Yesu Aahiwiixuttiha Awiixutti Ovekela

Itthu sotheene aFarisi yaapaka aya, yaaphavela ottottopeliwa ni atthu. Awo yaanipaka etthu yooloka, ephavelaka wooniwa ni atthu paahi. Yaanipaka mavekelo mphironi wira yooniweke ni atthu. AFarisi yaanihela mmuru mavekelo oopisa, nave okathi yaavekela aya yaanihimya itthu simosaru musinagoga ni mapuro yaakumana iphiro wira ewiriyaniwe ni atthu akina. Atthu akina yaanitikinihiwa okathi Yesu aahimme awe wira: ‘Muhilompeke ntoko siniira aya aFarisi. Awo annuupuwela wira Muluku onoowaakhula yaahimyaka moolumo manceene, masi owo khonaakhula. Nivekelo ti enamuna ennikhaliherya olavula ni Yehova. Muhaattiheke moolumo anyu aahiiso itthu soohimya. Yehova onnisuwela simphavela anyu ni ele eri vamurimani vanyu.

‘Vano nvekeleke so: Tiithi ihu muri wiirimu, nsina nanyu nivuwihiwe. Omwene anyu orwe. Otthuna wanyu wiireye wiirimu, siiso ni vathi-va’. Yesu aahihimya-tho wira nihaana ovekela eyoolya ya khula nihiku, oleveleliwa itampi sahu ni waalevelela ale annitthekela.

Yesu aahimmye so: ‘Muhihiyererye ovekela. Muthipeleleke onvekela Tiithi ahu, Yehova, itthu sooreera. Khuta namuyari onniphavela waavaha anaawe itthu sooreera. Akhala wira mwaana onveka ephaawu, kiireke mwaarowa onvaha nluku? Akhala wira owo onveka ehopa, kiireke mwaarowa onvaha enowa?’

Nto Yesu aahiwiixuttiha ohimyaka so: ‘Akhala wira nyuwo munnisuwela waavaha itthu sooreera aniinyu, ankhi Tiithi ahu, Yehova, niireke khonnivaha munepa wootteela? Nto muhaana onvekela yena’. Nyuwo munnitthara miruku sa Yesu? Itthu xeeni nyuwo munivekela anyu?