Yehova Aahimuthanla Yoxuwa

Nuumala Moise okhala mukhulupale a nloko na aIsarayeli mwa iyaakha sinceene, okumi awe waahiphiya wanikisa. Yehova aahimuleela Moise wira: ‘Nyuwo khamunaakuxa aIsarayeli mpakha elapo eleihenrye aka. Masi kinoowooniheryani elapo eyo’. Moise aahinvekela Yehova wira omuthanle mukhulupale mukina wira aahooleleke atthu otheene. Yehova aahaakhula wira: ‘Mmukuxe Yoxuwa, mmuleele wira yoowo kimuthanlale aka’.

Moise aahaaleela atthu otheene wira yena aarowa okhwa moohipisa ni wira Yehova aahimuthanla Yoxuwa ntoko muhooleli aya wira aahoole Elapo Yooleiheriwa. Nuumala-vo, Moise aahimuleela Yoxuwa wira: ‘Muhoove. Yehova onimookhaliheryani’. Moise aahiwela vamwaako Nebo, nto Yehova aahimooniherya elapo aamuleihenrye awe Abrahamu, Isakhi, ni Yakobe. Wanikisa waya Moise aahikhwa orina ene iyaakha 120.

Yehova aahimuleela Yoxuwa wira: ‘Mulapuwe muro Yordani: mukele elapo ya oKanani. Ntoko kaamukhalihenrye aka Moise, siiso kinimookhaliheryani nyuwo. Musomeke Nlamulo naka khula nihiku! Muhoove! Mwiilipihe. Mpake ele enoorumaakani’.

Yoxuwa aahaaruma anamahottela anli wira erowe oYerikho. Muru onittharelana, ninrowa wiixutta etthu yaakhumelenle opuro ole. Okathi anamahottela ale yaatthinke aya, yaahihimya wira ole waari okathi wooreerela okela oKanani. AIsarayeli yanwerya olima imatta, ophatteya miri sa uva, ni olya mihokorokho saya. Nuumala-vo, Yoxuwa aahaaruma alipa a mukuttho wira eteexe etabernaakulu ni ehooleke erowaka mmuro Yordani. Maasi a muro ole yaari ootupa ni yaanitthimaka vanceene. Masi anamukuttho ale enyakelakaru mmuro, maasi awo yaaheemela ni yaahipacerya owelela! Awo yaaheetta erowaka eriyari ya muro ni yaaheemela mpakha aIsarayeli otheene olapuwa. Tthiri mwiiriirya ole waahiwuupuxerya aIsarayeli ele Yehova aapanke awe Ephareya Yooxeerya.

Nuumala aIsarayeli oviriha iyaakha sinceene, vano yaahikela Elapo Yooleiheriwa. Awo yanwerya oteka inupa saya ni ipooma saya. Nave-tho yanwerya olima imatta, ophatteya miri sa uva ni sikina. Elapo ele yaari yoowunttelana ni yooruwerya.