Ohihimuxiwa wa Laazaro

Nuumala Yesu okumana ni Martha, moottharelana ni Maria waattamela oBethania, awo yaahirowa opuro aavithiwe awe Laazaro. Nto nikhuku aavithiwe awe Laazaro naahittiyeliwa ni nluku. Nto Yesu aahihimya wira: “Mukumihe nluku nla”. Vano Martha aahixankiheya okhala wira khaasuwela etthu Yesu aarowa awe opaka. Nto aahimuleela Yesu wira: “Pwiya, onninkha. Ovithiwé masuri”. Vano Yesu aahimuleela wira: “Nkohimenryeni wira, mwaminí vale, munimona ovuwa wa Muluku?”​—Yohani 11:39, 40.

Nto nluku nne naahikumihiwa. Vano Yesu aahiweha wiirimu onavekela oriki: “Tithi, kinnoxukhuruni, mana mokìwelela. Kosuwela tthiri wira mahiku othene munnikìwelela: vano kihimmye siso mwaha w’atthu ala arukurenrye va, wira yamini wira ti nyuwo mukirumme”. Nivekelo Yesu aapanke awe, naahiwooniherya ale yanweha wira etthu aarowa awe opaka, aarowa orumeela owerya wa Muluku. Nuumala-vo, Yesu aahilavula moorunya oriki: “Lázaro, mukhumele otá nno!” Vano Laazaro aahikhumela ota matata awe ni metto sawe sisipeliwe ene ni owiitho wawe okhuneliwe ene ni ekuwo. Nto Yesu aahihimya wira: “Mmutaphule, mmuhiye aroweke”.​—Yohani 11:41-44.

AYuda anceene yaarwiiye ommaaliha Maria ni Martha yaahoona mwiiriirya ole ni yaahimwaamini Yesu. Masi atthu akina yaahirowa waaleela aFarisi etthu Yesu aapanke awe. Nto aFarisi awo ni mukhulupale aanamukuttho yaahipaka muthukumano aya nipuro aYuda yaaphuka aya milattu, oSineedrio. Nikhuuru nne naamuhela muhina mukhulupale aanamukuttho, Kaifa. Akina a yaawo yaahihimya wira: “Mulopwan’owo onnìra sotikiniha sinjene. Nìre sai? Namuhiyá sisa, atthu othene anrowa omwaminiki: aRoma animorwa, anopwexakasa empa ya Muluku, nave anopwetexa nloko nahu”. (Yohani 11:47, 48) Awo yaahiiwa onamoona wa atthu akina wira Yesu ‘anìra sotikiniha sinjene’, vano awo khiyaasiveliwe ni ele Muluku aapaka awe omurumeelaka Yesu. Tthiri, yaahixanka mwaha wa okhulupale aya ni nttittimiho yaavahiwa aya.

Ohihimuxiwa wa Laazaro mwa alipa-ookhwa waari oxinttiwa wuulupale wa aSaduki, yaawo yahaakupali ohihimuxiwa wa alipa-ookhwa. Vano, muSaduki Kaifa, aahikhuwela oriki: “Nyuwo khamunupuwela etthu! Khamunona wira vanrerela mutthu mmosá pahi àkhwele atthu othene, wira nloko nothene nihipweteyé?”​—Yohani 11:49, 50; Miteko 5:17; 23:8.

Okhala wira Kaifa aari mukhulupale aanamukuttho, Muluku taamwiirinhe olavula masu ale, owo ‘khahimmye etthu ele volakelela’. Kaifa aaphavela ohimya wira Yesu aahaana wiiviwa ohinatthi otteettheiha owerya ni okhulupale yaarina aya ahooleli a itiini sa aYuda. Hata vari siiso, eprofesia ya Kaifa yooniherya wira okhwa wa Yesu, waarowa owoopola ohiya paahi aYuda, masi-tho “àna othene a Muluku yamwareiye”.​—Yohani 11:51, 52.

Kaifa aahiwerya owiiriha makhulupale otheene a oSineedrio ompaka palano wira amwiive Yesu. Niireke Nikodemo, yoowo aari mmosa a makhulupale a oSineedrio ni aamusuwela Yesu ammuleela palano ole aapakiwe? Hata aasuwenle aahiiso nnaari, Yesu aahikhuma mowaakuveya oYerusalemu, nto eyo yaahikhaliherya ohiiviwa vahinatthi okathi Muluku aathanlale awe.