“Mwireke Sothene Vonvuwiha Muluku”

OKHALA wira na arumeyi a Muluku, okathi wotheene nihaana wooniherya ovuwa wa Muluku ni moolumo ni miteko sahu. Murummwa Paulo oonivaha malakiheryo anrowa onikhaliherya vaavo aahimmye awe so: “Mwalyaka walá mwawuryaka, nnákhala mwiraka etthu p’itthu, mwireke sothene vonvuwiha Muluku”. (1 aKor. 10:31) Eyo enihela muhina weettela malakiheryo a xariya a Yehova, yaawo anooniherya omutthu awe woomalela. (aKol. 3:10) Nihaana omutakiha Muluku nikhalaka atthu oowaarya.—aÉf. 5:1, 2.

² Owuupuxeryaka maKristau, murummwa Pedru aalempe so: “Ntoko anamwane òwìwelela, muhetteleké-tho makhalelo anyu òtakhala, yettenlyanyu khalai, okathi wahamusuwelanyu Muluku. Ohiya-vo, mukhaleke atthu òrera murima ni mwettelo anyu wothene, okhala wira Muluku òwìhanneni, t’òrera murima. Tthiri, volempwa wira: ‘Mukhaleke atthu òwarya, okhala wira miyo k’òwarya’”. (1 Ped. 1:14-16) Ntoko aIsarayeli a khalai, maKristau otheene a mmulokoni ahaana okhala oowaarya. Eyo enooniherya wira nihaana okhalana mweettelo wooloka, niire so, nihaana okhootta etampi ni mweettelo woohiloka wa olumwenku ola. Niira siiso, ninrowa onvarelaka muteko woowaarya Muluku.—Okhum. 20:5.

³ Ninnikhala oowaarya vaavo nniiwelela ahu malamulo ni malakiheryo a Yehova, yaawo ari mBiibiliyani. (2 Tim. 3:16) Okathi naamusoma ahu Biibiliya, nihiixutta voohimya sa Yehova ni malamulo awe. Nto eyo yoonikhaliherya waataana ni yoowo. Yoosoma eyo yoonikhaliherya opaceriha Omwene wa Muluku mookumini mwahu ni ninnivaha efaita yinceene opaka yootthuna ya Muluku mookumini mwahu. (Math. 6:33; aRom. 12:2) Wira nipake eyo, nihaana owara omutthu wa niinaano.—aÉf. 4:22-24.

OKHALA OOLOKA MOMUNEPANI NI WERUTTHUNI

⁴ Khivanikhweya okathi wotheene wiiwelela malamulo a Yehova. Maana nwanani ahu Satana Diabo, oniphavela onihapuxa wira niheetteleke ekeekhai. Nave ohimalela wahu ni olumwenku ola wootakhala onniniiriha woonaka ovila otthara malamulo a Yehova. Tthiri wira nikhaleke moovarihana ni wiivahererya wahu, onitthuneya owana ekhotto ya omunepani. Nto okathi nneehereriwa ahu ni ninlupatthiwa ahu hiyo khanintepa oxanka, maana Biibiliya onnihimya eyo. Moohaanyiherya hiyo ninnihaawa mwaha woweettela exariya. (2 Tim. 3:12) Nto nihaana ohakalala okathi nneehereriwa ahu, maana eyo enooniherya wira ninnipaka yootthuna ya Muluku.—1 Ped. 3:14-16; 4:12, 14-16.

⁵ Nnaamwi Yesu aari mutthu oomalela, owo aahiixutta omwiiwelela Muluku hata ohaawaka. Owo khonamorele muraakho a soweeha sa Satana ni soophavela soohiloka sa olumwenku ola. (Math. 4:1-11; Yoh. 6:15) Yesu khonuupuwele ohiya ororomeleya wawe. Hata aanyokhiwa mwaha wa ororomeleya wawe, Yesu aahivikaniha weettela malamulo a xariya a Yehova. Okathi vakhaani ohinatthi wiiviwa, Yesu aahaalopola awiixutti awe wira olumwenku waamwaanyokha. Okhuma okathi ole, atthareli awe annihaawa vanceene, masi osuwela wira Mwaana a Muluku ooxintta olumwenku, onnaakhaliherya olipa murima.—Yoh. 15:19; 16:33; 17:16.

