Munrowa Ottottela Sai Mureerelo Omusoma Biibiliya

Niireke mootoko okhulumuwa vaavo muupuwela anyu opacerya muteko muulupale, muhinasuwela nipuro noopacerya? Wira wookhweeleni ovara muteko owo, woonasa wene, nyuwo mwaahikawanya khukhala mipantta saamukhaani. Nyuwo pooti opaka etthu emosaru voohimya sa omusoma Biibiliya. Nto pooti wira munniikoha so: ‘Kipacerye opuro xeeni omusoma Biibiliya?’ Yoosoma ela, ninrowa othokorerya itthu sookhweya mukhanle anyu oopaka wira woosivelekeni ni woohakalalihekeni omusoma Biibiliya.

1. Xeeni vari aya vooloka omusoma Biibiliya khula nihiku?

Mutthu onimusoma Biibiliya wala “nlamulo noomalela” na Yehova, onnihakalala. (Mmusome Yakobo 1:25.) Wanipacerya, nyuwo muhaana omusoma Biibiliya khula nihiku minuutu vakhaani paahi. Vaavo munrowa anyu wiixuttaka Nuulumo na Muluku, munrowa otepaka osiveliwa omusoma Biibiliya.

2. Munrowa ottottela sai mureerelo omusoma Biibiliya?

Wira nittottele mureerelo omusoma Biibiliya, nihaana wuupuwelela ele ninsoma ahu. (Yoxuwa 1:8) Okathi munimusoma anyu Biibiliya, mwiikoheke so: ‘Ela kinsoma aka, enikiixuttiha exeeni voohimya sa Yehova Muluku? Kinrowa ovarihela sai muteko mookumini mwaka? Kinrowa orumeela sai wira kaakhaliherye atthu akina?’

3. Munrowa ophwanya sai okathi wira mmusome Biibiliya?

Niireke vannoovilani ophwanya okathi wira mmusome Biibiliya? Atthu anceene vannaavila. Nto mwiimananiheke orumeela “oratteene okathi anyu”. (aEefeso 5:16) Nyuwo munoopaka eyo mwaavyaka okathi wooreerela wira mmusome Biibiliya khula nihiku. Atthu akina onnaasivela omusoma Biibiliya voosiisu. Akina onaasivela omusoma othana, woonasa wene okathi woolya. Nave atthu akina onaasivela omusoma Biibiliya ohiyu ahinatthi orowa orupa. Ankhi nyuwo, okathi xeeni munoona anyu oreerela omusoma Biibiliya?

MWIIXUTTE ITTHU SIKINA

4. Musiveliweke omusoma Biibiliya

Ekeekhai wira vannivila opacerya omusoma Biibiliya. Masi nyuwo pooti wiixutta ‘ophavela vanceene’, niire so, osiveliwa vanceene omusoma Biibiliya. Etthu emosaru enniiraneya vaavo muniixutta anyu osiveliwa olya yoolya muhitonko anyu olya. Mmusome 1 Pedru 2:2, nuumala-vo mwaakhule nikoho ninttharelana:

• Niireke munoona wira omusoma Biibiliya khula nihiku onimookhaliheryani osiveliwa omusoma Biibiliya?

Nwehe EVIIDIYU ni moone moota atthu akina yaasiveliwe aya omusoma Biibiliya. Nuumala-vo, mwaakhule makoho.

EVIIDIYU: Amiravo Anisiveliwa Osoma Nuulumo na Muluku (5:33)

• Ntoko yoonihenrye aya eviidiyu, mixankiho xeeni saawiiriha amiravo ale ohisiveliwa omusoma Biibiliya?

• Etthu xeeni yaakhalihenrye ohihiya omusoma Biibiliya khula nihiku?

• Etthu xeeni yaapanke aya wira asiveliweke omusoma Biibiliya?

Itthu sinrowa wookhaliheryani opacerya omusoma Biibiliya:

• Mmuthanleke Biibiliya otaphuleliwe saana ni ookhweya omusoma. Nyuwo pooti omusoma Biibiliya a Elapo Esya akhala wira ookhala nttaava nanyu.

