Estheri Aahiwoopola Atthu a Nloko Nawe

Estheri aari mwali muYuda aakhala elapo ya oPersia epooma ya oSusa. Emusi awe yaavariwe oYerusalemu ni Nabukodonosori mwa iyaakha sinceene saavinre. Owo aahuuwale ni mmusi awe, Mardokeyo yoowo ari murumeyi a mwene a oPersia, Asuwero.

Mwene Asuwero amphavela pwiyamwene musya. Arumeyi awe yaahimuruuhela athiyana anceene ooreera, a elapo ele omuhela muhina Estheri. Mwene aahimuthanla Estheri wira okhale pwiyamwene musya. Mardokeyo aahimukhoottiherya Estheri ohimya wira yena aari muYuda.

Mulopwana mmosa oowiixinnuuha yoowo aitthaniwa Hamani, aari muhooleli a makhulupale otheene. Owo aaphavela wira atthu otheene emukokhoreleke yena. Mardokeyo aahikhootta opaka eyo, Hamani aahinanariwa vanceene ni aaniphavela omwiiva. Hamani asuwelakaru wira Mardokeyo aari muYuda, aahimpaka palano wira owiive aYuda otheene yaakhala elapo ele. Owo aahimuleela Mwene wira: ‘AYuda atthu ootakhala, vannireerela waahukhumu’. Asuwero aahimuhimeerya Hamani wira: ‘Nwiirihe entthuna anyu’. Nto aahinvaha owerya woopaka nlamulo. Hamani aahipaka nlamulo naaruma atthu otheene owiiva aYuda nihiku 13 mweeri wa Adari. Yehova aaniweha itthu sotheene siiraneya.

Estheri khaasuwela wira nookumiheriwa nlamulo nlo. Nto Mardokeyo aahaaruma atthu omuroihela Estheri nlamulo nlo ni aahimuleela Estheri wira: ‘Murowe mwalavule ni mwene’. Estheri aahaakhula wira: ‘Akhala mutthu onrowa olavula ni mwene ohiitthaniwe, onimwiiviwa. Aavira mahiku 30 mwene ohikiitthanne! Masi kinoorowa. Akithoonya ni ekopo awe, nkiniiviwa. Masi mwene aahipaka eyo miyo kinimwiiviwa’.

Estheri aahirowa vate va empa ya mwene. Mwene vaamoonale awe aahimuthoonya ni ekopo awe. Estheri aahimwaattamela mwene, nto owo aahimukoha wira: ‘Estheri, yookhala eniphavela anyu okivekela?’ Vano Estheri aahaakhula so: ‘Aayo, mwarwe ni Hamani wira mulye owannyaka koolokiherya efesta’. Nuumala-vo, Estheri aahaalattula-tho wira yaarwe nihiku na nenli. Nihiku na nenli, mwene aahimukoha-tho Estheri wira: ‘Nyuwo Estheri, muniphavela okivekela exeeni? Owo aahaakhula wira: ‘Ookhala oniphavela okiiva miyo ni atthu a nloko naka. Xontte munaakihe’. Mwene aahimukoha wira: ‘Ti pani owo oniphavela owiivani? Estheri aahaakhula wira: ‘Mutakhali owo ti Hamani ola okilaathale-va’. Asuwero aahinanariwa vanceene ni aahiruma wiiviwa Hamani okathi ene yoowo.