⁶ Wira nisyake wiirela mpantta olumwenku, nihaana waakiherya malamulo a xariya a Yehova ntoko Pwiya ahu Yesu iira awe. Ohiya paahi ohiirela mpantta myaha sa epoliitika ni myaha sa mmuttettheni, nihaana okhootta mweettelo woohiloka wa olumwenku ola. Tthiri nihaana weettela moolumo ari Yakobo 1:21 ani: “Murule makhalelo othene ònanara ni sotakhala sothene. Mwakhelele ni wiyeviha masu Muluku onàlawe mmurimani mwanyu, okhala wira masu awo anniwerya owòpolani”. Mwaha woomusoma Biibiliya ni orowela mithukumano khula okathi, nnoowerya ‘wàla . . . masu’ a ekeekhai mmuupuweloni ni vamurimani vahu. Nto eyo enoonikhaliherya okhootta itthu sinikumiheriwa ni olumwenku ola. Mwiixutti Yakobo olempe so: “Khamunsuwela wira, mwatànaka n’atthu òtakhala, munikhala awanani a Muluku? Ole omphavela opatthani wa vathí-va oninvirikanya Muluku”. (Yak. 4:4) Tivonto Biibiliya onihimya awe mooluluwanya wira nihaana weettela malamulo a xariya a Yehova ni ovikaniha ohiirela mpantta olumwenku.

⁷ Nuulumo na Muluku ninninikhaliherya wira nihaana okhalana ephoole ni mweettelo woorupihana ni wowuuliha muru. Nto Biibiliya onihimya wira: “Itthu s’òseje ni sonanara sikina walá milili, nnákhala sihiromoliweke eriyari anyu: khivàrerenle atthu a Muluku”. (aÉf. 5:3) Tivonto, niheemererye itthu soohiloka, sootakhala ni sowuuliha muru simakaka mmuupuweloni mwahu. Nave khanimphavela omakela ovaanela voohimya sa itthu iyo soohiloka. Niira siiso, nnimooniherya wira ninnitthara malamulo a Yehova, yaawo ari ooloka ni a xariya.

ORATTA

⁸ Ohiya paahi okhala ooratta momunepani ni okhalana mweettelo wooloka, maKristau annisuwela efaita erina aya oratta. WIsarayeli wa khalai, Muluku aaphavela wira atthu aratteleke mapuro otheene yaakhala aya. Nave-tho hiyo olelo-va, nihaana okhala ooratta wira Yehova ‘ohiwehé etthu yonyohowa’ wa hiyo.—Otum. 23:15.

⁹ MBiibiliyani waarya ni oratta, onnivarihana vanceene. Mwa ntakiheryo, murummwa Paulo aalempe so: “Axinnáka òphentiwa! . . . Nrapihe sonanara sothene s’erutthu ni s’eroho: niphaveleke omaleliha exariy’ahu nimuttittimihaka Muluku”. (2 aKor. 7:1) Tivonto maKristau ahaana okhala ooratta weerutthuni arapaka ni akatthaka ikuwo saya. Hata makhalelo avirikanaka khula elapo, masi mapuro otheene vanniweryaneya okhalana maasi ni esapau wira niiratteleke ni waarattela aniihu.

¹⁰ Mwaha wa muteko ahu woolaleerya, ninnisuweliwa vanceene. Nto vaavo ninrattela ahu empa ahu muhina ni ota ni olokiherya saana mireerelo sahu, ninnivaha onamoona wooloka. Nave amusi otheene vatthokoni pooti okhaliherya. Mwa ntakiheryo, alopwana maKristau ahaana orattela ota wa empa, maana annisuwela wira empa enikhapeleliwa saana enniwiiriha atthu akina ophavela omusuwela Muluku. Nto okhapelela waya empa aya ni myaha sa omunepani, ennooniherya wira alopwana oothela maKristau, annihoolela saana itthoko saya. (1 Tim. 3:4, 12) Nave-tho athiyana maKristau ootheliwa aakhalana muritti woorattela mpaani. (Tito 2:4, 5) Nave anamwane yiixuttihiwe saana annikhaliherya yiirattelaka mmansaya, orattela okwaartu waya ni olokiherya saana mireerelo saya. Eyo ennikhaliherya emusi yotheene ovara mowiiraana ni otthara malakiheryo oowiirattela anrowa okhala elapo esya nilamuleliwaka ni Omwene wa Muluku.

¹¹ Arumeyi anceene a Yehova olelo-va, annirumeela ikaaro ni amoota wira arowele mithukumano. Mapuro makina mikukutta iyo sinnirumeeliwa vanceene okathi anna anrowa aya muteko woolaleerya. Nto sihaana okhala sooratteliwa ni sootthokihiwa saana. Empa ahu ni ekaaro ahu ehaana ovaha onamoona wira nniirela mpantta atthu ooratta ni oowaarya a Yehova. Nave-tho nihaana omurattela Biibiliya ahu, iliivuru ni murupa ahu.

