Yakobe Aahaakhela Mareeliho

Isakhi aarina iyaakha 40 okathi aamuthenle awe Rebeka. Isakhi aanimphenta vanceene. Muhoolo mwaya, Isakhi ni Rebeka yaahaayara anamwane anli axilopwana, maphapo.

Mwaana oopacerya aitthaniwa Esawu, vano a nenli aari Yakobe. Esawu khiwaamusivela okhala owaani, nto muteko awe waari oxaya inama. Masi Yakobe aasiveliwa okhala owaani.

Okathi ole, mwaana oopacerya oyariwa aanivahiwa ematta yuulupale ni musurukhu munceene, vaavo paapa awe aakhwa awe. Eyo yaitthaniwa yoohiyeriwa. Mweemusini mwa Isakhi, mwaana aarowa ohalana itthu sa anamuyari awe, aahaana wiirela mpantta yooleiherya ya Yehova aamulenle awe Abrahamu. Esawu khaavaha efaita yooleiherya ele, masi Yakobe aanivaha efaita yuulupale.

Nihiku nimosa, Esawu aahitthikela owaani okhulumunwe ene vanceene maana nihiku notheene aamuxaya. Nto aahoona wunkhela eyoolya Yakobe aapeyale awe, nto Esawu aahihimya so: ‘Nkireere ovoliwa! Mukivahe etthu mwaapeyale anyu kilye!’ Yakobe aahimwaakhula so: ‘Kinimoovahani, mukilaphele toko wira okhuma olelo vaava miyo kinrowa okhala muulupale anyu’. Vano Esawu aahimuleela wira: ‘Aayo, okhala muulupale nkinoona efaita aya, nto nyuwo mukhaleke muulupale aka, mwakivaharu yoolya paahi’. Niireke ele Esawu aapanke awe yaari yooloka? Nnaari, khiyaalonke. Esawu aahivaha etthu yootthuneya vanceene mwaha wa eparatho emosa paahi ya yoolya.

Vaavo Isakhi uuluvanle awe, waahiphiya okathi woomureeliha mwanawe oopacerya oyariwa. Masi Rebeka aahimukhaliherya Yakobe, yoowo aari ookiserya oyeva wira oreelihiwe. Okathi Esawu aasuwenle awe, aahinanariwa vanceene ni aahimpaka palano wira omwiive muhima awe. Isakhi ni Rebeka yaahimukhapelela Yakobe, nto yaahimuleela so: ‘Mwaakuveke, mutthyawele wa Labano murokoraya amaminyu, mpakha Esawu ommalela onanariwa wawe’. Yakobe aahaawiriyana anamuyari awe ni aahitthyawa wira ohiiviwe.