Nlattulo na Yoolya

Nuumala ompenuxa mulopwana aipelana, Yesu aahivikaniha okhala etthoko ya nFarisi. Yesu aahaaweha atthu akina yaalattuliwe niira nne, athanlaka opuro woolokexa, nto aahirumeela okathi ole wira owiixuttihe wiiyeviha.

Yesu aahimmye so: “Mwalattuleliwaka yolya ya nìra n’othela, muhithanleké nipuro nottittimiheya: mana akhalá mukina olattuliwe òttittimeheyexa wovikanani nyuwo, mwanene òlattunleni nyuwo ni mukhw’inyu onimorwa, òhimeryeni wira: ‘Muhiyeryeni ula nipuro nlo’. Siso, mwamùliwa muru, murowaka nipuro nokiserya”.​—Luka 14:8, 9.

Nuumala-vo, Yesu aahihimya wira: “Nto mwalattuleliwa yolya, mukilathiki nipuro nokiserya. Siso, arwaka ole òlattunleni, onowirelani wira: ‘Mpatthani, mususerye nipuro nla n’oholo’. Siso munottittimiheya oholo w’atthu othene ari ni nyuwo vamesa”. Eyo khahiyo paahi enamuna ya waathokorerya saana atthu akina. Nto Yesu aatthokihenrye wira: “Tthiri, ole onisinnuwiha, onoyevihiwa: vano ole onìyeviha, onimwin-nuwihiwa“. (Luka 14:10, 11) Mwekeekhai, Yesu aatumererya atthu ale yanwiriyana okhala oowiiyeviha.

Moottharelana Yesu aahiwiixuttiha etthu ekina aFarisi ale yaamulattunle. Owo aahaaleela wira yaahaana opaka niira nimmusivela Muluku. Yesu aahimmye so: “Mwatthapelaka nìra nanyu, muhalattuleké yolya apatthan’inyu, walá axinn’inyu, hatá amus’inyu, nnákhala anamwattamanan’inyu athajiri: mwirá siso, awo anrowa owihanelani-tho yoly’aya, mutthikiheriwe. Nto, mwalikanyihaka yolya, mwalattuleke alipa-òhawa n’atthu òrakala ni òtuthunya n’alipa-òhona. Siso munoreriwa, okhala wira awo kharina yo wotthikiheryani”.​—Luka 14:12-14.

Yesu khaaphavela ohimya wira waalattula apatthani, amusi aahiiso anamwaattamanani ihu nihiku na niira etthu yootakhala. Masi Yesu aattittimiherya wira ale anaalattula atthu oothoiwa ntoko, alipa-oohaawa, oorakala ni ahinoona, anniphwanya mareeliho. Yesu aahaaleela atthu ale yaamulattunle wira: “Muluku t’unrowa wotthuvelani nihiku ninhihimuwaya atthu àxariya”. Mulopwana mmosa aalattuliwe aaheemererya masu a Yesu onahimya wira: “Oreriwa t’ule onrowa olya Momweneni wa Muluku!” (Luka 14:15) Owo aahoona wira yaarowa okhala eparakha yuulupale. Masi, ntoko Yesu aahimmye awe moottharelana, khahiyo wira atthu otheene yoonela ntoko mulopwana ole.

Yesu aahimmye so: “Mulopwana mmosá ahetetela nìra nawe nulupale, khwalattula atthu anjene. Salikannyaya sothene, ahimuruma namuteko awe orowa walèla alipa-òlattuliwa wira: ‘Murweke! Yolya yolikana!’ Vano othene aya yahipajerya mmosá-mmosa okhotta ni ntthyawelelo. Mukina ahihimya wira: ‘Kothuma ematt’aka: kihana orowa oweha. Mukilevelele: nkinwerya orwa’. Mukina ahira: ‘Kothuma inyompe mulokó: kinrowa opajeriha ovara muteko. Mukilevelele: nkinwerya orwa’.Mukina-tho ahihimya wira: ‘Kithenle nanano: tivó nkinwerya orowa’”.​—Luka 14:16-20.

Tthiri itthu yaahimya aya saari ntthyawelelo paahi! Okhala wene mutthu onniweha ematta aahiiso inama ohinatthi othuma, nto khavanitthuneya waakuvela orowa oweha nuumala othuma. Mulopwana a neeraru khahiyo wira ailokiherya wira athele. Owo iira othenle ene, nto eyo khiyaamukhoottiherya weemererya nlattulo na vameekhaaya. Okathi aiwale awe matthyawelelo ale, mwaneene niira aahinanariwa.

Vano aahimuleela murumeyi awe wira: “Mwakuveke, murowé mmawani mothene n’iphiro sothene sa mmuttettheni. Mwaruhe alipa-òhawa, n’atthu òrakala ni òtuthunya n’alipa-òhona”. Nuumala murumeyi ole opaka eyo, nlelo waahihala opuro mpaani mme. Nto mwaaneene etthoko aahimuleela-tho murumeyi awe wira: “Murowé iphiro ni miphito sothene, mwakhanyererihe atthu okela-mu, wira vaté vaka vasareiwe. Kinohimeryani wira: khavo mw’ale yapajenrye olattuliwa onrowa olawiha yoly’aka”.​—Luka 14:21-24.

Ele Yesu aahimmye awe ennooniherya moota Yehova Muluku aamurumme awe Yesu Kristu omulattula khula mutthu wiirela mpantta Omwene wa wiirimu. AYuda, otepexa wene, ahooleli a itiini ti yaapacenrye olattuliwa. Masi atthu anceene yaahikhootta nlattulo nne okathi Yesu aalaleerya awe. Masi yaamulattuliwa atthu akina. Vannooneya wira Yesu aahihimya wira muhoolo mwaya, nlattulo na nenli yaarowa olattuliwa-tho aYuda oowiiyeviha ni atthu ale yahaakhanle aYuda masi yaakenle eYuda. Nuumala-vo, naamukhala nlattulo na neeraru ni nookiserya, yaarowa aya olattuliwa atthu yaale aYuda yaawoona aya ohiphwanelela omurumeela Muluku.​—Miteko 10:28-48.

Moohaaniherya, etthu Yesu aahimmye awe yaanooniherya moolumo a atthu akina yaalattuliwe ani: “Oreriwa t’ule onrowa olya Momweneni wa Muluku!”