Mapuro Nimmukokhorela Ahu Yehova

ALE animukokhorela Yehova mwekeekhai annisuwela wira aarummwa othukumana wira alipihaneke mukina ni mukhwaawe. (aHéb. 10:23-25) Nipuro noopacerya na okokhorela wa atthu yaathanliwe ni Muluku, eyo piiyo, aIsarayeli yaari etabernaakulu wala “ehema y’okumana”. (Okhum. 39:32, 40) Muhoolo mwaya, mwanawe Davidi iihaniwa Salomoni aahiteka etemplo yanvuwiha Muluku. (1 Mam. 9:3) Nuumala opwetexiwa etemplo mwaakha wa 607 ohinatthi Kristu orwa, aYuda yaanithukumana wira amukokhoreleke Muluku mapuro yaasuweliwa okhala esinagoga. Nuuvira okathi, yaahitthikela otekiwa etemplo, nave naari nipuro na okokhorela wekeekhai. Yesu aahiwiixuttiha atthu musinagoga ni mutemplo. (Luka 4:16; Yoh. 18:20) Nave aahipaka muthukumano omwaako.—Math. 5:1–7:29.

² Nuumala Yesu wiiviwa, maKristau yaanithukumana mapuro oowaatta atthu ni ipa sa anna akina wira awiixuttiheke atthu Soolempwa ni othukumana ni maKristau makina. (Mit. 19:8, 9; aRom. 16:3, 5; aKol. 4:15; Fil. 2) Okathi mukina, maKristau yaanithukumana mapuro owiipitheya wira ahivariwe ni awanani aya. Tthiri, arumeyi oororomeleya a Muluku a khalai yaaniphavela ni murima wotheene othukumana wira amukokhoreleke ni ‘yixuttihiweke’ ni Yehova.—Yes. 54:13.

³ Nave olelo-va, annirumeeliwa mapuro oowaatta atthu ni ipa sa atthu akina wira sipakiwe mithukumano sa eKristau. Ikwaha sinceene, ipa sa anna sinnirumeeliwa wira sipakiwe mithukumano sa orowa olaleerya. Ale aniivahererya wira owannyeya sipakiweke mithukumano iyo annoona okhala eparakha yuulupale. Anamunceene a yaawo annikhalana eparakha ya okhaliherya miteko sa Yehova vaavo aneemererya aya wira owannyeya sipakiweke mithukumano soorowa olaleerya.

EMPA YA OMWENE

⁴ Mithukumano sinceene sa Anamoona a Yehova sinipakiwa Empa ya Omwene. Okhala wene ninnithummwa nipuro wira etekiwe Empa ya Omwene wala sinnilokiheriwa ipa sinithummwa. Nto wira ohirumeeliweke musurukhu munceene sinnirumeeliwa oratteene ipa ni ipreetiyu sahu. Mwa ntakiheryo, vaareerelaka miloko sinceene pooti orumeela Empa emosaru ya Omwene. Ilapo wala mittetthe sikina, ti vooloka waalukari mapuro wira nipake mithukumano sahu. Vaavo sinitekiwa aya Ipa sa Omwene wala sinilokiheriwa aya onnipakiwa muthukumano wa ovahererya Ipa iyo wa Muluku. Masi, akhala wira sinilokiheriwa itthu vakhaani paahi Empa eyo ya Omwene, khivanitthuneya opaka mwaha wa ovahererya wa Muluku.

⁵ Khivanitthuneya oteka Ipa sa Omwene suulupalexa wala sooreerexa wira atthu athamaleke. Hata ipa iyo sivirikanaka moovarihana ni opuro, sihaana okhala sookhalela. (Mit. 17:24) Moovarihana ni makhalelo a mapuro awo, empa eyo ehaana okhala opuro wooreera opaka mithukumano.

⁶ Miloko sotheene sa Anamoona a Yehova sinnikhaliherya wira sirumeeliweke saana, olokiheriwa ni oratteliwa oratteene Ipa sa Omwene. Ipa sotheene sa Omwene khenivirihiwa eparatho wala ephace ovekeliwaka musurukhu. Masi sookhala ikaaxa sa misonkheryo wira ale anirweela mithukumano aheleke musurukhu aya wira elokiheriweke ni oratteliwa empa eyo ya Omwene. Awo annipaka eyo voohikhanyereriwa, masi ni murima aya wotheene.—2 aKor. 9:7.

⁷ Anna otheene annoona okhala eparakha yuulupale ovaha musurukhu aya wira akhaliherye muloko ni okhaliherya miteko sikina wira Empa ya Omwene ekhaleke yooloka ni yooratteliwa saana. Nto mutokweene wala murumeyi oorumeela onnithanliwa wira opakeke eprokrama ya oratteliwa ni ovariwa miteko sikina sa Empa ya Omwene. Okhala wene ikrupu sa muteko woolaleerya ti sinkwesa ni orattela empa ya Omwene ahooleliwaka ni muhooleli a ekrupu wala namakhaliherya awe. Muhina ni ota wa Empa ya Omwene ehaana onvuwiha Yehova ni mutthenkeso awe.

