Malakiheryo wa Ale Amurwenle Kongresu

ANAMATHOONYERYA: Anamathoonyerya, muteko aya wookhaliheryani. Xontte, mukhweiherye muteko aya muttharaka oratteene malakiheryo aya, voohimya sa opuro woopweha mikukutta, opuro onivira atthu, osuka opuro wookilaathi, ni itthu sikina.

MAPURO ANIKHALIHERIWA ARETTA: Xontte, muhiliyaleke wira mapuro ala sinithokoreriwa IRETTA SOOTUTUXERYA PAAHI.

MAPURO A SOORIMEELA NI SOOTTOTTIWA: Itthu sotheene sinittottiwa, soohaana oroihiwaka eDepartamento ya Soorimeela ni Soottottiwa. Akhala wira moorimeeliwa etthu, murowe edepartamento yeela wira mwaphavelase etthu yoorimenleni. Anamwane arimenle ahaana oroihiwaka edepartamento yeela. Masi, edepartamento ela ehooniweke ntoko nipuro ninkhapeleliwa anamwane. Xontte, mwaakhapeleleke aniinyu ni akhaleke vakhiviru vanyu.

MISONKHERYO: Woorumeeliwa musurukhu munceene wira okhale opuro oniphiyerya, mikrofooni, ni miteko sikina seiyo sinaakhaliherya atthu omwaattamela Yehova. Nto, misonkheryo sinivaha anyu ni murima wotheene, sinrowa okhaliherya oliverya musurukhu owo orumeeliwe, ni sinnikhaliherya muteko woolaleerya olumwenku wotheene. Wira nookhweiheryeni, mapuro ala sookhala ikaaxa silempwale masu oowi donativos wala misonkheryo. Sinnixukhureliwa vanceene misonkheryo sotheene. Nikhuuru Noolamulela ninnooxukhurelani vahinatthi mwaha wa misonkheryo sanyu mukhaliheryaka miteko sa Omwene.

MUTEKO WOWIIVAHERERYA: Vakhala wira muniphavela wiivahererya wira mukhaliherye, xontte, mulavule ni anna a eDepartamento ya Soohimmwa ni Muteko Woowiivahererya.

OPATISO: Ale yiivaherenrye wira apatisiwe ahaana okilaathi opuro osukeriwa aya ohoolo wa epalku, vahikhanle wira ninrowa othanliwa nipuro nikina. Awo ahaana okilaathi opuro owo ohinatthi opacerya mwaha wa opatiso, eSaabadu voosiisu. Khuta mutthu onrowa opatisiwa, ohaana oruuha etuwalya ni ekuwo yooreerela owara okathi wa opatiso.

OPURO WOOKILAATHI: Xontte mwaattittimiheke atthu akina. Yowuupuxerya: Mwaasukeryeke opuro atthu yaale murwanne anyu hoothe aahiiso ale a vatthokoni vanyu wala ale anaasomiha anyu Biibiliya paahi. Xontte, muhipweheke mirupa sanyu mapuro yaarowa okilaathi atthu akina.

MUTHUKUMANO WA VAMEEKHAAYA

EXIKOLA ENIWIIXUTTIHA ANAMALALEERYA A OMWENE Mapioneero arina iyaakha sinikhuma 23 mpakha 65 yaawo aniphavela wunnuuherya muteko aya, annilattuliwa orowa owiriyana muthukumano wa ale aniphavela orowa Exikola Eniwiixuttiha Anamalaleerya a Omwene, onrowa opakiwa Ettiminku othana. Okathi ni opuro wa muthukumano ola onoohimmwa.