Ti Pani Aari Yobi?

Elapo ya wUsi aahikhala mulopwana mmosa aamukokhorela Yehova. Nsina nawe naari Yobi. Owo aahikhalana emusi yuulupale ni mihakhu sinceene. Aanaakhaliherya atthu oohaawa, athiyana yaakhweliwe axiiyaya ni anamwane yahaarina apapaya. Masi niireke mwaha wa Yobi okhala mutthu ooreera murima khisaarowa omukhumelela mixankiho?

Yobi khaasuwela eyo, masi Satana aaninweha. Yehova aahimukoha Satana wira: ‘Monweha murumeyi aka Yobi? Mulaponi motheene khaavo mutthu onlikana nuuwo. Owo onnikiiwelela ni khonipaka itthu soohiloka’. Satana aahimwaakhula wira: ‘Yobi khonoorumeelani mahala. Nyuwo munnimwakiherya sotakhala sotheene ni munnimureeliha. Monvaha mihakhu sinceene ni inama. Masi haya mmwaakhe itthu sotheene, moone aahihiye wookokhorelani’. Yehova aahimuleela wira: ‘Muroweke mwamwiiriheke eniphavela anyu. Masi muhimwiive’. Xeeni Yehova ohalaka weemya wira Satana omweehererye Yobi? Mwaha woowi Yehova aanisuwela wira Yobi khaarowa ohiya okhala oororomeleya.

Satana aahipacerya omukumiherya Yobi mixankiho sinceene. Wanipacerya, aahaaruma alavilavi omwiiyerya abuuru awe. Nuumala-vo, mooro waahiiva ipwittipwitthi sawe sotheene. Atthu a oKhaldeya yaahiiya ikamelo sawe. Arumeyi awe yaakukhula ikamelo iyo yaahiiviwa. Moottharelana, yaahikhumelela ehasara yuulupale. Anamwane otheene a Yobi yaahikhwa nuumala omoreliwa empa yaapaka aya efesta. Yobi aahiriipiwa murima vanceene, masi khaahiyale omukokhorela Yehova.

Satana aaphavela omuhaaxa Yobi vanceene. Nto aahimukumiherya makhwatta erutthu awe yotheene; makhwatta awo yaaninwereya vanceene. Yobi khaasuwela nthowa naya itthu iye sotheene saamukhumelela aya. Masi aahivikaniha omukokhorela Yehova. Muluku aahiweha mweettelo wa Yobi, nto aahihakalala vanceene.

Moottharelana, Satana aahaaruma alopwana araru orowa omweehererya Yobi. Awo yaamulenle so: ‘Yobi, nyuwo moomutthekela Muluku ni nvitha itampi sanyu. Vano Muluku onimoohaaxani’. Yobi aahaakhula wira: ‘Miyo khiivo epanke aka yoohiloka’. Nuumala-vo, Yobi aahipacerya wuupuwela wira mixankiho sawe saakumiheriwa ni Yehova, nave aahihimya-tho wira ele Muluku aapaka awe khahiyo yaari etthu ya xariya.

Mmiravo mmosa aitthaniwa Elihu, aaroomaala paahi onawiriyana. Nuumala-vo, aahilavula oriki: ‘Otheene anyu muhimmye itthu soohiloka. Yehova ti muulupalexa ovikana muupuwelo ahu. Owo khotonko opaka etthu yootakhala. Muluku onniweha itthu sotheene ni onnaakhaliherya atthu okathi anixanka aya’.

Nto Yehova aahimuleela Yobi wira: ‘Okathi waapattuxale aka erimu ni elapo, nyuwo mwaari woowi? Xeeni munihimya anyu wira etthu epanke aka khahiyo ya xariya? Nyuwo munihimya itthu muhinsuwela anyu’. Yobi aaheemererya soovonya sawe ni aahihimya wira: ‘Kihootthekelani. Khalai nkoosuwelani oratteene, masi vano kinnoosuwelani saana. Nyuwo khiivo enooceela anyu. Mukilevelele ele ehimyale aka’.

Nuumala weehereriwa, Yehova aahimaliha oretta wa Yobi ni aahinvaha mihakhu sinceene ovikana iye saarina awe khalai. Yobi aahikhala iyaakha sinceene ni aahikhalana okumi wooloka. Yehova aahimureeliha Yobi mwaha womwiiwelela hata okathi wooxankiha. Niireke nyuwo munoomutakiha Yobi? Niireke munoovikaniha omukokhorela Yehova, hata okathi wa mixankiho?