Muhihiye Waataana ni Mutthenkeso wa Yehova

MWIIXUTTI Yakobo aalempe so: “Mmwattameleke Muluku: Muluku onowattamelani”. (Yak. 4:8) Nnaamwi Yehova ori ene Mukhulupale ni ori ene a vasuluxa owo onniwiriyana mavekelo a apinaatamu oohimalela. (Mit. 17:27) Wira nimwaattamele Muluku, nihaana okhalana waataana wooloka ni yena. Ninrowa owerya sai opaka eyo? Enamuna emosa ori onvekela ni murima wotheene. (Esal. 39:13) Enamuna ekina ori osoma khula nihiku Nuulumo nawe, ori Biibiliya. Niira siiso, nnoomusuwela oratteene Yehova Muluku ni soolakela sawe wa apinaatamu. (2 Tim. 3:16, 17) Nave nnimwiixutta omphenta ni woova opaka etthu yaarowa omunyoonyiha.—Esal. 25:14.

² Nikhaliheriwaka ni Yesu, vanniweryaneya omwaattamela Yehova. (Yoh. 17:3; aRom. 5:10) Khuuvo pinaatamu aarowa owerya onisuweliha oratteene muupuwelo wa Yehova ohikhanle Yesu. Yesu aanimusuwela oratteene Tiithi awe, tivonto aahimmye awe so: “Khavo onimusuwela Mwana, ehikhanle Atithi: khavo onasuwela Atithi, ahikhanle Mwana, n’ale Mwana ontthunawe wasuweliha”. (Luka 10:22) Nto vaavo ninsoma ahu Ivangelyo hiyo ninnisuwela muupuwelo ni moonelo wa Yesu, okathi omosaru ninnisuwela muupuwelo ni moonelo wa Yehova. Osuwela iwo onninikhaliherya otepa omwaattamela Muluku.

³ Wira nilipihe waataana wahu ni Yehova, nihaana waataana ni mpantta wa valaponi wa mutthenkeso wa Yehova, yoowo onnikhaliherya osuwela moota woopaka yootthuna ya Muluku. Ohiya-vo, nihaana osuwela okhulupale wa Yesu. Ntoko waahimmwale aya vahinatthi Matheyo 24:45-47, Pwiya ahu Yesu Kristu, onvaha “murumeyi òroromeleya ni ànkhili”, muritti wowaavaha “yolya okathi aya” amusi ahu otheene oowaamini. Olelo-va, murumeyi oororomeleya ni ankhili onninivaha yoolya yinceene ya omunepani. Omurumeelaka murumeyi oororomeleya ni ankhili, Yehova onnintumererya osoma Nuulumo nawe khula nihiku, orowela mithukumano moohihiyererya ni wiirela mpantta muteko woolaleya ihapari sooreera sa Omwene. (Math. 24:14; 28:19, 20; Yox. 1:8; Esal. 1:1-3) Nnaamwi murumeyi oororomeleya ni ankhili ori ene oohimalela, hiyo ninnikupali ni murima wotheene wira oneettihiwa ni Yehova. Nto nihaana wiimananiha waataana ni mpantta wa valaponi wa mutthenkeso wa Yehova ni otthara malakiheryo awe. Opaka eyo, enoonikhaliherya omwaattamela Muluku ahu Yehova ni enoonikhaliherya olipa ni wiikhapelela wira nivilele mixankiho.

XEENI WEEHERERIWA ONINCEREREYA AYA

⁴ Woonasa wene, nyuwo mwiixuntte khalai ekeekhai. Akhala wira ti siiso, nyuwo munnisuwela oratteene ele entaphulela aya weehereriwa waamini wahu. Masi hata nyuwo mmusuwenle ene niinaano Yehova aahiiso mpacenrye ene niinaano waataana ni atthu awe, musuweleke wira Satana Diabo onnaalupattha atthu otheene animwiiwelela Yehova. (2 Tim. 3:12) Hata nvirinhe ene mixankiho sinceene wala vakhaani khivanireerela nyuwo woova wala okhulumuwa, maana Yehova ooleiherya wira onimookhaliheryani, onowoopolani ni onimooreelihani oovahakani ekumi yoohimala.—aHéb. 13:5, 6; Wis. 2:10.

