Olaleerya Vamwaako

Nuumala waathanla arummwa 12, Yesu aahikhuruwa vamwaako nto khurowaka opuro waathukumanne aya atthu anceene. Atthu awo yaakhuma oGalileya, oYudeya, oTiro, oSidoni, oSiria, ni mittetthe sikina saattamenle Muro Yordani. Awo yaahaaruuha aretta, ni ale yaahaaxiwa ni minepa sootakhala. Yesu aahaapenuxa otheene. Nuumala-vo aahikilaathi mukerekhere wa mwaako nto khupacerya wiixuttiha. Aahaaleela etthu enireerela ahu opaka wira nikhale apatthani a Muluku. Hiyo nihaana osuwela wira vannireerela omphenta Yehova. Masi khaninwerya omphenta Muluku nihaaphentaka atthu akina. Nihaana waareerela murima ni owiirela itthu sooreera atthu otheene hata awanani ahu.

Yesu aahimmye so: ‘Muhaaphenteke apatthani anyu paahi. Nave muhaana-tho waaphenta awanani anyu ni waalevelela ni murima wotheene. Mwakhalana mulattu ni mukhwiinyu, murowe mwaataane ni yena. Etthu enoosivelani wiireliwa ni atthu akina, nwiireleke yeeyo akhwiinyu’.

Nave-tho Yesu aahaavaha atthu miruku sooloka sa moota woothokorerya itthu sa werutthuni. Owo aahimmye so: ‘Okhala mpatthani a Yehova ti vootepexa oreera ohiya okhalana musurukhu munceene. Nawiiye onoowerya wiiya musurukhu anyu, masi khuuvo oniwerya owiiyeryani ompatthani orina anyu ni Yehova. Muhivelavele mwaha wa etthu munrowa anyu olya, owurya, aahiiso owara. Nkaaweheeni axipalame. Okathi wotheene Muluku onnaaphwanyiha soolya. Oxankiheya khonirowa wuncererya mahiku a ekumi anyu. Muhiliyale wira Yehova onnisuwela etthu enoothowani’.

Atthu yaari opuro ole khiyaatonko omwiiwa mutthu oosuwela wiixuttiha ntoko Yesu. Ahooleli aya a itiini khiyaawiixuttinhe itthu iye. Xeeni Yesu ari awe mwiixuttihi muulupale? Mwaha woowi itthu sotheene aixuttiha awe saakhuma wa Yehova.