Muhooleli a Ninaano ni Athiyana Anli Oolipa Murima

Nuumala Yoxuwa waahoolela aIsarayeli mwa iyaakha sinceene, owo aahikhwa orina ene iyaakha 110. Mahiku otheene Yoxuwa ari awe mukumi, aIsarayeli yaanimukokhorela Yehova. Masi nuumala Yoxuwa okhwa, awo yaahipacerya okokhorela ilatarato, ntoko yiira aya atthu a oKanani. Mwaha wa yeeyo, Yehova aahimweemererya mwene a oKanani, Yabini, waahaaxa aIsarayeli. Atthu yaahimuxonttela Yehova wira aakhaliherye. Nto Yehova aahaavaha muhooleli a ninaano, Baraki. Owo aarowa waakhaliherya atthu otthikela omukokhorela Yehova.

Débora, yoowo aari profeta muthiyana, aahaaruma atthu omwiitthana Baraki. Yehova aahimuruma omuleela Baraki wira: ‘Mwaakuxe anakhotto 10.000 murowe mwakumane ni anakhotto a Yabini omuro Kixoni. Nto munoomuxintta Sisera, muhooleli a anakhotto a Yabini’. Vano Baraki aahimuhimeerya Débora wira: ‘Nyuwo mwarowa vale, ni miyo kinoorowa’. Débora aahaakhula wira: ‘Tthiri kinoorowa ni nyuwo: masi musuweleke wira khahiyo nyuwo munrowa omwiiva Sisera. Yehova ohimmye wira muthiyana tonrowa omwiiva Sisera’.

Débora aahirowa ni Baraki ni anakhotto awe omwaako Tabori wira yailokiherye aphavelaka owana ekhotto ni Sisera. Nuumala Sisera osuwela eyo, owo nave aahaathukumanya anakhotto awe ni ikaaro sawe sa ekhotto muttetthe wowaataleya wa muro Kixoni. Débora aahimuleela Baraki wira: ‘Olelo Yehova onimoovahani Sisera mmatatani mwanyu’. Baraki ni atthu awe 10.000 yaahirowa omwaako Tabori owana ni anakhotto ootupa a Sisera.

Yehova aahiiriha wira muro Kixoni osareye maasi. Vano ikaaro sa ekhotto sa Sisera, saahipacerya ophara munttopheni. Sisera aahikhuruwa mukaaroni mwawe, khutthyawa mwentto. Baraki ni atthu awe yaahiwiiva anakhotto a Sisera. Masi Sisera aahitthyawa khurowa wiipitha muheemani mwa muthiyana aitthaniwa Yayeli. Nto Yayeli aahinvaha eleeti ni aahimukhuneela ni manta. Voohipisa, Sisera aahiphwanya ikhove suulupale. Yayeli aahimwaattamela khumukhomela vamuru ni ekhomo ya eheema, nto Sisera aahikhwa.

Baraki aahiphiya omphavelasaka Sisera. Yayeli aahikhuma muheemani mwawe khumuhimeerya Baraki wira: ‘Murwe: kiwooniheryeni mutthu onimphavelanyu’. Vano Baraki aahikela muheemani khumoona Sisera, okhwiiye ene. Baraki ni Débora yaahimuttottopela Yehova emwiipelaka nsipo mwaha wowaakhaliherya aIsarayeli waaxintta awanani aya. Nuumala-vo aIsarayeli yaahimaliha iyaakha 40 erina ene murettele.