⁵ Mahiku ala ookiserya a olumwenku ola wa Satana, otheene ahu nnimweehereriwa. Okhuma mwakha wa 1914, vaavale otikitheriwe aya Omwene wa Muluku, Satana khoneemereriwa-tho okela wiirimu. Owo ni malaikha awe ootakhala aariheliwa valaponi, nto anniwerya waakumiherya mixankiho apinaatamu. Okhala wira Satana khoreere onanariwa sinnincerereya mixankiho valaponi ni arumeyi oowiivahererya a Yehova annitepa olupatthiwa. Itthu iyo sotheene sinnooniherya oratteene wira ninkhala wanikisa wa mahiku ookiserya a olamulelo wa Satana.—Wis. 12:1-12.

⁶ Okhala wira onnisuwela mukhalelo awe ni oosuwela wira orina okathi vakhaani paahi, Satana ni minepa sawe sootakhala annipaka sotheene aniwerya aya wira ahonone muteko ahu woolaleerya ni ahonone waataana wa arumeyi a Yehova. Nto, eyo enniniiriha wiirela mpantta ekhotto ya omunepani, yeeyo enihimmwa wira “khanniwana nivirikanyaka owerya w’atthu; ekhotto ahu ti yovirikana owerya n’ikuru ni makhulupale èlapo ela eri mwepiphini, nave-tho malaikha òtakhala a musulu”. Wira nixintte ekhotto eyo nikhaliheriwaka ni Yehova nihaana ohihiya owana ni owara ni okhapelela oratteene ikaruma sotheene sa ekhotto ahu ya omunepani. Nto nihaana wiimananiha, maana nnoowerya “omòmola Satana n’ulavilavi awe”. (aÉf. 6:10-17) Nnoowerya opaka eyo akhala wira nnoovilela.

MOOTA WOOKHALA MUTTHU OOVILELA

⁷ Mutthu oovilela ti yoole oniwerya ovilela okathi wa mixankiho aahiiso okathi oneehereriwa awe. Mukhalelo wa omunepani ovilela onitaphulela ohihiya opaka etthu yooloka hata nihaawaka, nilupatthiwaka wala ovilela khula etthu yaarowa ohonona ororomeleya wahu wa Muluku. Mutthu ohaana wiimananiha okhalana ovilela wa eKristau. Nto wira opake eyo onnivira okathi. Okathi ninlipiha ahu waamini wahu ninnincererya ovilela wahu. Vaavo ninvilela ahu weehereriwa onayeveru onoonikhaliherya ovilela weehereriwa wuulupale onrowa onikhumelela muhoolo. (Luka 16:10) Khivanreerela olipelela onikhumelela weehereriwa wuulupale wira nto nlipiheke waamini wahu. Nihaana olipiha waamini wahu sihinatthi onikhumelela mixankiho. Ooniheryaka wira ovilela ohaana wuncereriwa ni mikhalelo sikina sinimusivela Muluku, murummwa Pedru aalempe so: “Mphaveleke n’ikuru sanyu sothene wunjererya mowamini makhalelo òrera, va makhalelo òrera nwunjereryeke ankhili; vano-tho mphaveleke wisumaliha n’ukhalela nthiti ovilela n’umuttittimiha Muluku; vokiserya, munjereryeke opatthani n’uphentana w’aKristu”.—2 Ped. 1:5-7; 1 Tim. 6:11.

⁸ Ooniheryaka efaita erina aya ovilela, murummwa Yakobo aalempe so: “Axinn’aka: mwisupuwele okhala òreriwa khuluwi, okathi omphwanyanyu wehereriwa wa khula enamuna. Nyuwo mosuwela wira wehereriwa wo wamini wanyu onovahani nthiti. Vano nthiti nla nimalelihiwe ni miteko sorera, wira mukhalé òmalelene ni òhittheka wa inamuna sothene”. (Yak. 1:2-4) Murummwa Yakobo ohimmye wira maKristau ahaana weemererya weehereriwa mwaha woowi onninikhaliherya okhala oovilela. Niireke nyuwo munoonela siiso? Moottharelana, Yakobo onnooniherya wira ovilela onnivara muteko aya, onikhaliheryaka okhalana mikhalelo sa eKristau, seiyo sinniiriha weemereriwa ni Muluku. Moohaanyiherya, ovilela wahu onnilipa vaavo khula nihiku ninvilela ahu ni ninxintta ahu weehereriwa. Nto vaavo ovilela wahu onlipa aya, ninnikhalana mikhalelo seiyo naaphavela ahu.

