vano mwene ole aahinanariwa vanceene, khumwiihaniha murumeyi owo, khumuhimeerya wira: “Nyuwo murumeyi òtakhala! Miyo kiholevelelani musurukh’ule wothene wakikophenlyanyu, wona mwahikivarela metto. Khimwakhanle ommorela ikharari mukhw’inyu, ntoko miyo komorenlyakani nyuwo?” Onanariwe ene, mwene aahiruma oriheliwa mukhatteya murumeyi ole ahaamulevelenle mukhwaawe, mpakha oliva itthu sotheene aakomphe awe. Vano Yesu aamalinhe ohimyaka wira: “Ti siso Atithi aka ari wirimu sinrowaya owirihani, mwahaleveleleke akhw’inyu ni murim’anyu wothene”.​—Matheyo 18:32-35.

Tthiri ninniixutta etthu ni nlikanyiho nla na olevelela! Muluku onlevelela vanceenexa. Nto soovonya anna anniirela aya ti saamukhaani nalikanyiha ni moota Muluku onlevelenle awe. Nave Yehova onninlevelela ohiya paahi ekwaha emosa, masi ikwaha sinceene. Niireke wira khinaareerela waalevelela anna vaavo annitthekela aya, hata noonaka wira antthekela tthiri? Ntoko Yesu iixuttinha awe Mwaha aalavunle awe Vamwaako, Muluku onrowa ‘onlevelela sottheka sahu, ntoko hiyo sàlevelenlyahu yanitthekenle’.​—Matheyo 6:12.