⁸ Akhala wira Empa ya Omwene sinnithukumana miloko miili wala ovikana, axitokweene a miloko iyo ahaana opaka Ekomisau ya Manutensau ya Empa ya Omwene wira evarihaneke moota woorattela ni olokiherya. Makhuuru otheene a axitokweene awo ahaana omuthanla munna mmosa wira uuraanyiheke ekomisau eyo. Ehooleliwaka ni makhuuru a axitokweene, Ekomisau ya Manutensau ya Empa ya Omwene enniweha-weha moota eniratteliwa aya ni olokiheriwa Empa ya Omwene ni ehaana osuwela akhala wira sookhala ikaruma sinceene wira ovariwe muteko owo. Nto miloko sotheene sihaana wiiwanana ni ovarihana saana.

⁹ Akhala wira miloko sinceene sinirumeela Empa emosaru ya Omwene, woonasa wene sihaana opaka eprokrama ya mithukumano ni ehaana oturuka khula mwaakha. Axitokweene anoopaka eprokrama eyo ahelaka soophavela sa atthu akina nipuro noopacerya ni ophentana ntoko axinna. (aFil. 2:2-4; 1 Ped. 3:8) Khuuvo muloko oneemereriwa opaka soothanla mwa nsina na miloko sikina. Okathi mutokweene a esirkwiitu onixukurya awe muloko mmosa, miloko sikina sinirumeela Empa Eyo ya Omwene sihaana oturuka mahiku ni okathi wa mithukumano esumana eyo onixukurya awe mutokweene a esirkwiitu.

¹⁰ Ipa sa Omwene pooti orumeeliwa wira sipakiwe myaha sa ekasamento ni sa naakhwa. Masi sihaana opakiwa nuumala weemereriwa ni Ekomisau ya Muteko ya Muloko. Nto axitokweene awo ahaana ovarerya saana yooveka eyo ni opaka yoothanla attharaka malakiheryo anivahiwa aya ni eBetheli.

¹¹ Ale aneemereriwa orumeela Ipa sa Omwene ahaana okhalana mweettelo wooloka onivarihana ni maKristau eekeekhai. Ehipakiwe etthu nnakhala emosa Empa ya Omwene enrowa waakhumuliha anna akina wala enrowa omunyoholiha Yehova vamosa ni muloko. (aFil. 2:14, 15) Attharaka malakiheryo anvahiwa aya ni eBetheli, Empa ya Omwene pooti orumeeliwa wira sipakiwe miteko sikina sa omunepani, ntoko Exikola ya Orummwa wa Omwene ni Exikola ya Mapioneero.

¹² Okathi wotheene muloko ohaana ottittimiha oratteene mapuro nimpaka ahu mithukumano. Enamuna ninwara ahu ni wiitthokiha ehaana wooniherya wira nimmukokhorela Yehova. (Mus. 4:17; 1 Tim. 2:9, 10) Okathi ninvarihela ahu muteko malakiheryo, ninnooniherya wira ninnixukhurela mithukumano sahu.

¹³ Ti vooloka okhala oowiiraana ni oowiiwanana okathi wa mithukumano. Nto anamwane aahaana okilaathi ni anamuyari aya. Anamuyari arina anamwane acikhaani aahaana otumereriwa okilaathi mapuro ahinrowa aya otepaka owaakanyerya atthu akina akhala wira animwaakumiherya ota anaaya wira yaamaalihe wala waakhapelela.

¹⁴ Anna oophwanelela annithanliwa wira akhale anamathoonyerya okathi wa mithukumano Empa ya Omwene. Awo ahaana okhala oowehaweha ni oopatthaneya. Muteko wa anamathoonyerya onihela muhina owaakhela ale annixukurya, waavaha opuro ale anipisa ophiya, waakontari alipa oowiriyana ni ohula ixanela ni itthu sikina wira ekeleke epheyo. Vaareerelaka, anamathoonyerya pooti owuupuxerya anamuyari wira ahaana waakhapelela anaaya wira ahitthimakeke wala othweela opalkuni sihinatthi ni nuumala mithukumano. Akhala wira mwaana onninyakula, mooreerela murima namathoonyerya pooti onvekela paapa wala maama awe omukumiherya ota wira ohiwaakanyerye alipa-oowiriyana. Muteko wa anamathoonyerya onnikhaliherya vanceene wira atthu otheene attottele mureerelo mithukumano. Ti vooloka waarumeela axitokweene ni arumeyi oorumeela wira akhale anamathoonyerya.