⁹ Ovilela wahu onnimuhakalaliha Yehova. Nto mwaha woovilela, owo onoonireeliha onivahaka okumi woohimala. Murummwa Yakobo aalempe so: “Òreriwa mutth’ule onvilela wehereriwa, okhala wira, aphwanyiwa alimpene, onimwakhela ekumi, atthuveliwaka ni Muluku, ntoko sihimyalyawe wavaha ale animphenta”. (Yak. 1:12) Tthiri hiyo ninnivilela nlipelelaka waakhela ekumi yoohimala. Nave musuweleke wira akhala wira khaninvilela khaninrowa owerya okhala mwekeekhaini. Akhala wira khaninvilela soweeha sa olumwenku ola, nnootthikela molumwenkuni. Naahivileleke khaninrowa okhalana munepa wa Yehova, nave khaninrowa okhalana mikhalelo sinikumiheriwa ni munepa wootteela mookumini mwahu.

¹⁰ Wira niwerye ovilela mahiku ala ookiserya ni ooxankiha, nihaana okhalana moonelo wooloka voohimya sa mixankiho ninkumanana ahu mwaha wa okhala maKristau. Muupuweleke wira murummwa Yakobo olempe wira okathi muneehereriwa anyu “mwisupuwele okhala òreriwa khuluwi”. Ekeekhai wira opaka eyo khivanikhweya, maana pooti ohela muhina okhalana mixankiho mwerutthuni aahiiso mmuupuweloni. Muhiliyale wira nnookumana mixankiho mookumini mwahu muhoolo. Ele yaawiiranenle okathi omosa arummwa, enninikhaliherya osuwela ele entaphulela aya ohakalala okathi wa mixankiho. Eliivuru ya Miteko enihimya so: “Tivó, yahiwihana-tho arummwa, yahiruma owaxuliwa, yahakhottiherya olaleya-tho nsina na Yesu, numalá yahataphula. Vano arummwa yahikhuma mmuthukumanoni etteliwene murima, okhala wira Muluku ahaphwaneliha ohaxiwa mwaha wa nsina na Yesu”. (Mit. 5:40, 41) Arummwa ale yaanisuwela wira yaahihasuliwa mwaha woowi yaaniiwelela yooruma ya Yesu ni yaneemereriwa ni Yehova. Iyaakha vakhaani muhoolo mwaya, okathi aalempe awe epaphelo awe yoopacerya, Pedru aahilavula efaita erina aya ovilela mixankiho iyo mwaha wa exariya.—1 Ped. 4:12-16.

¹¹ Yowiiraneya ekina enimuhela muhina Paulo ni Siila. Okathi yaavara aya muteko aya wa omisionaario epooma ya oFilipi, awo yaahitthukiwa ni yaahootheriwa wira yaanihonona murettele wa epooma ele ni yaanilaleya soolema soohiloka. Tivonto, awo yaahiwaxuliwa ni yaahiriheliwa mukhatteya. Biibiliya onihimya wira “ohiyu eriyari” nlelo atthukiwe ene ni ahisuwelaka moota wooloola makhwatta aya “Paulo ni Sila yira elompaka, yipaka, emuttottopeleka Muluku: alipa-òtthukeliwa akina yanawiriyana”. (Mit. 16:16-25) Paulo ni apatthani awe yaanoona ohasuliwa mwaha woomutthara Yesu ohiya paahi ntoko ethoonyeryo ya ororomeleya wa Muluku ni atthu, masi-tho yaanoona okhala eparakha yowaalaleerya atthu otheene yaaphavela owiriyana ihapari sooreera sa Omwene. Maana eyo yaamoopola ikumi sa atthu akina. Mwa ntakiheryo, ohiyu ene yoole guarda ni emusi awe aahiiwa ihapari sooreera ni aahikhala mutthareli a Yesu. (Mit. 16:26-34) Paulo ni Siila yaanimuroromela Yehova, nave yaanikupali wira aamurumeela ikuru sawe wira aakhaliherye ovilela mixankiho iye. Tthiri aahaakhaliherya.

¹² Nave olelo-va, Yehova onninikhaliherya okathi ninkhalana ahu mixankiho. Maana oniphavela wira niweryeke ovilela, nave Yehova oonivaha Nuulumo nawe Biibiliya wira onikhaliherye osuwela soolakela sawe. Tthiri eyo ennilipiha waamini wahu. Nave nookhalana eparakha ya othukumana ni anna ni arokora ni ovara vamosa muteko wowaarya wa Muluku. Nave-tho nookhalana eparakha ya omwaattamela Yehova ninvekelaka. Ohiya-vo, Yehova onniwiriyana vaavo nimmuttottopela ahu ni nninvekela ahu wira onikhaliherye ovikaniha okhalana waataana wooloka ni yena. (aFil. 4:13) Ni ninniphwanya ikuru vaavo nnuupuwelela ahu nlipelelo onivanhe awe.—Math. 24:13; aHéb. 6:18; Wis. 21:1-4.

