Yesu Aahilya Owannyawe nFarisi

Ori ene oYudeya, Yesu aaheemererya orowa olya etthoko ya nFarisi. Woonasa wene waari othana, ohinatthi wiila. (Luka 11:37, 38; mulikanyihe ni Luka 14:12.) Ahinatthi olya, okhala wene aFarisi yaaninyawa mpakha mwekookhinoni. Masi Yesu khaapanke eyo. (Matheyo 15:1, 2) Owo khaahonona Nlamulo na Muluku, maana onyawa khahiyo yaari etthu yaavekeliwa ni Muluku.

Vano nFarisi ole aahitikinihiwa okhala wira Yesu khaatthanre yoolema ele. Yesu aahoona eyo khuhimya wira: “Nyuwo aFarisi, munnirapiha ekahi n’iparatho ottuli waya: masi mmurimani mwanyu mosareya sowiyiwa ni sonanara. Nyu mw’aloló! Muluku opattunxe itthu s’otá, khapattunxe-tho iye sa muhiná?”​—Luka 11:39, 40.

Mulattu waakhanle khahiyo waari onyawa onihatthi olya, masi waari wootha wa ahooleli a itiini. AFarisi ni atthu akina yaawo yaarina yoolema ya onyawa mpakha mukookhinoni, mirima saya saari sootakhala mwaha wa itthu soohiloka yaapaka aya. Tivonto, Yesu aavanhe awe miruku iya: “Mpajeryeke wavaha alipa-òhawa itthu siri mparathoni ni mukahini: siso itthu sothene sinimokhalihani sowarya”. (Luka 11:41) Eyo ekeekhai! Maana mutthu ohaana ovaha mwaha woophenta, ohiya mwaha woophavela ohimmwa aahiiso wiixooniherya okhala naxariya.

Atthu ale khiyapaka etthu eyo. Yesu aahimmye wira: “Motakhaliwa nyuwo, aFarisi! Nyuwo muninvaha Muluku mpantte wanamuloko wa itthu sikhanixa sa mmatta, ntoko makukhu anlyiwa; masi khamunthokorerya exariya n’umphenta Muluku. Iya t’irinanyu wira, muhihiyaka sikina”. (Luka 11:42) Nlamulo na Muluku naanivekela ovaha mpantta wa namuloko wa itthu yaarina aya. (Otumererya 14:22) Eyo yaahela muhina makukhu anlyiwa aahiiso itthu saaheliwa muyoolyani. AFarisi yaanimananiha ovaha itthu iyo, masi itthu sootepa otthuneya saavekeliwa ni Nlamulo tiiya: weettela exariya ni wiiyeviha vamaithoni va Muluku.​—Mikeya 6:8.

Yesu aahivikaniha oriki: “Motakhaliwa nyuwo, aFarisi! Mana wosivelani okilathi mapuro òpajerya mpani mothukumana, n’ukhomasiwa mmapuwani. Motakhaliwa nyuwo! Nyuwo munlikana ni mahiye ahinòneya, vano atthu annivira vasulu vaya ehisuwelaka”. (Luka 11:43, 44) Tthiri ale yaamorela vamahiye, yaanirava mwiikho. Yesu aahirumeela nlikanyiho na mahiye wira iiwanyeihe ohiloka wa aFarisi.​—Matheyo 23:27.

Mulopwana mmosa aasuwela vanceene Nlamulo na Muluku, aahimmye wira: “Mwixuttihi, mwalavulaka siso munninihimya hiyo-tho”. Tthiri mulopwana ole, aahoona wira khiyaawenrye waakhaliherya atthu. Nto Yesu aahimmye wira: “Motakhaliwa-tho ni nyuwo, awixuttihi a Ikano! Nyuwo munnareya atthu miritti sòlemelexa, nyuwo muhivaraka miritti seiyo hatá n’ikath’anyu. Motakhaliwa nyuwo! Nyuwo munnatekela ikololo [ikampa] maprofeta, axitith’inyu akhanle t’awivale”.​—Luka 11:45-47.

Yesu aahimya soolema ni moota aFarisi yaatthokiherya aya Nlamulo. AFarisi yaanaaxankiha vanceene atthu. Maana yaaniwiiriha atthu okuxa miritti sootepa olemela. Amuhavinre aya yaahiwiiva maprofeta a Muluku, okhuma Abeli orowa ohoolo. Vano, awo yaapaka etthu emosaru vaavo yaateka aya ikampa sa maprofeta yaiviwe, akhalaka ntoko yamwaattittimiha ntoko yaapaka aya amuhavinre aya. Nave awo yaanaavya enamuna yoomwiiva Profeta a Muluku. Yesu aahimmye wira yaamukohiwa mwaha wa miteko saya. Eyo yiiraneyale nuuvira iyaakha 38, niire so, mwaakha wa 70 EC.

Yesu aahivikaniha oriki: “Motakhaliwa nyuwo, awixuttihi a Ikano! Nyuwo mokuxa mihulelo s’ankhili: siso nyuwo khamukenle, mowojeliha ale yaphavela okela-mo”. (Luka 11:52) Atthu ale yaahaana waakhaliherya osuwela Nuulumo na Muluku. Masi yahaakhoottiherya osuwela ni wiiwexexa Nuulumo na Muluku.

AFarisi ni alipa-oolepa yoonenle sai? Vaavo Yesu aakhuma awe, ananariwe ene yaahipacerya omukoha vanceene. Masi khiyaamukoha moophavela wiixutta. Maana yaaphavela wira Yesu ohimye etthu wira anvare ni masu awe.