‘Nwupuweleke Aholeli Anyu’

MOOLUMO a murummwa Paulo ari aHéberi 13:7, pooti otaphuleliwa mwa enamuna ela: “Nwuupuweleke ale anoolamulelani”. Okhuma Pentekoositi a 33 nuumala Kristu orwa, arummwa oororomeleya a Pwiya Yesu Kristu, yaahikhalana muritti wa olamulela, maana yaanihoolela ni ovaha malakiheryo muloko ole wa eKristau waapakiwe niinaano. (Mit. 6:2-4) Masi okhuma mwaakha 49 nuumala Kristu orwa, yaahikhala atthu akina yiirela mpantta nikhuuru noolamulela, ohiya paahi arummwa a Yesu. Maana okathi waaphukiwe aya mwaha wa winnuwihiwa, nikhuuru noolamulela naahela muhina “arummwa ni mahumu” ooYerusalemu. (Mit. 15:1, 2) Muteko wa nikhuuru noolamulela waari othokorerya myaha saahela muhina maKristau a mapuro otheene a okathi ole. Awo yaaniroiha malakiheryo ni iwarakha saalipiha miloko ni saawiiriha arummwa okhalana moonelo ni muupuwelo mmosaru. Nto miloko saaniiwelela ni saanitthara malakiheryo a nikhuuru noolamulela. Mwaha woopaka eyo, miloko saaninnuwa ni saanireelihiwa vanceene ni Yehova.—Mit. 8:1, 14, 15; 15:22-31; 16:4, 5; aHéb. 13:17.

² Nuumala okhwa arummwa a Yesu, yaahipacerya anammwareya. (2 aTes. 2:3-12) Ntoko Yesu aahimmye awe nlikanyiho nawe na etriku ni nthakathaka, okathi ole naahaaliwa nthakathaka (maKristau oowootha) eriyari ya etriku (maKristau oothanliwa). Mwa iseekulu sinceene, saahihiiwa ikrupu iyo soopiili sinnuwaka vamosa mpakha okathi woohepha, eyo piiyo, “nihiku n’omala olumwenku”. (Math. 13:24-30, 36-43) Okathi ole, khula muKristau oothanliwa aaneemereriwa ni Yesu, masi khinaakhanle nikhuuru noolamulela ni khinaakhanle nikhuuru nowooneya naavaha malakiheryo ni yoolya ya omunepani atthareli a Yesu. (Math. 28:20) Masi, Yesu aahimmye wira okathi woohepha yaamukhumelela marukunuxo.

³ “Murumeyi òroromeleya ni ànkhili t’uvi”? Orumeelaka nikoho nna, Yesu aahipaceriha nlikanyiho naarowa wooniherya “ethonyeryo” aavanhe awe voohimya sa “omala olumwenku”. (Math. 24:3, 42-47) Yesu aahooniherya wira murumeyi awe oororomeleya, aarowa waavahaka atthu a Muluku yoolya ya omunepani “okathi” wooreerela. Ntoko siisaale eseekulu yoopacerya, Yesu arumenle awe ekrupu ya alopwana ohiya mutthu mmosa wira ohooleleke, mahiku ala ookiserya Yesu onnirumeela ekrupu ya alopwana yaawo aniirela mpantta murumeyi oororomeleya wira yaahooleleke atthu a Muluku.

“MURUMEYI ÒROROMELEYA NI ÀNKHILI T’UVI”?

⁴ Tani Yesu omuthanlale awe wira aavaheke yoolya ya omunepani atthareli awe? Owo onaaruma maKristau oothanliwa ari valaponi. Biibiliya onnaahimya maKristau awo okhala “nloko n’anamukuttho”, yaawo athanliwe wira ‘alaleye sotikiniha’ sa Ole owiihanne mweepiphini wira akhale moowaaryani. (1 Ped. 2:9; Mal. 2:7; Wis. 12:17) Masi niireke makristau otheene oothanliwa ari valaponi anniirela mpantta murumeyi oororomeleya? Nnaari. Okathi Yesu aalyinhe awe mwa mwiiriirya alopwana 5.000 waahiya athiyana ni anamwane, owo aahaakawela awiixutti awe, vano awiixutti yaahaakawela atthu otheene a muttitthi ole. (Math. 14:19) Tthiri Yesu aahaalyiha atthu anceene aarumaka atthu vakhaani. Olelo-va, Yesu onninivaha yoolya ya omunepani mwa enamuna emosaru aapanke awe eseekulu yoopacerya.

⁵ Eyo enooniherya wira “murumeyi òroromeleya ni ànkhili”, ekrupu yaamukhaani ya maKristau oothanliwa yaawo anilokiherya ni okawa yoolya ya omunepani okathi ola wa okhala-vo wa Kristu. (Luka 12:42) Mahiku ala ookiserya, anna oothanliwa aniirela mpantta nikhuuru na “murumeyi òroromeleya ni ànkhili” anirumeela eseedi ahu ya olumwenku wotheene. Olelo-va, anna awo oothanliwa tari Nikhuuru Noolamulela na Anamoona a Yehova.