• Mpaceryeke osoma mipantta sinoosivelani vanceene. Nwehe malakiheryo vakhaani ekaaxa eni: “Mpacerye Omusoma Biibiliya”.

• Mulepeke ele musomme anyu mBiibiliyani. Nto nyuwo pooti orumeela ekaaxa eni: “Niireke Munnuupuwela Opuro Mmalenle Anyu?”, eliivuru yeela.

• Mmurumeeleke aplikativo JW Library^®. Mmurumeelaka aplikativo owo, nyuwo pooti omusoma ni owiriyana osommwa wa Biibiliya mmurumeelaka selulari, taableti ni komputatore.

• Murumeeleke Malakiheryo Annikhaliherya Osoma Nuulumo na Muluku. Elivirinyu eyo yookhalana maapha ni ikwaaturu sinrowa wookhaliheryani osiveliwa omusoma Biibiliya.

5. Mulokiheryeke yoosoma anyu ya Biibiliya

Musome Esalimo 119:34, nuumala-vo mwaakhule nikoho ninttharelana:

• Xeeni vari aya vooloka ovekela muhinatthi omusoma Biibiliya aahiiso olokiherya yoosoma anyu ya Biibiliya?

Munrowa ottottela sai mureerelo khula yoosoma ya eliivuru ela? Okathi munrowa anyu olokiheryaka yoosoma anyu, mutthareke malakiheryo ala:

1. Musomeke ittima soopacerya sa yoosoma.

2. Musomeke soolepa sa Biibiliya ni mwiimananiheke oweha moota sinivarihana aya ni mwaha onithokoreriwa.

3. Mpintariki moolumo wala ifrase sinaakhula nikoho; eyo enimookhaliheryani othokorerya oratteene ni ole onoosomihani Biibiliya.

Niireke mwaanisuwela?

Anamoona a Yehova aatoko waarumeela aBiibiliya oovirikana. Masi vanninsivela vanceene omurumeela  Biibiliya a Elapo Esya mwaha woowi owo teekeekhai, ookhweya omusoma ni omwiiwexexa ni onnirumeela nsina na Muluku.—Nwehe mwaha ori va jw.org “Niireke Anamoona a Yehova Arina Biibiliya Aya?”

IPONTO SUULUPALE

Wira muttottele mureerelo ele Nuulumo na Muluku ninhimya aya, muhaana waavya okathi wira mmusome Biibiliya, ovekela wira mwiiwexexe ele munisoma anyu ni olokiherya oratteene yoosoma anyu.

Wuuluula

• Etthu xeeni enrowa wookhaliheryani ottottela mureerelo ele Biibiliya oniixuttiha awe?

• Okathi xeeni munoona anyu oreerela omusoma Biibiliya?

• Xeeni vari aya vooloka olokiherya oratteene yoosoma anyu ya Biibiliya?

NWEHE ITTHU SIKINA

Nwehe itthu vakhaani sinrowa wookhaliheryani osiveliwa omusoma Biibiliya.

“Exeeni Enrowa Wookhaliheryani Osiveliwa Omusoma Biibiliya” (Owehaweha N^o. 1 2017)

Nwehe inamuna tthaaru sa omusoma Biibiliya.

“Biibiliya Onrowa Okikhaliherya Sai?—Mpantta 1: Mmusuwele Oratteene Biibiliya” (Mwaha ori va jw.org)

Nwehe moota mukhanle anyu oosiveliwa omusoma Biibiliya.

“Biibiliya Onrowa Okikhaliherya Sai?—Mpantta 2: Mwiirihe Yoosoma Anyu ya Biibiliya Okhala Yoovara Murima” (Mwaha ori va jw.org)

Nwehe malakiheryo avanhe aya atthu akhumme khalai omusoma Biibiliya.

Muttotteleke Mureerelo Yoosoma Anyu ya Omwaneene (2:06)