YOOSOMA 2

Olavula Mwa Enamuna Yoovaanela

2 aKorinto 2:17

MALAKIHERYO: Mulavuleke ntoko munilavula anyu okhala wene, mwa enamuna enooniherya moota munoonela anyu mwaha owo ni moota muniwoonela anyu alipa-oowiriyana.

MOOTA WOOPAKA:

Munvekeleke Yehova ni mwiilokiheryeke oratteene. Nvekeleke wira muthokorerye oratteene mwaha onrowa anyu olavula, ohiya wiithokorerya mmansinyu. Musuweleke oratteene iponto suulupale muniphavela anyu otthokiherya. Mulavuleke mootaphuwa; ohiya paahi osoma moolumo alempwale vapapheloni.

Mwaarowaka omusoma Biibiliya wala eliivuru ekina, muhaana osuwela oratteene mpantta onrowa anyu osoma wira mwaasomaka, moolumo akhumeke vookhweya. Okathi onisoma anyu moolumo a mutthu oniromoliwa, muhaana osoma mwa enamuna yoovara murima, masi ohiya otepiha.
Mulavuleke ni murima wotheene. Okathi onilavula anyu, nwuupuweleke ale anoowiriyanani ni nthowa naya anitthuneya aya wiiwa muhupi orina anyu. Mulavuleke mwaawehaka. Weemela wanyu, othoonya wanyu ni ethoyi anyu sihaana okhala soohipakeleliwa ni sookhalela.

Mulavuleke muhaatakihaka atthu akina ni vohiipakelela. Muttittimiheke muhupi anyu, mulavulaka moowiiwanyeya ni orumeela moolumo ooloka.
Mwaaweheke alipa-oowiriyana. Mwaaweheke owiitho ale anilavulana anyu, eyo yaahikhoottihiweke muttetthe onikhala anyu. Okathi munilavula anyu mwaha, munweheke mutthu mmosa ntoko munilavula ni yena, masi ohiya omuthipelela mutthu mmosaru paahi.