MOOTA WOOVILELA SOWEEHA

¹³ Olelo-va, ninniwanana mixankiho ni soweeha ntoko sa atthareli oopacerya a Yesu Kristu. Mahiku ahu ala, Anamoona a Yehova anniveehiwa ni ohasuliwa ni awanani aya. Ntoko mahiku a arummwa, mpantta muulupale wa olupatthiwa wahu onikumiheriwa ni ahooleli a itiini, yaawo aniixuttiha itthu sowoothiwa ni soolema soohiloka sinikhoottihiwa ni Nuulumo na Muluku. (Mit. 17:5-9, 13) Okathi mukina, vaavo anaaleela aya ahooleli a epoliitika wira ihakhi saya sittittimihiweke, atthu a Yehova anniphwanya otaphuwa. (Mit. 22:25; 25:11) Okathi mukina ikuvernu sinnikhoottiha muteko ahu, aphavelaka omala-maliha muteko wahu woolaleerya. (Esal. 2:1-3) Okathi owo, hiyo ninnitthara ntakiheryo na olipa murima wa arummwa, yaawo yaahimmye wira: “Etthu yotepa otthuneya omwiiwelela Muluku ovikana owiwelela atthu”.—Mit. 5:29.

¹⁴ Okhala wira olumwenku wotheene atthu annitepa okhaliherya elapo aya, eyo enniiriha otepa woona ovila wiiwelela yooruma ya Muluku ya olaleya ihapari sooreera sa Omwene. Nto arumeyi otheene a Muluku anniiwexexa yoolopola eri Wisupulula 14:9-12, yeeyo enihimya wira nihaana osyaka okokhorela “nxeni n’ilatarato aya”. Nave ninniiwexexa yootaphulela ya moolumo a Yohani, yaawo ani: “Tivó, atthu a Muluku, yale anìwelela soruma sawe, animwamini Yesu, ekhalane nthiti”.

¹⁵ Itthu ntoko ikhotto, manifestasau, okhoottiheriwa muteko ahu woolaleerya pooti owiirihani ohimukokhorela Muluku mootaphuwa. Nto eyo pooti owiirihani ohiwerya othukumana mmulokoni. Ohiya-vo, pooti-tho ohiweryaneya olavula ni efiliyaali wala ohiweryaneya mutokweene a esirkwiitu oxukurya miloko. Nave-tho pooti ohiweryaneya waakhela iliivuru. Akhala wira itthu sinookhumelela, munrowa opaka exeeni?

¹⁶ Waakhuliwa waya ti nno: Muhaana opaka itthu sotheene muniwerya anyu moovarihana ni makhalelo anyu. Woonasa wene, muhaana opaka yoosoma anyu wala opaka ikrupu saamukhaani wira muthukumaneke ipa sa axinna. Mithukumano iyo, pooti opakiwa sirumeeliwaka iliivuru nisomme ahu khalai wala Biibiliya. Nto muhitepeke oxanka wala otepexa woova. Nikhuuru Noolamulela nnoomananiha ovaanela ni anna arina miritti.

¹⁷ Hata nvalaanale ene ni anna ni arokora, muhiliyale wira nyuwo khanvalaanale ni Yehova vamosa ni Mwanawe, Yesu Kristu. Nto nlipelelo nanyu pooti olipa vanceene. Yehova onoowiriyana mavekelo anyu ni onimoolipihani orumeelaka munepa awe wootteela. Nto okathi wotheene munvekeleke malakiheryo ni muhiliyale wira nyuwo mwa murumeyi a Yehova ni mwa mutthareli a Yesu. Muttotteleke mureerelo okathi ola wira mulaleerye. Yehova onooreeliha wiimananiha wanyu ni moohipisa atthu akina anootakaahana ni nyuwo okokhorela wekeekhai.—Mit. 4:13-31; 5:27-42; aFil. 1:27-30; 4:6, 7; 2 Tim. 4:16-18.

