Mukhaliheryeke Miteko Sa Omwene Elapo Anyu ni Olumwenku Wotheene

OKHALA WIRA enniiraneya eprofesia ya Yesu voohimya sa mahiku ookiserya, Anamoona a Yehova annilaleya ihapari sooreera “mpakha omalenle elapo”. (Mit. 1:8; Math. 24:14) Wira apake eyo, annivaha vootthuna vaya ikuru ni okathi aya wira yaaleeleke myaha sa mBiibiliyani atthu akina. Okhala wira annikupali wira Yehova onimwaakhaliherya ale anivara muteko awe, awo annihela nipuro noopacerya mookumini mwaya Omwene wa Muluku. (Math. 6:25-34; 1 aKor. 3:5-9) Sookhumelela saya sinnooniherya wira ninnireelihiwa ni Yehova.

ONIKHAPELELIWA SAI MUTEKO WA OMWENE OLUMWENKU WOTHEENE?

² Vaavo atthu akina anniweha aya naavahaka atthu mahala Biibiliya ni iliivuru sinimutthokiherya Biibiliya, awo anniikoha so: “Vaniweryaneya sai?” Ekeekhai wira ohaana okhala musurukhu wira naapake aBiibiliya ni iliivuru sinimutthokiherya Biibiliya. Nave onitthuneya musurukhu wira niteke ni olokiherya iBetheli, waakhapelela anna ni arokora anirumeela mapuro awo, ntoko ovara ni impresoora suulupale, okhapelela muteko wa olaleya ihapari sooreera ni ovara miteko sikina ninnikhaliherya olaleya ihapari sooreera. Ohiya-vo, axitokweene a esirkwiitu, mamisionaario, mapioneero a vameekhaaya ni ale anivara muteko wa Muluku wa okathi wotheene aahaana okhaliheriwa avahiwaka musurukhu wira avikaniheke ovara muteko aya. Eyo ennooniherya wira muteko wa olaleya ihapari sooreera olelo-va, ekhale elapo ninkhala ahu ni olumwenku wotheene onihela muhina musurukhu munceene. Nto musurukhu wotheene onikhuma woowi?

³ Atthu anceene anisiveliwa muteko wa Anamoona a Yehova wa owiixuttiha atthu Biibiliya, onnaasivela ovaha musurukhu aya wira akhaliherye muteko owo onivariwa olumwenku wotheene. Masi mpantta muulupale wa musurukhu owo, onivahiwa ni Anamoona a Yehova. Nto Anamoona akina anniroiha soovaha saya eBetheli ya elapo aya. Awo annooniherya mukhalelo mmosaru wa arumeyi a Yehova a khalai, yaawo yaakhalihenrye oteka nipuro aakokhoreliwa awe Yehova. (Okhum. 35:20-29; 1 Wah. 29:9) Soovaha sikina sinikhala mireerelo mutthu onihimya awe wira nuumala okhwa sinrowa okhala sa mutthenkeso. Soovaha sikina ti sa mutthu mwaneene, mmilokoni ni isirkwiitu, nto soovaha iyo sinikhala vakhaani. Okathi sintakaaheriwa aya, sinnikhaliherya okeleliha ohoolo muteko wa Muluku.

⁴ Anamoona a Yehova annisuwela wira eparakha yuulupale orumeela musurukhu ni mireerelo saya wira akhaliherye muteko woolaleerya. Yesu ni awiixutti awe yaahikhalana ekaaxa ya misonkheryo, eyo enooniherya wira yaaneemererya misonkheryo wira aliverye itthu yaathuma aya. (Yoh. 13:29) Biibiliya onnaahimya athiyana yaamukhalihenrye Yesu ni awiixutti awe. (Mar. 15:40, 41; Luka 8:3) Nave murummwa Paulo aaneemererya itthu sa werutthuni aavahiwa awe ni atthu ale yaaphavela okhaliherya muteko woolaleya ihapari sooreera. (aFil. 4:14-16; 1 aTes. 2:9) Nto Anamoona a Yehova annitthara ntakiheryo na oluttuweliwa ni ovaha na anna awo. Opaka eyo ennaakhaliherya waavaha mahala ale “amphavela màsi èkumi”.—Wis. 22:17.

ONIKHUMA WOOWI MUSURUKHU ONLIVERIWA ITTHU SA MMULOKONI?

⁵ Itthu sotheene sa mmulokoni siniliveriwa ni soovaha sa anna a muloko yoowo. Khonivekeliwa musurukhu, khenihimmwa evalore ya musurukhu mutthu okhanle awe oovaha. Masi mapuro ootheene ninthukumana ahu, sinnikhala ikaaxa wira khula mutthu ovaheke “attharihaka murim’awe”.—2 aKor. 9:7.

