Moota Muloko Otthokihiwe Awe ni Oneettihiwa Awe

EWARAKHA yoopacerya aalepenle awe aKorinto, murummwa Paulo aahihimya ekeekhai yuulupale voohimya sa Muluku. Owo aalempe so: “Muluku ti Muluku” ootthokiheya ni a murettele. Moottharelana, olavulaka voohimya sa mithukumano sa mmulokoni, owo aahimmye so: “Itthu iya sothene sìriwe ni nttittimiho ni wiwanana”.—1 aKor. 14:33, 40.

² Wanipacerya wa ewarakha ele, murummwa Paulo aahivaha miruku voohimya sa ohiiwanana waakhanle muloko wa oKorinto. Owo aahaatumererya anna a muloko ole wira yahaana ‘wiwanana’ ni “murima mmosá ni mupuwelo mmosaru” paahi. (1 aKor. 1:10, 11) Nuumala-vo, Paulo aahivaha miruku voohimya sa myaha sikina saahonona murettele mmulokoni. Owo aahipaka nlikanyiho na moota erutthu enivara aya muteko wira ooniherye otthuneya waya wiiwanana. Nave aahaatumererya wira yaahaana okhapelelana moophenta moohicikha muritti mutthu owo aarina awe mmulokoni. (1 aKor. 12:12-26) Wiiwanana ni wiiraana wa atthu otheene a mmulokoni waamooniherya wira muloko ti wootthokiheya.

³ Masi muloko wa eKristau waatthokihiwe sai? Tani aatthokinhe? Waarowa otthokihiwa mwa enamuna xeeni? Tani yaarowa okhalana iparakha? Akhala wira nnoomurumeela Biibiliya, nnoowerya osuwela waakhuliwa wa makoho awo.—1 aKor. 4:6.

OTTHOKIHIWE MWA ENAMUNA MULUKU ONIPHAVELA AWE

⁴ Muloko wa eKristau wa eseekulu yoopacerya, waapakiwe Pentekoositi a 33 nuumala Kristu orwa. Exeeni ninsuwela ahu voohimya sa muloko wa eseekulu yoopacerya? Muloko ole, waatthokihiwe mwa enamuna Muluku oniphavela awe, eyo piiyo, olamulela (eKriki, kraʹtos) wa Muluku (the·osʹ). Moolumo awo oomanli aarumeeliwa 1 Pedru 5:10, 11. Yowiiraneya yaakhumelenle oYerusalemu iyaakha 2.000 sivinre, ennooniherya wira muloko wa maKristau oothanliwa waapakiwe ni Muluku. (Mit. 2:1-47) Muloko ole waari empa ya Muluku wala emusi awe. (1 aKor. 3:9; aÉf. 2:19) Olelo-va, muloko wa eKristau onitthara enamuna emosa ya muloko wa eseekulu yoopacerya.

⁵ Muloko wa eseekulu yoopacerya, waapacenrye ni awiixutti 120. Awo ti yaapacenrye ovahiwa munepa wowaarya wa Muluku, wira yiiraneye eprofesia eri Yoweli 3:1, 2. (Mit. 2:16-18) Masi nihiku nenne, yaahipatisiwa atthu yaavikana 3.000, atthu awo yaahipacerya wiirela mpantta muloko ole waakumiheriwe ni munepa wowaarya wa Muluku. Atthu ale yaaheemererya moolumo a Kristu ni “yanikhalela nthiti wiwa mixuttiho s’arummwa”. Nuumala-vo, Yehova aaniwuncererya “mmulokoni mmwe atthu akina yihaneliwe wòpowa”.—Mit. 2:41, 42, 47.

⁶ Muloko wa oYerusalemu waaninnuwa vanceene mpakha omwiiriha mukhulupale a anamukuttho aYuda ohimya wira awiixutti a Yesu yaahisariha soowiixuttiha saya epooma ele yotheene. Eriyari ya awiixutti a niinaano a muloko wa oYerusalemu yaahikhala anamukuttho aYuda.—Mit. 5:27, 28; 6:7.