¹⁸ Woonasa wene, pooti wookhumelelani muxankiho ntoko wa arummwa ni atthu akina, yoowo onrowa owiirihani wiiviwa. Okathi owo muhaana “omuroromela Muluku, yowo onwerya wahihimuxa alipa-òkhwa”. (2 aKor. 1:8-10) Waamini wanyu nlipelelo na ohihimuxiwa nnimookhaliheryani ovilela hata mulupatthiwaka vanceene. (Luka 21:19) Kristu Yesu oovaha ntakiheryo nooloka, owo aanisuwela wira ntakiheryo nawe na ororomeleya namwaalipiha atthu akina ni naamwaakhaliherya ovilela. Mwa enamuna emosaru, ovilela wanyu pooti waavaha ikuru anna ni arokora akina.—Yoh. 16:33; aHéb. 12:2, 3; 1 Ped. 2:21.

¹⁹ Ohiya paahi olupatthiwa, woonasa wene nyuwo pooti okumana mixankiho sikina. Mwa ntakiheryo, nyuwo pooti okhulumuwa mwaha woowi atthu akina khaniphavela woowiriyanani mwaalaleeryaka. Anna ni arokora akina anniwereyasiwa wala aakhalana oretta wa mmuupuweloni. Akina ahaana ovilela mixankiho sinikumiheriwa ni ohimalela wahu. Murummwa Paulo aahikhalana mixankiho ntoko iyo. Mwa ntakiheryo, onnilavula wira aahikhalana muxankiho yoowo waavuvurya muteko awe woolaleerya. (2 aKor. 12:7) Epafrodito, muKristau a eseekulu yoopacerya a epooma ya oFilipi, aahiriipiwa murima mwaha woowi apatthani awe “yahiwa yiriwaka wira murettá”. (aFil. 2:25-27) Ohimalela wahu, pooti oniiriha okhalana mixankiho soovila ovilelana mukina ni mukhwaawe hata mweemusini mwahu. Masi nnoowerya oxintta mixankiho iyo akhala wira nnootthara malakiheryo a Nuulumo na Yehova.—Ezek. 2:3-5; 1 aKor. 9:27; 13:8; aKol. 3:12-14; 1 Ped. 4:8.

MUHIHIYE OROROMELEYA

²⁰ Nihaana omutthara oratteene ole Yehova omuthanlale awe wira okhale muhooleli a muloko, Yesu Kristu. (aKol. 2:18, 19) Nave nihaana omwiiwelela “murumeyi òroromeleya ni ànkhili” vamosa ni axitokweene. (aHéb. 13:7, 17) Otthara malakiheryo ninvahiwa ahu ni mutthenkeso ni owiiwelela ale arina miritti mmutthenkesoni, nnookhala ootthokiheya wira nipakeke yootthuna ya Yehova. Nto nihaana ottottela mureerelo oratteene eparakha nrina ahu ya ovekela. Muhiliyale wira khiivo etthu ekhanle oowookhoottiheryani ovaanela ni Tiithi ihu a wiirimu ekhale ixiri nnakhala ikhatteya ni khiivo etthu enrowa ohonona wiiraana nrina ahu ni anna ni arokora.

²¹ Nivilelaka, nihaana opaka sotheene ninwerya ahu wira nivare muteko woolaleerya, yoowo Yesu Kristu aavanhe awe atthareli awe nuumala ohihimuxiwa oriki: “Vano, murowé, mwawixuttiheke atthu a maloko othene, mwabatizaka ni nsina n’Atithi ni na Mwana ni n’eroho yowarya. Mwawixuttiheke wettela sothene sòrumalyakani”. (Math. 28:19, 20) Tthiri nihaana otthara ntakiheryo na Yesu na ovilela. Nave nihaana owehexexa nlipelelo nahu na Omwene ni nlipelelo na okhala mahiku otheene. (aHéb. 12:2) Okhala wira na atthareli a Yesu Kristu, nookhalana eparakha ya wiirela mpantta wiiraneya wa eprofesia awe ‘okathi [ola] w’omala olumwenku’. Yesu aahimmye so: “Nave ehapar’ila yorera y’Omwene wa wirimu enolaleiwa mulaponi mothene, wira maloko othene esuwele, yamini. Vano-nto, olumwenk’ula omaleke”. (Math. 24:3, 14) Akhala wira olelo-va nnimwiimananiha ni murima wotheene ovara muteko ola, nnoohakalala ni nnookhalana eparakha ya okela elapo esya ya xariya!