Ohakalala Onikhumelela Mwaha wa Natampi Onttharuwa

Okathi Yesu aalaleerya awe, aahittittimiherya ikwaha sinceene otthuneya waya wiiyeviha. (Luka 14:8-11) Owo aaniimananiha wira aaphwanye alopwana ni athiyana yaaphavela omurumeela Muluku mowiiyeviha. Atthu akina a yaawo, yaanisuwelexiwa okhala anatampi.

AFarisi ni alipa-oolepa akina yaanaasuwela atthu awo. Nave yaawoona ntoko atthu oohiphwanelela, masi atthu awo yaaniiwelela muhupi Yesu aalaleya awe. Awo yaanimwaapa ahimyaka wira: “Ola onlimalelana n’anatampi, khíyalya ni yawo!” (Luka 15:2) AFarisi ni alipa-oolepa, yaaniixoona okhala atthu a vasuluxa ni yaanaathokorerya atthu pure ntoko ikokhola. Okhala wira ahooleli ale yaanaaramusa atthu ale, yaanirumeela nuulumo na eHeeberi noowi ‘am ha·’aʹrets, eyo piiyo, “atthu a valaponi-va”, yaahimyaka atthu ale.

Moovirikana ni ahooleli ale, Yesu aanaathokorerya atthu mooreerela murima, mwa nttittimiho ni othunku. Atthu anceene oowiiyeviha, waahela muhina ale yooniwa okhala anatampi yaaniphavela onwiriyana Yesu. Owo oonenle sai vaavo aavaanyihiwa awe mwaha wowaakhaliherya atthu ale oowiiyeviha?

Moonelo aya waahooneya okathi Yesu aapanke awe nlikanyiho noovara murima naalikana ni nle aapanke awe oKafarnawu. (Matheyo 18:12-14) Yesu aahaahimya aFarisi okhala anaxariya yaawo yaari oovareleleya munikotoni mwa Muluku. Moovirikana ni vo, atthu oowiiyeviha yaari ntoko atthu yaarimenle.

Yesu aahimmye so: “T’ani a nyuwo, akhalaná ipwittipwitthi sawe miloko mulokó [100], yamurimela emosá, ahinahiya iye sikina miloko mithanu na mixexe ni thanu na xexe [99] mothakoni, arowaka ophavela ele emurimenle, mpakha ophwanya? Aphwanyá vale, onnitteliwa murima, khukapatta epwittipwitth’iyo mmakhatani. Aphiyakaru owani, onnathukumanya apatthani awe n’anamwattamanani awe, anahimerya wira: ‘Mutteliweke murima vamosá ni miyo: kophwanya epwittipwitthi aka yakirimenle’”.​—Luka 15:4-6.

Yesu aavarihenle sai muteko? Owo aatthokihenrye so: “Miyo kinolèlani wira: wirimu onotthapeliwa volikana natampi mmosá onttharuwa sottheka sawe, vowavikana atthu miloko mithanu na mixexe n’athanu n’axexe [99] àxariya, ahimphwanelela orukunuxa murima”.​—Luka 15:7.

Masu a Yesu voohimya sa ottharuwa, yaahaananara aFarisi. Maana yaixoona okhala anaxariya ni wira khiyaatthuneya ottharuwa. Okathi aFarisi akina yanvaanyihale aya mwaha woolya ni alipa-ooliviha mpoosito ni anatampi iyaakha piili saavinre, Yesu aawaakhunle wira: “Miyo nkirwenle owihana atthu òrera murima, masi alipa-òttheka”. (Marko 2:15-17) Okhala wira aFarisi yaixoona okhala anaxariya ni wira khiyaatthuneya ottharuwa, awo khiyaakumiherya ohakalala wiirimu. Maana anatampi anttharuwa tanikumiherya ohakalala wiirimu.

Ottittimiheryaka ohakalala wuulupale onikhumelela wiirimu mwaha wa anatampi anttharuwa, Yesu aahipaka nlikanyiho nikina, oriki: “Nkhi muthiyana xeni onìra akhalanne ilívura sawe mulokó, yamurimela emosá, ahinapattiha muthuko, ahinavela mpani, khuhiphavela orattene, mpakha ophwanya? Aphwanyá vale, onnathukumanya apatthani awe n’anamwattamanani awe, anahimerya wira: ‘Mutteliweke murima vamosá ni miyo: kophwanya musurukhu aka wakirimenle’”.​—Luka 15:8, 9.

Yesu aahivarihela muteko nlikanyiho nna, ntoko siisaale nlikanyiho aapanke awe na epwittipwitthi yaarimenle, oriki: “Siso, kinohimeryani wira: Malaikha a Muluku anotthapa volikana mwaha wa natampi mmosá onrukunuxa murima”.​—Luka 15:10.

Nkahaya muupuwele ela: malaikha annihakalala yaawehaka anatampi atthikelaka wa Muluku! Ti vootthuneya woona wira anatampi anittharuwa anniphwanya opuro Moomweneni wa Muluku wiirimu. Nave anrowa okhalana eparakha yuulupale ovikana malaikha ari wiirimu! (1 aKorinto 6:2, 3) Mwekeekhai, malaikha khanaakhalela nrima. Ankhi hiyo, nooneleke sai vaavo natampi ontthikela awe wa Muluku ni murima wotheene?