MPANTTA 5

Mmuhokolowele “Makampusi Onsuka Mirima Sanyu”

Niireke muxankiho anyu onoolikanasa nuule wala ni iye sithokorenrya ahu ebroxura ela? Akhala wira ti siiso, nyuwo khamukhanle mekhinyu. Arumeyi anceene oororomeleya a Muluku a khalai ni a niinano, yaahikhalana mixankiho simosaru. Ntoko siiso yaakhaliheriwe aya ni Yehova oxintta mixankiho saya, nyuwo-tho munoowerya.

Yehova onimookhaliheryani okathi munrowa anyu omuhokolowela

MUKUPALIKI wira Yehova onoowaakhelani mwamuhokolowela. Onimookhaliheryani ovilela oxankiheya, moota woomaliha owereya onoona anyu mwaha wooveehiwa ni muKristau mukhwiinyu, ni okhalana murettele mmupuweloni ni vamurimani mwaha wookhalana yowuupuxerya ya murima yooloka. Nto nyuwo pooti ophavelaka otthikela omurumeela Yehova ni anninyu. Mukhalelo anyu onrowa olikanaka nuule wa maKristau a eseekulu yoopacerya yaawo murummwa Paulo aalepenle awe oriki: “Nyuwo mwari ntoko ipwittipwitthi sarimenle; nto vano mohokolowela wa makampusi onsuka mirima sanyu”.—1 Pedru 2:25.

Ohokolowela wa Yehova ti etthu yoolokexa ekhanle anyu oopaka. Mwaha wa xeeni? Mwaha woowi munoomuhakalaliha Yehova. (Miruku 27:11) Ntoko munisuwela anyu, ele enipaka ahu, pooti omuhakalaliha wala onwereya yena. Yehova khonnikhanyererya omphenta ni omurumeela. (Otumererya 30:19, 20) Musomi mmosa a myaha sa Biibiliya onihimya so: “Mukhora wa murima wa mutthu, khonihuliwa ota, ohaana ohuliwa muhina”. Vaavo ninthanla ahu omurumeela Yehova ni murima wotheene, mwaha womphenta, hiyo ninnitthukula mukhora owo. Opaka eyo, onooniherya wira ninninvaha Yehova etthu yootepexa otthuneya, eyo piiyo, ororomeleya wahu. Opaka eyo onnihakalaliha murima awe vanceene. Mwekeekhai, khiivo etthu ennihakalaliha vanceene enivikana omukokhorela Yehova ntoko siniphwanelela awe.—Miteko 20:35; Wisupulula 4:11.

Murokora waahiyale olaleerya yoowo onaakheliwa moohakalala mmulokoni

Vaavo vanitthikela anyu omurumeela Yehova, etala ya omunepani, ennimala. (Matheyo 5:3) Mwa enamuna xeeni? Atthu anniikoha nthowa naya niri ahu valaponi! Anniphavela osuwela nthowa naya Muluku onipattunxe awe. Eyo etthu yookhalela, maana Yehova onipattunxe siiso. Owo onipanke wira nisiveliweke omurumeela. Khiivo etthu ekina yootepa ohakalaliha enivikana osuwela wira ninnimurumeela Yehova, mwaha womphenta.—Esalimo 63:2-6.

Yehova oniphavela wira mmuhokolowele yena. Masi exeeni enrowa wookupalihani masu awo? Nkahaya muupuwele ela: Anna aalokiherya oratteene ebroxura ela anvekelaka Yehova. Woonasa wene, moruuheliwa ni mutokweene wala muKristau mukhwiinyu. Nto nyuwo moosoma ni moophavela otthara miruku sinivahiwa mbroxurani-mu. Itthu sotheene iya sinooniherya wira Yehova khooliyanleni. Ohiya-vo, owo onnookhaliheryani mooreerela wira mmuhokolowele.—Yohani 6:44.

Ninnilipa osuwela wira Yehova khonaaliyala arumeyi awe arimenle. Eyo ti etthu murokora Donna akupanli awe. Onihimya so: “Vakhaani-vakhaani kaahihiya weettela ekeekhai, masi kaamakela wuupuwelela Esalimo 139:23, 24, yeeyo eni: ‘Muluku! Mutokose murim’aka, musuwele: mukehererye, musuwele sinùpuwelaka. Mukiwehe; kakelá ephiro yotakhala, mukittikiherye ephiro y’axulupale aka [‘ephiro yohimala’, BE]’. Kaanisuwela wira miyo nkaahiyo a olumwenku ola, hata nkaawerya okhala ntoko atthu a mulaponi, masi-tho kaanisuwela wira nipuro naareerela aka okhala waari mootthokeyani mwa Yehova. Kaahipacerya woona wira Yehova khokinyanyanle; miyo kaahaana ophavela enamuna yoomuhokolowela yena. Kinnihakalala vanceene okhala wira koopaka eyo!”

“Kaahipacerya woona wira Yehova khokinyanyanle; miyo kaahaana ophavela enamuna yoomuhokolowela yena”

Ninnivekela ni murima wotheene wira nyuwo-tho mutthikele woona “otteliwa murima onrwa w’Apwiya [Yehova]”. (Nehemiya 8:10) Khamunrowa othanana mwaha woohokolowela wa Yehova.

Waakhuliwa wa Makoho a Atthu Ale Aniphavela Ohokolowela wa Yehova

KIPACERYE SAI?