⁶ Musurukhu ninvaha ahu onirumeeliwa wira siliveriwe itthu sa muloko owo wala oratteliwa ni olokiheriwa Empa ya Omwene. Nikhuuru na axitokweene ninnithanla musurukhu okhanle ooroihiwa efiliyaali ya Anamoona a Yehova a elapo eyo wala okhaliherya muteko wa olumwenku wotheene. Eyo ennipakiwa moovarihana ni eresolusau ya anna otheene a mmulokoni. Opaka eyo ennikhaliherya wira miloko sinceene sivaheke musurukhu onikhaliherya muteko ahu wa olumwenku wotheene. Akhala wira atthu otheene anniweha itthu sinireerela oliveriwa okathi ti okathi, khivanrowa otthuneyaka opakiwa ikwaha sinceene soohimmwa voohimya sa ovaha musurukhu.

ONIRUMEELIWA SAI MUSURUKHU NINVAHA AHU?

⁷ Nuumala khula muthukumano, anna anli annikumiha musurukhu wotheene oheliwe mukaaxani ni annilepa musurukhu wotheene ovahiwe. (2 Mam. 12:9, 10; 2 aKor. 8:20) Nikhuuru na axitokweene ninnikhapelela oratteene musurukhu owo mpakha oroihiwa ofiliyaali wala orumeeliwa mmulokoni. Khula mweeri munna onikhapelela musurukhu onnipaka erelatoorio wira atthu otheene mmulokoni asuweleke. Nave khula myeeri miraru, mutokweene oniiraaniha nikhuuru na axitokweene onoopaka mareheryo a ikontha sotheene sa muloko.

MUSURUKHU WA ESIRKWIITU

⁸ Itthu sotheene sa asembeleya ni itthu sikina sa esirkwiitu, siniliveriwa ni soovaha sa Anamoona a Yehova a esirkwiitu eyo. Mapuro anipakiwa asembeleya sinnikhala ikaaxa wira atthu avaheke musurukhu aya wira akhaliherye miteko sa esirkwiitu. Ohiya-vo, wira siliveriwe itthu sikina sinikhumelela okathi ti okathi, miloko pooti ovaha misonkheryo saya okathi mukina.

⁹ Khula esirkwiitu ehaana oliverya itthu sotheene sa esirkwiitu eyo, nto musurukhu onihala ohaana ovahiwa wira okhaliheriwe muteko ahu wa olumwenku wotheene. Waahikhale musurukhu onrowa ophiyerya oliverya itthu sotheene sa asembeleya wala itthu sinrowa othummwa wanipacerya wa asembeleya onittharelana, mutokweene a esirkwiitu pooti olepela miloko sa esirkwiitu wira anna avaheke musurukhu aya. Nikhuuru na axitokweene nihaana othokorerya oratteene mwaha ola ni oweha musurukhu muloko onrowa awe ovaha wira okhaliherye esirkwiitu. Nuumala-vo anoohimya yoothanla aya epakiwaka eresolusau.

¹⁰ Akhala wira wookhala mwaha onivarihana ni musurukhu onireerela othokoreriwa ni axitokweene a esirkwiitu, ohaana opakiwa muthukumano ni axitokweene otheene nuumala asembeleya. Soothanla sotheene sihinivarihana ni itthu sinimakela oliveriwa ni esirkwiitu, sihaana weemereriwa ni axitokweene a esirkwiitu apakaka eresolusau. Khula okathi enikhumelela aya etthu ntoko eyo, ehaana opakiwa eresolusau ni axitokweene otheene a esirkwiitu eyo. Iresolusau iyo sihaana olempwa musurukhu oniphaveliwa.

¹¹ Ohaana opakiwa autitoria a ikontha sa esirkwiitu.

WAAKHAPELELA ATTHU OOHAAWA

¹² Yoolakela ekina ya musurukhu waaheliwa ekaaxa yaarumeeliwa ni Yesu ni arummwa awe waari waakhaliherya atthu oohaawa. (Mar. 14:3-5; Yoh. 13:29) Nave olelo-va, maKristau ahaana waakhapelela atthu ohaawa, maana Yesu aahimmye so: “Alipa-òhawa munokhalana eriyari anyu mahiku othene”. (Mar. 14:7) Olelo-va, Anamoona a Yehova anaakhaliherya sai atthu oohaawa?