¹² Ikuwo sahu ni moota nniitthokiha ahu, sihaana wooniherya wira ninneettela malakiheryo a Muluku. Tthiri khivaarowa okhala vooloka owara mwa enamuna yoohiloka nrowaka olavula ni mutthu oottittimiheya. Tivonto vari aya vootepa oloka owara saana okathi woolaleerya ni nri ene vatribuna, maana ninlavula nipuro na Yehova! Moota ninwara ahu ni enamuna ya ikuwo sahu, pooti onyoholiha wala olavuliwa saana okokhorela wahu. Khivaarowa okhala vooloka owara ni wiitthokiha mwa enamuna enooniherya wira khinnaattittimiha ni waathokorerya saana atthu akina. (Mik. 6:8; 1 aKor. 10:31-33; 1 Tim. 2:9, 10) Nto vaavo nniilokiherya ahu wira nrowe muteko woolaleerya, nrowele mithukumano, asembeleya ni akonkresu, nihaana wuupuwelela ele Biibiliya onihimya awe sa oratta ni wiitthokiha saana. Maana okathi wotheene nimphavela omuttittimiha ni onvuwiha Yehova.

¹³ Nave nihaana owara saana okathi ninxukurya ahu eseedi ahu ya olumwenku wotheene aahiiso efiliyaali ya Anamoona a Yehova. Muupuweleke wira eBetheli entaphulela “Empa ya Muluku”. Nto nihaana owara ni wiitthokiha ntoko nniira ahu nrowelaka mithukumano Empa ya Omwene.

¹⁴ Hata okathi wootthekula, nimphavela owara ni wiitthokiha saana. Nto nihaana wiikoha so: ‘Niireke kaamuuliwa muru olaleerya kihiilokihenrye mwaha wa ikuwo saka?’

OTTHEKULA WOOLOKA

¹⁵ Otthekula ni omumula onniniiriha okhalana ekumi yooloka. Okathi omosa Yesu aahaaleela awiixutti wira arowe ‘nipuro nihinviraviriwa: yamumule vakhani’. (Mar. 6:31) Omulula ni otthekula onnimukhaliherya mutthu ohakalala. Nave pooti onikhaliherya wira nitthikele ovara saana muteko ahu okathi mukina.

¹⁶ Olelo-va, sookhala inamuna soovirikana sa otthekula. Nto maKristau ahaana okhalana ephoole ni okhalana ankhili a Muluku voohimya sa itthu anipaka aya. Nnaamwi omumula onikhaliheryaka vanceene, masi khahiyo etthu yootepa otthuneya mookumini mwahu. Noosuwela wira “okathi [ola] wokiserya” atthu yaarowa “òphavela sopuha, òmuhiya Muluku”. (2 Tim. 3:1, 4) Inamuna sinceene sa othekula pooti ohonona mweettelo wa mutthu oniphavela otthara oratteene malakiheryo ni malamulo a xariya a Yehova.

¹⁷ MaKristau a eseekulu yoopacerya yaahaana okhootta matthekulelo a okathi ole, maana atthu yaaphavela soopuha ni wiihakalaliha paahi. Okathi aRoma yaapaka aya espetaakulu, atthu yaanihakalala vaavo yaaweha aya atthu ahaaxiwaka. Okathi owo, otakhala, omwarexiwa ephome ni orupihana woohiloka saanooniheriwa wira ahakalalihiwe ale yaaweha, masi maKristau a okathi ole khiyaarowa oweha itthu iyo. Nave olelo-va, inamuna sinceene sa otthekula olumwenku ola sinoolikana ni okathi ole, maana atthu aniphavela wiihakalaliha paahi. Nto nihaana ‘othokorerya orattene’ mweettelo ahu nikhoottaka matthekulelo ootakhala. (aÉf. 5:15, 16; Esal. 11:5) Nave hata enamuna eyo ya otthekula ehikhanle yootakhala, woonasa wene enamuna enipakiwa aya ni okathi ene pooti okhala woohiloka.—1 Ped. 4:1-4.

¹⁸ Sookhala inamuna sinceene sa otthekula maKristau aneemereriwa aya. Anna anceene annittottela mureerelo otthara malakiheryo a mBiibiliyani ni malakiheryo ooloka anikumiheriwa muliivuruni mwahu.