OTEKA IPA SA OMWENE

¹⁵ Eseekulu yoopacerya, maKristau makina yaahikhalana itthu sinceene sa weerutthuni. Nto, murummwa Paulo aahaalepela wira: “Okathi ula, oruwerya wanyu onokhaliherya othoiwa waya. Nihiku nikina, awo yaruweryá, nyuwo muthoiwá, awo animokhaliheryani. Siso, muntthuna olikanaka othene”. (2 aKor. 8:14) Olelo-va, enniiraneya etthu emosaru. Misonkheryo sa miloko sotheene olumwenku wotheene sinnirumeeliwa wira sitekiwe wala olokiheriwa Ipa sa Omwene. Otheene ahu ohela muhina mutthenkeso ni miloko sinittottela mureerelo musurukhu owo onisonkheriwa ni ninnixukhurela vanceene.

¹⁶ Moovarihana ni mikhalelo ntoko makhalelo a muttetthe owo, eBetheli ennithanla miloko sinrowa orumeelaka Empa emosaru ya Omwene. Nave eBetheli tenithanla opuro ni okathi wooteka ni olokiherya Ipa sa Omwene sa efiliyaali aya. Nto okathi sinikhumelela aya ihasara sa ephattu, annipakiwa mareheryo wira silokiheriwe Ipa sa Omwene ni ipa sa anna siphweeyale, moovarihana ni makhalelo aya.

¹⁷ EBetheli enivara vamosa ni anamakhaliherya wira athumeke ipa, wunnuuherya miteko sa oteka Ipa sa Omwene, olokiherya idukumento sa oteka ni olokiherya ipa sinirumeeliwa ni mutthenkeso. Okhala wira ilapo sinceene vannireerela otekiwa ipa sinceene sa Omwene, anniphaveliwa anna anceene oowiivahererya. Nto anamalaleerya otheene oopatisiwa arina mweettelo wooloka annitumereriwa olepa ipetisau ni ovahererya Ekomisau ya Muteko ya Muloko aya. Nave anamalaleerya oohipatisiwa pooti okhaliherya oteka wala olokiherya Empa ya Omwene anithukumana aya.

ISALAU SA ASEMBELEYA

¹⁸ MaKristau a eseekulu yoopacerya yaathukumana ikrupu saamukhaani. Masi okathi mukina yaanithukumana “atthu anjene”. (Mit. 11:26) Mwa enamuna emosaru, atthu a Yehova olelo-va annipaka mithukumano suulupale nniihana ahu okhala asembeleya a esirkwiitu ni akonkresu. Ilapo sinceene aakhala mapuro ninthukumana ahu wira nipake mithukumano iyo. Mittetthe sikina annithummwa mapuro wira etekiwe Esalau ya Asembeleya.

¹⁹ Okathi mukina ennithummwa empa enalokiheriwa wira ekhale Esalau ya Asembeleya. Masi ikwaha sinceene, ninthummwa nipuro enatekiwa esalau. Munnuwelo wa Isalau sa Asembeleya sinnivirikana moovarihana ni makhalelo a mapuro awo. EBetheli enithuma paahi nipuro wira etekiwe esalau enrowa orumeeliwaka okathi wa asembeleya ni konkresu nuumala oweha musurukhu ni ikwaha enrowa aya orumeeliwaka vamwaakhani.

²⁰ EBetheli ennaathanla anna wira akhapeleleke ni alokiheryeke Esalau ya Asembeleya. Nave khula myeeri 6 miloko sa esirkwiitu sihaana orowa okwesa, orattela ni olokiherya oratteene mapuro awo. Anna ale aniivahererya annittottela mureerelo ovara muteko owo. Nto miloko sinnitumereriwa okhaliherya ni murima wotheene.—Esal. 110:3; Mal. 1:10.

²¹ Okathi mukina, Esalau ya Asembeleya ennirumeeliwa wira sipakiwe mithukumano sikina, ntoko Ixikola sa Omwene, mithukumano sa vameekhaaya ni axitokweene a mmulokoni, a esirkwiitu eyo wala mithukumano sa axitokweene a esirkwiitu. Ntoko siisaale Ipa sa Omwene, Isalau sa asembeleya sinnivahereriwa wira sirumeeliweke okokhorela wekeekhai. Okathi ninthukumana ahu Empa ya Asembeleya, mweettelo ahu, moota ninwara ahu ni wiitthokiha wahu ohaana okhala wooloka, ntoko siisaale ninwara ahu naarowaka Empa ya Omwene muloko ahu.

²² Mahiku ala ookiserya, atthu anceene annikela mmutthenkesoni mwa Muluku. Eyo ennooniherya wira ninnireelihiwa ni Yehova. (Yes. 60:8, 10, 11, 22) Nto, nihaana okhaliherya miteko sotheene sinivarihana ni mapuro ahu a okokhorela wira akhaleke ooloka, ooratteleya ni ookhapeleliwa saana. Opaka eyo, ninnooniherya wira ninnixukhurela vanceene mapuro awo, maana anninikhaliherya olipihana mukina ni mukhwaawe ni otepa okhalana waataana wooloka ni Yehova khula nihiku.