⁷ Yesu aahimmye so: “[Nyuwo] munrowa okhala anamon’aka oYerusalemu ni oYudeya wothene ni oSamariya, mpakha omalenle elapo”. (Mit. 1:8) Eyo ti etthu yiiraneyale. Nuumala wiiviwa Siteefano, awiixutti a oYerusalemu yaahipacerya olupatthiwa vanceene, nto awiixutti awo yaahitthyawela oYudeya wotheene ni oSamariya. Nto mapuro otheene yaarowa aya, awo yaahivikaniha olaleya ihapari sooreera ni waapaka awiixutti, waahela muhina aSamariya. (Mit. 8:1-13) Muhoolo mwaya, ihapari sooreera yaahilaleeriwa atthu yahinnuwihiwe, niire so, atthu ale yahaakhanle aYuda. (Mit. 10:1-48) Muteko owo woolaleerya waahiwiiriha atthu anceene okhala maKristau ni opakiwa miloko sinceene mipantta sikina ohiya paahi oYerusalemu.—Mit. 11:19-21; 14:21-23.

⁸ Itthu xeeni saapakiwe wira miloko iye isya sikhale sootthokiheya ni seettihiweke ntoko Muluku oniphavela awe? Akhaliheriwaka ni munepa wowaarya wa Muluku, yaahithanliwa atthu wira akhapeleleke ipwittipwitthi sa Muluku. Okathi Paulo ni Baarnaba yaaxukurya aya miloko iyo ekwaha aya yoopacerya ya omisionaario, yaahaathanla axitokweene. (Mit. 14:23) Mulipa oomulepa Biibiliya Luka, onnihimya muthukumano murummwa Paulo aapanke awe ni axitokweene a muloko wa wEefeso. Paulo aahaaleela axitokweene ale wira: ‘Mwipasopeke mmansinyu, mwakhapeleleke aKristu othene eroho yowarya yovahalyayani wasuka, ntoko amakampusi, wira mwettiheke sana . . . [muloko wa] Muluku, yowo oìthukumanyenryawe n’ukhwa wa Mwan’awe mmosene’. (Mit. 20:17, 28) Awo yaaniphwanela okhala axitokweene, mwaha woowi yaahikhalana mikhalelo sinivekeliwa mBiibiliyani. (1 Tim. 3:1-7) Nave Tito, yoowo aavara muteko ni Paulo, aaheemereriwa waathanla axitokweene muloko wa oKereta.—Tito 1:5.

⁹ Vaavo miloko sancerereya aya, arummwa ni axitokweene oYerusalemu, khiyaahiyale okhala makhulupale a muloko wa eKristau wa eseekulu yoopacerya, yoowo waamwarenle ilapo sinceene. Tthiri arummwa ni axitokweene ale, ti yaari nikhuuru noolamulela na okathi ole.

¹⁰ Okathi aalepenle awe muloko wa wEefeso, murummwa Paulo aahitthokiherya wira waamukhala wiiraana mmulokoni akhala wira atthu yaanivara moovarihana ni munepa wowaarya wa Muluku ni yaanitthara moororomeleya, ohoolela wa Yesu Kristu. Paulo aahaatumererya maKristau ale okhala oowiiyeviha, wiimananiha “wiwanana omosaru” yaavahiwa aya ni munepa wa Muluku ni okhalana murettele ni atthu akina a mmulokoni. (aÉf. 4:1-6) Nuumala-vo, Paulo aahilavula Esalimo 68:19, ooniherya moota Yehova onnivaha awe alopwana oophwanelela wira akhapeleleke muloko ntoko arummwa, maprofeta, anamalaleerya, amakampusi ni awiixuttihi. Alopwana awo oomunepani ari ntoko soovaha sa Yehova, maana yaarowa olipihaka muloko momunepani mwa enamuna enimusivela Yehova.—aÉf. 4:7-16.