¹⁹ Okathi mukina, imusi sikina sinnithukumana etthoko ya munna wira atthekule. Nave pooti wira anna ni arokora annilattuliwa orowela efesta ya ekasamento wala enamuna ekina ya otthekula. (Yoh. 2:2) Nto ale anaalattula anna awo ni arokora tarina muritti wa itthu sotheene sinrowa okhumelela opuro owo. Okhala wene, ti vooloka okhalana ephoole okathi atthu anceene anithukumana aya. Okhala wira okathi owo ti wootthekula, atthu akina annivikaniha mphimo wa mweettelo wooloka wa maKristau, awo annoolya mootepana, ohapaliwa ni annipaka itampi sikina suulupale. Yuupuwelaka itthu iyo, maKristau arina ankhili ni a miruku annaalattula atthu vakhaani ni annihela mukano okathi anrowa aya oviriha atthekulaka. Akhala wira enookhala eviinyu, ahaana owurya ni ephoole. (aFil. 4:5) Akhala wira atthu animwiimananiha wira okathi owo okhale wooloka ni woohakalaliha momunepani, yoolya ni eviinyu khenrowa okhala yootepa otthuneya.

²⁰ Ti vooloka owaakhela saana aletto. (1 Ped. 4:9) Akhala wira ninnaalattula anna owannyihu wira nitthekule, ohakalala ni olya etthu, nihaana owuupuwela ni waalattula anna oothoiwa. (Luka 14:12-14) Akhala wira noolattuliwa wira natthekule, mweettelo ahu ohaana ovarihana ni malakiheryo ari Marko 12:31. Ti vooloka oxukhurela oreera murima ni ovaha wa atthu akina.

²¹ MaKristau annihakalala mwaha wa oreera murima ni ovaha wa Muluku ni annisuwela wira “olya n’uwurya n’upuha sorera sothene simphwanyahu ni muteko ahu, sothene ti sovaha sa Muluku”. (Mus. 3:12, 13) Vaavo nimpaka ahu itthu “sothene vonvuwiha Muluku” okathi nintthekula ahu, ale anilattunle ni ale alattuliwe annihakalala vaavo anuupuwela aya okathi owo woohakalaliha momunepani.

MITEKO SA OXIKOLA

²² Anamwane a Anamoona a Yehova annittottela mureerelo osoma ixikola sa mulaponi. Okathi anisoma aya, awo anniimananiha osuwela osoma ni olepa. Itthu sikina siniixuttihiwa oxikola sinnaakhaliherya amiravo yaawo aniphavela ophwanya soolukama saya sa omunepani. Nto okathi anisoma aya oxikola, awo ahaana wiimananiha ‘ohimuliyala Muluku’, ahelaka nipuro noopacerya itthu sa omunepani.—Mus. 12:1.

²³ Akhala wira mwa mmiravo onisoma oxikola, muhaana osyaka oviriha okathi munceene muri ene ni amiravo a mulaponi vahireerelaka. (2 Tim. 3:1, 2) Yehova onninivaha itthu sinceene sinnikhaliherya osyaka ohapuxiwa ni olumwenku ola, nto muttotteleke mureerelo itthu iyo. (Esal. 23:4; 91:1, 2) Wira mwiikhapelele muhaana orumeela oratteene ikaruma Yehova onnivaha awe.—Esal. 23:5.

²⁴ Wira ahiirele mpantta olumwenku ola asomaka oxikola, amiravo anceene Anamoona a Yehova annisyaka wiirela mpantta miteko sikina sa oxikola. Nto anaxikola akhwaaya ni maprusoore khansuwela etthu eniwiiriha opaka eyo. Masi musuweleke wira etthu yootepa okhala ya faita ori omuhakalaliha Yehova. Eyo enooniherya wira muhaana orumeela murima anyu wiixuttihiwe ni Biibiliya ni osyaka oxinttana wala okhaliherya elapo. (aGal. 5:19, 26) Weettela malakiheryo a mBiibiliyani munivahiwa anyu ni anamuyari anyu maKristau ni weetta ni anna arina mweettelo wooloka mmulokoni, munoowerya otthara oratteene malamulo ni malakiheryo a xariya a Yehova.

MUTEKO WA MULAPONI NI APATTHANI

²⁵ Biibiliya onnooniherya wira ahooleli a etthoko tavahiwe muritti woovaha yoolya etthoko aya. (1 Tim. 5:8) Hata vari siiso, arumeyi a Muluku, annisuwela wira muteko aya wa mulaponi khahiyo wootepa otthuneya ovikana miteko sa Omwene. (Math. 6:33; aRom. 11:13) Ahooleli a itthoko anoosyaka otepa oxanka ni osiveliwa mihakhu akhala wira anoomuroromela Muluku ni ohakalala akhala wira anniphwanya yoolya, yoowara ni nipuro nookhala.—1 Tim. 6:6-10.