⁶ Kristu onniruma ekrupu eyo wira elaleye moota iprofesia sa mBiibiliyani siniiraneya aya, ni ovaha malakiheryo a moota woovarihela muteko malakiheryo a mBiibiliyani khula nihiku. Yoolya eyo ya omunepani ennikaiwa mmilokoni sa Anamoona a Yehova. (Yes. 43:10; aGal. 6:16) Okathi wa Biibiliya, murumeyi taakhapelela empa ya pwiya awe. Mwa enamuna emosaru, murumeyi oororomeleya oovahiwa muritti wookhapelela emusi yotheene yowaamini ya Muluku. Nto eyo enooniherya wira, murumeyi oororomeleya onnikhapelela mireerelo, muteko woolaleerya, iprokrama sa asembeleya ni akongresu, waathanla alopwana oophwanelela wira akhapeleleke miritti sikina mmutthenkesoni ni opaka iliivuru. Owo onnipaka itthu iyo sotheene wira “awettiheke anamuteko”.—Math. 24:45.

⁷ Nto tani ari “anamuteko”? Olavula mookwasa, anihimmwa atthu otheene anivahiwa yoolya ya omunepani. Wanipacerya wa mahiku ookiserya, anamuteko yaari maKristau otheene oothanliwa. Muhoolo mwaya, anamuteko anniheliwa muhina atthu ale aniirela mpantta “ipwittipwitthi sikina”. (Yoh. 10:16) Ikrupu iyo soopiili, sinnittottela mureerelo yoolya enikumiheriwa ni murumeyi oororomeleya ni ankhili.

⁸ Okathi wa maxakha maalupale, vaavo Yesu onrowa awe ophukela olumwenku ola wootakhala, owo ononvaha murumeyi oororomeleya “muhakhu awe wothene”. (Math. 24:46, 47) Okathi owo, ale aniirela mpantta murumeyi oororomeleya anrowa otthuveliwa wiirimu. Vamosa ni maKristau makina oothanliwa 144.000, awo anrowa olamulelaka ni Kristu wiirimu. Nto waphiya okathi owo, valaponi khonrowa okhala murumeyi oororomeleya. Masi Yehova ni Yesu anrowa waavahaka malakiheryo atthu anrowa okhalaka valaponi alamuleliwaka ni Omwene wa Mesiya. Nto okathi owo onrowa waathanla atthu akina wira akhale “mapewe”.—Esal. 45:17.

XEENI VARI AYA VOOLOKA ‘OWUPUWELELA AHOLELI AHU’?

⁹ Sookhala itthu sinceene sinniiriha ‘owupuwela aholeli ahu’ ni wooniherya wira ninnaaroromela. Xeeni owuupuwela ni waaroromela onniphwanyiha aya mireerelo? Murummwa Paulo ohimmye so: “Okhala wira annokhapelelani mutthu ti mutthu, yawo anrowa okohiwa mwaha wa nyuwo. Mwawìwelelaka vale, awo anovara muteko n’utteliwa murima, khahiyó n’ujikula: etthu ene yela khiyòphwanyihani etthu”. (aHéb. 13:17) Ti vooloka wiiwelela malakiheryo annivaha aya ale annihoolela mwaha woowi anninikhapelela wira nikhaleke saana momunepani.

¹⁰ 1 aKorinto 16:14, murummwa Paulo aahimmye so: “Sothene sinìranyu, mwireke n’uphenta”. Soothanla sotheene sinipakiwa ni atthu a Muluku sineettihiwa ni mukhalelo ola muulupalexa, ophenta. Voohimya sa ophenta, 1 aKorinto 13:4-8 onihimya so: “Ole omphenta t’òvilela, t’òwarumela akhw’awe, khanakhalela nrima; khanìvuwiha, khanìkuxererya. Ole omphenta onnalemeliha akhw’awe, khamphavela murerelo awe, khaniviruwa, khanùpuwela sotakhala sìreliwawe. Ole omphenta khansiveliwa n’itthu sohiloka, nto owo onnitteliwa murima n’ikekhai. Ole omphenta onnakhurunuwela atthu othene, onnakupali atthu othene, onniroromela vohihiyererya, onnivilela sothene. Ophenta khummala-tho”. Okhala wira soothanla sotheene sinipakiwa moophenta wira saaphwanyiheke mureerelo atthu a Yehova, onninsivela olamuleliwa mwa enamuna eyo yoophenta. Ohiya-vo, olamulela iwo woophenta onooniherya ophenta wa Yehova.

