Mwaana Mwaamulopwana a Naamukhweli Aahitthikela Okhala Mukumi

Okathi yahaarumpe aya epula wIsarayeli, Yehova aahimuleela Eliya wira: ‘Murowe muttetthe wa oSarefá. Naamukhweli mmosa a weiwo, onimoovahani soolya’. Ohalaka vakhaani ophiya vamukhora va epooma eyo, Eliya aahinweha naamukhweli mmosa oohaawa attottaka ikhuni. Eliya aahinvekela maasi. Vaavo aarowela awe, Eliya aahimuleela wira: ‘Mukiruuhele-tho ephaawu’. Vano naamukhweli ole aahaakhula so: ‘Nkirina ephaawu yoowoovahani. Kirina otthu vakhaani ni makhura vakhaani paahi kiniphavela aka opakela ephaawu yaamukhaani kikhuure miyo ni mwanaka’. Vano Eliya aahimwiirela wira: ‘Yehova ooleihenrya wira mwakipakela ephaawu, otthu anyu ni makhura anyu khanirowa omala mpakha otthikela orupa epula’.

Naamukhweli ole aahirowa owannyawe ni aahimpakela ephaawu profeta a Yehova. Sintoko Yehova aaleihenrye awe, naamukhweli ole ni mwanawe yaahikhalana eyoolya mpakha omala etala. Otthu awe khiwaamanle mmwaapuni, nave makhura khiyaavukunwe mmurinkini.

Mootutuxerya yaahikhumelela etthu yooriipiha murima. Mwanawe naamukhweli ole aahiwereiwa ni aahikhwa. Naamukhweli ole aahinvekela Eliya nikhaliheryo. Eliya aahimuteexa mmiravo ole, aahimuroiha empa ya osulu, aahimwaatalela vakhaamani ni aahivekela ohimyaka so: ‘Xontte Yehova, mmuhihimuxe mwanamwane ola wira otthikele okhala mukumi’. Munnisuwela nthowa naya eyo yaarowa aya okhala etthu yootikiniha vanceene? Mwaha woowi, okathi ole khuuvo aatonko ohihimuxiwa nuumala okhwa. Nave naamukhweli ole ni mwanawe khahiyo yaari a nloko na wIsarayeli.

Masi okumi wa mmiravo ole waahimutthikela ni aahipacerya omumula! Eliya aahimuleela naamukhweli ole wira: ‘Mooneke! Mwaninyu vano mukumi!’ Muthiyana ole aahitteeliwa murima ni aahihimya wira: ‘Tthiri nyuwo mwa mulopwana a Muluku: Kinihimya siiso mwaha woowi munlavula paahi ele munrummwa anyu ni Yehova’.