¹³ Okathi mukina, anna ni arokora oororomeleya anniphavela okhaliheriwa avahiwaka itthu sa werutthuni, mwaha woowi ahuuluvala, anoowereiwa wala mwaha wa mixankiho sikina arina aya. Eyo yiiraneya vale, amusi, anamuyari ni atthu akina anisuwela muxankiho owo, pooti wira animwaakhaliherya. Eyo ennivarihana ni moolumo a murummwa Yohani ani: “Akhala mutthu ohinthoiwa muhakhu wa vathí-va, amona munn’awe òthoiwa, khùmiha murim’awe, khuhinvaha etthu, onwerya sai ohimya wira: ‘Miyo kinnimphenta Muluku?’ an’aka òphentiwa: nihimphenté mukhw’ihu ni molumo òrera pahi: ophentana wahu okhaleke w’ekekhai, woneyeke ni miteko sahu”. (1 Yoh. 3:17, 18; 2 aTes. 3:6-12) Okokhorela wekeekhai onihela muhina waakhaliherya anna ni arokora oororomeleya oothoiwa.—Yak. 1:27; 2:14-17.

¹⁴ Ewarakha yoopacerya aamulepenle awe Timootheyo, murummwa Paulo aahihimya moota akhanle aya ookhaliheriwa ale oothoiwa mwa enamuna ya weerutthuni. Nyuwo pooti osoma malakiheryo awo 1 Timótheyo 5:3-21. Khula muKristau torina muritti wa omukhaliherya khula mutthu oothoiwa a emusi awe. Atthu oowuuluvala ni aniwereiwa ahaana okhaliheriwa ni anaaya, axisulu aya aahiiso ni amusi aya akina. Ikwaha sikina pooti okhaliheriwa ni kuvernu. Nto mwa enamuna eyo, amusi ni atthu akina pooti omukhaliherya mutthu owo wira owerye okhaliheriwa ni kuvernu. Nave ikwaha sikina pooti oreerelaka muloko wotheene oweha mukhalelo wa munna wala murokora opacenrye khalai omurumeela Yehova moororomeleya wira amukhaliherye. Nto aahikhalane mmusi wala mutthu mukina onimuroromela awe, wala kuvernu wira omukhaliherye, nikhuuru na axitokweene pooti opaka mareheryo wira amukhaliherye. Makristau annoona okhala eparakha waakhaliherya atthu oothoiwa.

¹⁵ Anna ni arokora akina annithoiwa itthu sa werutthuni mwaha wa olupatthiwa, ekhotto, itetere, osareya wa maasi, etala ni ihasara sikina sa ephattu sinikhumelela mahiku ala ookiserya. (Math. 24:7-9) Woonasa wene, miloko sa mapuro awo khasinwerya waakhaliherya anna, nto akhaliheriwaka ni anna ni arokora a mapuro makina, Nikhuuru Noolamulela ninnaakhaliherya anna ni arokora awo oothoiwa. Eyo ti etthu yaapanke aya maKristau a wÁsia Menor, yaawo yaavanhe yoolya anna oYudeya okathi wa etala. (1 aKor. 16:1-4; 2 aKor. 9:1-5) Akhala wira nnootthara ntakiheryo naya, nnimooniherya waaphenta wahu anna ni nnimooniherya wira na atthareli eekeekhai a Yesu Kristu.—Yoh. 13:35.

OKAWA ILIIVURU

¹⁶ Iliivuru sinimutthokiherya Biibiliya, sinninikhaliherya vanceene olaleya ihapari sooreera sa Omwene. Okhala wene, murumeyi oorumeela onnithanliwa ni nikhuuru na axitokweene wira okhapeleleke iliivuru. Nto anna anithanliwa wira avareke muteko owo, annivara ni murima aya wotheene. Awo annilepa oratteene iliivuru sikhanle, wira sikhale iliivuru siniphiyerya muloko wotheene.

¹⁷ Okhala wira na maKristau eekeekhai ninnisuwela wira okathi, itthu ninsuwela ahu, ikuru sahu, muupuwelo ahu, itthu sa werutthuni nrina ahu ni okumi ahu yoovaha ya Muluku, nto oniphavela wira nirumeeleke itthu iyo wira nivareke muteko awe. (Luka 17:10; 1 aKor. 4:7) Orumeela oratteene mireerelo sahu, ninnooniherya wira ninnimphenta Yehova. Nto nimphavela onvuwiha Yehova ni itthu sa faita nrina ahu, nisuwelaka wira khula etthu nninvaha ahu ni murima wotheene ennimuhakalaliha vanceene Yehova. (Mir. 3:9; Mar. 14:3-9; Luka 21:1-4; aKol. 3:23, 24) Yesu aahimmye so: “Ntoko sivahiwanyu mahala, siso-tho nvaheke mahala”. (Math. 10:8) Ninnihakalala vanceene vaavo ninrumeela ahu ekumi ahu ni mireerelo sahu wira nivare muteko wa Yehova.—Mit. 20:35.