OLELO-VA MILOKO SINNITTHARA NTAKIHERYO NA OKATHI WA ARUMMWA

¹¹ Olelo-va, miloko sa Anamoona a Yehova sinnitthara ntakiheryo nimosaru na okathi wa arummwa. Otheene aya aniirela mpantta muloko wowiiraana wa olumwenku wotheene yoowo ale a ipwittipwitthi sikina anaakhaliherya aya ale oothanliwa. (Zak. 8:23) Nto Yesu Kristu tonipaka itthu sotheene wira eyo yiiraneye. Owo aahileiherya wira aarowa okhalaka ni onnikhala ni awiixutti awe oothanliwa “mahiku othene, mpakha elapo omala”. Atthu aniirela mpantta muloko, anneemererya ihapari sooreera sa Muluku, anniivahererya wa Yehova ni annipatisiwa wira akhale atthareli a Yesu. (Math. 28:19, 20; Mar. 1:14; Mit. 2:41) Awo annisuwela wira “makampusi òrera murima” Yesu Kristu tori muhooleli a ipwittipwitthi sa Muluku, seiyo sinihela muhina maKristau oothanliwa ni “ipwittipwitthi sikina”. (Yoh. 10:14, 16; aÉf. 1:22, 23) Sotheene iyo siri “nikoto nimosa” ni ti sowiiraana mwaha woowi sinnisuwela ohoolela wa Kristu ni “murumeyi òroromeleya ni ànkhili”, yoowo Kristu omuthanlale awe wira okhapeleleke mutthenkeso. Muhihiye omuroromela ni murima wotheene murumeyi ororomeleya ni ankhili.—Math. 24:45.

MUTEKO WA MITTHENKESO SA MALAMULO

¹² Wira ekumiheriweke yoolya ya omunepani okathi wooreerela ni otthokiha muteko woolaleya ihapari sooreera sa Omwene ohinatthi ophiya wanikisa, soopakiwa mitthenkeso sa malamulo. Mitthenkeso iyo sa malamulo sinneemereriwa ni malamulo a ilapo sinceene ni sinnivarihana ni sikina. Iyo sinninikhaliherya olaleya ihapari sooreera olumwenku wotheene.

MOOTA IFILIYAALI SITTHOKIHIWE AYA

¹³ Okathi enipakiwa aya efiliyaali, ennipakiwa Ekomisau ya Efiliyaali enikhalana axitokweene araru wala ovikana wira akhapelele muteko woolaleerya elapo eyo wala ilapo sikina anikhapelela aya. Munna mmosa a ekomisau eyo, onnithanliwa wira okhale kordenadore a Ekomisau ya Efiliyaali.

¹⁴ Vano miloko sa efiliyaali eyo, sinnitthokihiwa wira sikhale isirkwiitu. Munnuwelo wa isirkwiitu, sinnivirikana moovarihana ni makhalelo a mapuro awo, nttaava ninlavuliwa ni miloko sikhanle efiliyaali eyo. Onnithanliwa mutokweene wira okhale mutokweene a esirkwiitu eyo. Nto okathi mukina, efiliyaali enninvaha malakiheryo mutokweene a esirkwiitu wira ovareke saana muteko awe.

¹⁵ Miloko sotheene sinnisuwela wira malakiheryo anikumiheriwa mmutthenkesoni annaaphwanyiha mireerelo. Nto anneemererya othanliwa axitokweene yaawo anihoolela muteko wa efiliyaali, esirkwiitu ni mmilokoni. Awo annilipelela ovahiwa yoolya ya omunepani enikumiheriwa ni murumeyi ororomeleya ni ankhili. Olelo-va, murumeyi oororomeleya ni ankhili, onnitthara ohoolela wa Kristu, ovarexexa malakiheryo a mBiibiliyani ni onneemererya olakiheriwa ni munepa wowaarya wa Muluku. Vaavo otheene ahu ninvara ahu mowiiraana ninniphwanya mireerelo ntoko maKristau a eseekulu yoopacerya yaaphwannye aya. Maana Biibiliya onihimya wira: “[Miloko] s’aKristu sanlipiherya wamini: atthu òwamini yaninjerereya nihiku ti níhiku”.—Mit. 16:5.