¹¹ Ntoko eseekulu yoopacerya, atthu Yehova onaaruma awe wira aweettiheke atthu awe toohimalela. Tthiri, okhuma khalai Yehova onnaaruma atthu oohimalela wira opake otthuna wawe. Mwa ntakiheryo, Nowe aahiteka ekalawa ni aahilaleya wira olumwenku ole wampwetexiwa. (Maph. 6:13, 14, 22; 2 Ped. 2:5) Moise aahithanliwa wira aakumihe atthu a Yehova wExiitu. (Okhum. 3:10) Nave yaahirummwa alopwana oohimalela wira amulepe Biibiliya. (2 Tim. 3:16; 2 Ped. 1:21) Nnaamwi olelo-va Yehova aarumaka alopwana oohimalela wira ahooleleke muteko woolaleerya ni waapaka awiixutti, eyo khenihonona ororomela wahu mutthenkeso awe. Ohiya-vo, ninnilipa osuwela wira vaakhanle wira khaninkhaliheriwa ni Yehova, mutthenkeso awe khiwaarowa opaka itthu onipaka awe. Hata sikhumelelaka mixankiho, murumeyi oororomeleya ni ankhili onnooniherya wira ikuru sowaarya sa Muluku ti sineettiha itthu sotheene. Olelo-va, mpantta wa valaponi wa mutthenkeso wa Yehova onnaakhela mareeliho manceene. Nto hiyo ninnikhaliherya ni ninniroromela ni murima ahu wotheene.

NINROWA WOONIHERYA SAI WIRA NINNAAROROMELA?

¹² Ale anithanliwa wira akhalane iparakha mmulokoni annooniherya wira toororomeleya vaavo aneemererya aya ni anivara aya oratteene miteko saya mmulokoni. (Mit. 20:28) Okhala wira ninlaleya Omwene, hiyo ninniluttuweliwa waalaleerya atthu empa ni empa, opaka irevisita ni wiiriha soosoma sa Biibiliya. (Math. 24:14; 28:19, 20) Wira nittottele mureerelo yoolya ya omunepani ninvahiwa ahu ni murumeyi oororomeleya ni ankhili, nihaana olokiherya ni wiirela mpantta mithukumano sa mmulokoni, ohela muhina mithukumano sa asembeleya ni akongresu. Ninnittottela mureerelo olipihana vaavo ninthukumana ahu ni anna ni arokora mmulokoni.—aHéb. 10:24, 25.

¹³ Vaavo ninkhaliherya ahu mutthenkeso wa Yehova nivahaka musurukhu ahu, ninnooniherya wira ninniroromela mutthenkeso wa Yehova. (Mir. 3:9, 10) Nave okathi nnoona ahu wira sookhala itthu sinaathowa anna ni arokora, hiyo ninnaakhaliherya moohipisa. (aGal. 6:10; 1 Tim. 6:18) Ninnipaka eyo wira niwooniherye waaphenta wahu. Nave okathi wotheene nimphavela omooniherya Yehova ni mutthenkeso awe wira ninnixukhurela onireerela wawe murima.—Yoh. 13:35.

¹⁴ Nave ninnooniherya wira ninniroromela mutthenkeso wa Yehova, vaavo ninkhaliherya ahu soothanla sinipakiwa mmutthenkesoni. Eyo enihela muhina otthara moowiiyeviha malakiheryo ninvahiwa ahu ni anna arina miritti mmutthenkesoni, ntoko axitokweene a esirkwiitu ni axitokweene a mmulokoni. Anna awo anihela muhina ‘aholeli ahu’ yaawo ninreerela ahu owiiwelela ni murima wotheene. (aHéb. 13:7, 17) Hata nihisuwelaka etthu yiirinhe opakiwa yoothanla, ninnisuwela wira okhaliherya onooniphwanyiha mireerelo sinceene. Niira siiso, Yehova onoonireeliha mwaha wowiiwelela Nuulumo nawe ni mutthenkeso awe. Nave opaka eyo, ninnooniherya wira ninnimwiiwelela Pwiya ahu, Yesu Kristu.

¹⁵ Tthiri sookhala itthu sinceene sinniiriha omuroromela murumeyi oororomeleya ni ankhili. Masi, Satana yoowo ori muluku a olumwenku ola wootakhala onniimananiha wira ohonone nsina na Yehova ni mutthenkeso awe. (2 aKor. 4:4) Muhimorele muraakho wa Satana! (2 aKor. 2:11) Satana onnisuwela wira “orina okathi vakhani pahi” wira oriheliwe nlitti noowiixa, nto oniphavela waahapuxa arumeyi anceene a Yehova. (Wis. 12:12) Vaavo Satana onitepa awe wiimananiha ophavela onihapuxa, hiyo nihaana wiimananiha omwaattamela Yehova. Nihaana ororomela ni murima wotheene mutthenkeso Yehova onirumeela awe wira aalakiherye atthu awe olelo-va. Niira siiso, nnoolipiha waataana wahu ni anna a olumwenku wotheene.