²⁶ MaKristau otheene anivara muteko wa mulaponi, okathi wotheene ahaana wuupuwela malakiheryo a mBiibiliyani. Ahaana ovara muteko mwa xariya asyakaka ovara itthu sihineemereriwa ni malamulo a Muluku ni a elapo eyo. (aRom. 13:1, 2; 1 aKor. 6:9, 10) Muhiliyale wira weetta ni alavilavi, onnihonona makhalelo ooloka. Okhala wira na anakhotto a Kristu, hiyo khaninweetta anakoso ahinivarihana ni malamulo a xariya a Muluku, yaarowa oniiriha wiirela mpantta olumwenku ni yaarowa ohonona mukhalelo ahu wa omunepani. (Yes. 2:4; 2 Tim. 2:4) Nave khanniirela mpantta ‘Babilonia Mulupale’, yoowo ori nwanani a Muluku.—Wis. 18:2, 4; 2 aKor. 6:14-17.

²⁷ Akhala wira nnoovarexexa malamulo a xariya a Muluku, okathi wa mithukumano sa eKristau khaninrowa omulaleyaka wala omweetta nakoso wala soophavela sa mutthu mwaneene. Yoolakela yuulupale ya mithukumano sa mmulokoni, asembeleya ni konkresu omukokhorela Yehova paahi. Okathi owo, hiyo ninlya vameesa oomunepani wira ‘nlipihane’ mukina ni mukhwaawe. (aRom. 1:11, 12; aHéb. 10:24, 25) Mithukumano iyo sinninikhaliherya okela vahoolo momunepani.

OKHALA OOWIIRAANA MMULOKONI

²⁸ Malamulo a xariya a Yehova annooniherya wira atthu a Muluku ahaana ophavela “okhapelela wiwanana omosaru” ninvahiwa ahu ni munepa wowaarya wa Muluku wira nikhalane murettele. (aÉf. 4:1-3) Ohiya ophavela wiisiveliha, khula mutthu ohaana wiimananiha ophavela itthu sinaaphwanyiha mureerelo atthu akina. (1 aTes. 5:15) Tthiri, eyo ti etthu eniiraneya mmulokoni mwanyu. Moohicikha nikhuli na mutthu, elapo oyariwe awe, okhulupale awe, musurukhu orina awe ni moota osomme awe, otheene ahu nneettihiwa ni malamulo mamosaru a xariya. Hata atthu a mulaponi annisuwela wira eyo tenaasuwanyeiha atthu a Yehova.—1 Ped. 2:12.

²⁹ Ottittimiheryaka efaita orina aya wiiraana, murummwa Paulo aalempe so: “Erutthu eri emosaru n’iroho eri emosaru: siso sikhanlyaya nroromelo nimosaru, nenlo mwakhenlyanyu mwìhaniwakaru. Pwiya ori mmosaru, wamini ori omosaru, obatizo ori omosaru. Muluku ori mmosaru, Tithi àtthu othene: yowo oniwettiha atthu othene, onvara muteko mw’atthu othene, onkhala mw’atthu othene”. (aÉf. 4:4-6) Moolumo ala anooniherya wira nihaana wiiraana mwa inamuna sotheene sikhale sowiixuttiha soopacerya sa mBiibiliyani wala sowiixuttiha suulupale. Opaka eyo, ninnooniherya wira ninniiwelela okhulupale wa Yehova, maana Yehova onnaavaha arumeyi awe nttaava nooloka ni neekeekhai. Nto Eyo ennaakhaliherya arumeyi awe omurumeela vamosa mowiiraana.—Sof. 3:9.

³⁰ Wiiraana ni murettele mmulokoni mwa eKristau onnaahakalaliha atthu otheene animukokhorela Yehova. Tthiri ninnoona wira enniiraneya yooleiherya ya Yehova eni: “Kinimothukumanyani othene anyu, ntoko sinthukumanyiwaya ipwittipwitthi munsisini”. (Mik. 2:12) Nimphavela wira murettele owo ni wiiraana ohimale niimananihaka weettela malamulo a xariya a Yehova.

³¹ Atthu otheene aneemererya wiirela mpantta muloko wa Yehova annihakalala vanceene! Nto wiihaneliwa nsina na Yehova onnivikana itthu sotheene nilenve ahu. Vaavo ninrowa ahu okhapelelaka waataana wahu ni Yehova, nihaana wiimananiha weettela malamulo awe a xariya ni waakhaliherya atthu akina opaka etthu emosaru.—2 aKor. 3:18.