Ewarakha ya Nikhuuru Noolamulela

Nyuwo munimphenta Yehova ni Nuulumo nawe, Biibiliya:

Yesu aahimmye so: “Munosuwela ekekhai, vano ekekhai yeyo enimokhalihani òtaphuwa”. (Yohani 8:32) Nkahaya muupuwelo okathi mwaapacenrye anyu wiixutta ekeekhai ya mBiibiliyani. Mwaahihakalala woona wira hata nikhalaka olumwenku ohireere wootha vanniweryaneya wiixutta ekeekhai.—2 Timótheyo 3:1.

Yehova oniphavela wira otheene ahu niixutte ekeekhai. Nave okhala wira ninnaaphenta atthu, nimphavela waasuweliha ekeekhai voohimya sa Yehova. Musuweleke wira omurumeela Muluku onihela muhina itthu sikina. Nihaana wiimananiha okhalana mikhalelo sa eKristau, mwaha woowi ninnittittimiha malakiheryo a Yehova. Yesu aahihimya enamuna nnooniherya ahu wira ninnimphenta Muluku. Owo aahimmye so: “Mwettelaka soruma saka munokhala mophentani mwaka, ntoko miyo kinettelaka soruma s’Atithi, kinikhalaka mophentani mwaya”.—Yohani 15:10.

Tthiri Yesu onnimphenta Tiithi awe ni onnipaka itthu sotheene Tiithi awe oninvekela awe. Akhala wira nnoomutakiha Yesu, Yehova onooniphenta ni nnoohakalalaka. Tivonto Yesu aahimmye awe wira: “Nyuwo mosuwela itthu iya: vano, mwettelakaru, munoreriwa”.—Yohani 13:17.

Ninnikupali wira eliivuru ela enimookhaliheryani okhala moovarihana ni ekeekhai ya mBiibiliyani ni okhala mpatthani a Muluku. Ninlompa wira omphenta wanyu Muluku otepeke wunnuwa, olipa ni muhihiye okhala “mophentani mwa Muluku, muroromelaka . . . ekumi yohimala”.—Yuda 21.