Mutthu aawereiwa, pooti woonaka okhala vooreerela otthikela ovara miteko sawe vakhaani-vakhaani. Moolikanasa, nyuwo pooti olipiha mukhalelo anyu womunepani, mpaceryaka olya yoolya yomunepani vakhaani, khuta nihiku. Muhooneke wira muhaana opaka itthu sotheene ekwaha emosa. Woonasa wene, pooti opacerya oviriha okathi vakhaani mmusomaka wala owiriyana masu oogravariwa onisommwa Biibiliya, wiixutta eliivuru ahu emosa, onweha Web saite ahu jw.org. Nave-tho, mwiimananihe orowa omuthukumanoni moohipisa. Vanceenexa, munvekeleke Yehova wira ookhaliheryeni. “Muhelé mmatatani mwawe ovelavela wanyu wothene, okhala wira owo onnokhapelelani”.—1 Pedru 5:7.

Eeva onihimya so: “Nuumala ohiya omurumeela Yehova, kaanuuleliwa muru hata ovekela. Nuumala owerya ovekela, mutokweene a muloko waattamenle aka aahikixukurya. Aahikikhaliherya woona wira Yehova khokinyanyanle. Mutokweene ole aahikivaha miruku wira kipacerye omusoma Biibiliya khula nihiku. Nuumala opaka eyo, kaahiphwanya ikuru soowerya orowa omuthukumanoni. Nuuvira okathi, kaahipacerya orowa olaleerya. Kinnihakalala oweha wira Yehova khonakinyanyale”.

KINROWA WAAKHELIWA SAI MMULOKONI?

Mukupaliki wira anna ni arokora mmulokoni anoowaakhelani moohakalala. Ohiya woophukelani ni woolavulani moohiloka, awo anrowa owooniheryani wira annoophentani ni anrowa opaka khuta etthu aniwerya aya wira yoolipiheni.—aHéberi 10:24, 25.

Javier onihimya so: “Kaanuuliwa muru vanceene wuupuwela otthikela Empa ya Omwene. Kaaniikoha moota anna yaarowa aya okithokorerya”. Murokora oowunnuwela yoowo kaamuhiyale aka mmulokoni iyaakha 30 ottuli, nuumala okiweha aahimyale so: ‘Munnaakheliwa, Mwanaka!’ Masu awo yaahikivara murima vanceene. Tthiri kaanoona wira kootthikela owaani”.

Marco onihimya so: “Kaahirowa Empa ya Omwene khukilaathi ibanko sookiserya wira ohikhale onrowa okiweha. Masi, anceene yaanikuupuwela okathi waarowelaka mithukumano kinari mwankhaani. Awo yaahikaakhela ni okikhupaarela saana, nto muupuwelo aka waahimaaleleya vanceene. Vaakhala ntoko kihokolowenle owaani”.

AXITOKWEENE ANROWA OKIKHALIHERYA SAI?

Axitokweene anrowa woothokoreryani mooreerela murima. Awo animoottottopelani mwaha wa ophavela otthikela okhalana “ophenta warinanyu wopajeryani”. (Wisupulula 2:4) Animookhaliheryani olokiherya khuta etthu yoohiloka epanke anyu, mwa enamuna enooniherya ‘opixa murima’. (aGalasia 6:1; Miruku 28:13) Axitokweene pooti opaka malokiheryo wira namalaleerya mmosa omusomeke Biibiliya ni nyuwo, woonasa wene orumeelaka eliivuru Achegue-se a Jeová wala “Mukhaleke Mophentani Mwa Muluku”. Musuweleke wira axitokweene anrowa woolipihani ni wookhaliheryani okathi wotheene.—Yesaya 32:1, 2.

Victor onihimya so: “Mwa iyaakha 8 kaahiyale aka olaleerya, axitokweene yaanivikaniha okixukurya. Nihiku nimosa, mutokweene mmosa aahikooniherya ifootu aanikumihale awe khalai. Saahikuupuxerya itthu sinceene sooreera sa khalai, nto kaahipacerya wunkheliwa ni itthu iyo, okathi yoole kaamurumeela aka Yehova moohakalala. Moophenta, axitokweene yaahikikhaliherya otthikela omurumeela Yehova mooluttuweliwa”

“Yehova Onimoovahani Ikuru”

Eliivuru ahu ya masipo yeeyo eni: Nimwiipele Yehova Voohakalala, yookhalana masipo manceene oovara murima, yaawo aniwerya woolipihani vaavo vanitthikela anyu muteko anyu woolaleerya. Nkahaya muupuwelele masu a nsipo nummuru 38. Nsipo nna nikumihiwe masu a 1 Pedru 5:10, ni nrina muru oni: “Yehova Onimoovahani Ikuru”.

Yehova Muluku, ohoothanlani nyu;

Omphavela mwaakhele okumi.

Ohoona wira nyuwo, munniphavela

Omuhakalaliha vanceene.

Moomuleiherya Tiithi Yehova,

Omwiiwelela khula nihiku.
Yehova onvaha, Mwanawe moophenta,

Wira owoopoleni soottheka.

Tivo muhooveke, nyuwo munoophwanya

Ikuru wira mulipaneke.

Yehova khonrowa oliyala

Miteko sanyu n’umphenta wanyu.

(EKOORU)

Wa Yehova Muluku, muhiivahererya.

Onimoovahani, ikuru sinceene.

Onimoolipihani mahiku otheene.

Onimoovahani, ikuru sinceene.

Wira nwiriyane masipo a orquestra ni coral ya nsipo nla wala masipo makina a Omwene, murumeele ekoodiko ela aahiiso munwehe www.jw.org. Murowe opuro oni: ILIIVURU > ISIPO.