Yesu Aahooniherya Moota Woophwanya ohakalala Wekeekhai

Yesu iira omanle ene wiixuttiha voohimya sa ovekela. Masi owo khahiyo ti mwaha iixuttinha awe paahi okathi aalaleerya awe. Maana vaavo aapanke awe miiriirya oGalileya, Yesu aahootheriwa wira aapaka miiriirya iye okhaliheriwaka ni malaikha ootakhala. Vano ori ene oYudeya aahootheriwa-tho.

Okathi oomonle awe nlaikha nanvanre mulopwana nenno naamwiiriha ohilavula, muttitthi ole waahitikinihiwa. Masi ale yanvaanyiha khiyaatikinihiwe. Awo yaahitthikela onvaanyiha ariki: “Owerya wa Bèlizebuli, mulupale a malaikha òtakhala, t’unòmolanawe malaikh’awo”. (Luka 11:15) Akina aphavelaka osuwela omutthu wa Yesu, yaahinvekela ethoonyeryo ya wiirimu.

Okhala wira aahisuwela wira yammweehererya, Yesu aahiwaakhula mwa enamuna emosaru aawaakhunle awe atthu yanvaanyiha oGalileya. Aahimmye wira khula omwene onikawanyeya yooworu onnimora, oriki: “Satana akawanyeyaka, omwene awe ontthuna okhala sai?” Nuumala-vo aahaaleela mooluluwanya wira: “Masi miyo kòmolaka malaikha a Satana n’uwerya wa Muluku, vosuwanyeya wira Omwene wa Muluku wophiya eríyari anyu”.—Luka 11:18-20.

Okhala wira Yesu aahilavula ikatha sa Muluku aahiiso ‘owerya wa Muluku’, eyo yaahiwuupuxerya atthu ale yanwiriyana itthu saakhumelenle aIsarayeli khalai. Okathi makhulupale a Farawo yoonale aya miiriirya Moise aapanke awe, awo yaahimmye wira: “Owerya nno ti wa Muluku”. Nave-tho, Malamulo Muloko yaari vamapaweni manli a maluku yaalempwale “n’ikatha sa Muluku”. (Okhuma 8:15; 31:18) Vamosaru, “n’ikatha sa Muluku”, niire so, munepa wootteela aahiiso ikuru sa Muluku, ti saamukhaliherya Yesu woomola malaikha ootakhala ni waapenuxa aretta. Tivonto, Omwene wa Muluku waari eriyari aya anamavaanyiha ale, okhala wira Yesu, yoowo othanliwe okhala Mwene a Omwene wa Muluku taapaka miiriirya iye.

Okhala wira Yesu aaniwerya woomola malaikha ootakhala, eyo yooniherya wira ookhalana owerya onvikana Satana. Ntoko siisaale mulopwana ootupexa onwerya awe omuxintta guarda onlipelela empa ya mwene. Nave Yesu aahitthikela nlikanyiho na nlaikha nootakhala naamukhumme mulopwana. Akhala wira mulopwana owo khonuupuwela itthu sooloka, nlaikha nne ninnilattula malaikha makina 7, wira amukele, nto aniiriha makhalelo awe otepa otakhala ovikana wanipacerya. (Matheyo 12:22, 25-29, 43-45) Nto, eyo ti etthu yiiraneyale ni nloko na Isarayeli.

Muthiyana mmosa anwiriyana Yesu aahikhuwela oriki: “Yoreriwa erukulu yoyanreni ni mapele yawamwinheni”. Athiyana aYuda yanlipelela omuyara profeta, otepexa wene Mesiya. Tivonto muthiyana ole uupuwela wira Maria aahaana ohakalala vanceene mwaha woomuyara mwiixuttihi ole. Masi Yesu aahimukhaliherya muthiyana ole, omuleelaka etthu emphwanyiha ohakalala wekeekhai, oriki: “Òreriwa toko t’ale anìwa molumo a Muluku, enettela”. (Luka 11:27, 28) Yesu khaahimmye wira Maria aahaana ovahiwa nttittimiho na vameekhaaya. Masi etthu enimphwanyiha ohakalala wekeekhai mulopwana aahiiso muthiyana, ori okhala murumeyi oororomeleya a Muluku, ohiya mwaha wa omusi aahiiso mwaha wa itthu sipanke awe.

Ntoko aapanke awe oGalileya, Yesu aahaapwapwela atthu yaale yaavekela ethoonyeryo ya wiirimu. Yesu aahimmye wira khiyaarowa ovahiwa ethoonyeryo ekina ehikhanle ya “Yona pahi”. Yona aahikhala nthoonyeryo okathi aakhanle awe mmirimani mwa ehopa mahiku mararu ni olipa wawe murima orowa olaleerya moohoova, etthu yeeyo yaawiirinhe atthu o oNiinive ottharuwa. Yesu aahimmye so: “Vava òkhala-vo mutokwene ònvikana Yona”. (Luka 11:29-32) Nave Yesu aari muulupale onvikana Salomoni, yoowo aamwiirinhe pwiyamwene a oSaba otikinihinwa mwaha wa osuwela wawe.

Yesu ahimmye so: “Khavo ompattiha muthuko, khíyapweha nipuro nowipitheya, walá mukulukutheleni: masi nipuro nottukhuwa”. (Luka 11:33) Woonasa wene, aaphavela ohimya wira wiixuttiha ni opaka miiriirya ohoolo wa atthu ale waalikana ni ovitha muthuko. Okhala wira maitho aya khiyoona wira asuwele yoolakela ya miiriirya sa Yesu.

Yesu aahoomola nlaikha nootakhala naamwiiriha mulopwana ole ohilavula. Eyo yaahaana owiiriha atthu ale onvuwiha Muluku ni waaleela atthu akina ele Yehova aapaka awe. Tivonto Yesu aaloponle awe wira: “Mwipasope, vano, wira muthuko orinanyu ohikhalé epiphi. Vano erutthu anyu yothene yamwaleleya, ehikhalana epiphi nnákhala vakhani, yothene9 enokhala mowaryani, ntoko muthuko onomwalelayani ni warya waya”.​—Luka 11:35, 36.