YOOSOMA 52
Xeeni Vari Aya Vooloka Owara Ikuwo Sooloka ni Wiitthokiha Saana?
Khula mmosa a hiyo, sookhala ikuwo sinimusivela owara ni enamuna ya wiitthokiha. Sookhala miruku sa mBiibiliyani sinrowa onikhaliherya owara mwa enamuna ennisivela ni enimusivela Yehova. Nrowe niwehe malakiheryo vakhaani.
1. Etthu xeeni enrowa onikhaliherya othanla ikuwo ninwara ahu ni moota woowiitthokiha?
Hiyo nimmukokhorela Yehova. Nto nihaana owara ni wiitthokiha mwa enamuna yooloka, ‘owara ikuwo ntoko vaniphwanela aya, vookhalela ni voohuuliha muru’. Niira siiso, nnimooniherya wira ‘ninnimoova Muluku’. (1 Timootheyo 2:9, 10) Nrowe niwehe malakiheryo ala mararu: (1) Nihaana ‘owara ikuwo ntoko vaniphwanela aya ni vookhalela’. Woonasa wene, mooweha wira okathi nimpaka ahu mithukumano sahu, ninniwara ikuwo sooloka. Ikuwo ninwara ahu ni moota ninlokiherya ahu ikharari sahu, ninnooniherya wira ninnimuttittimiha Muluku ahu Yehova. (2) Ikuwo ninwara ahu ti ‘sookhalela’, niire so, khaninwara ikuwo wira nihimmweke ni atthu akina. (3) Ninniwara mwa enamuna ya “nttittimiho” nihitakihaka mawarelo a atthu a olumwenku ola. (4) Ninniitthokiha mwa enamuna enooniherya wira ‘ninnimoova Muluku’, nto atthu akina vannaakhweela woona wira nimmukokhorela Muluku eekeekhai.—1 aKorinto 10:31.
2. Xeeni vari aya vooloka owuupuwela anna ni arokora okathi ninthanla ahu ikuwo sahu?
Ekeekhai wira otheene ahu nookhalana eparakha yoothanla ikuwo nimphavela ahu owara. Hata vari siiso, nihaana wuupuwela moota atthu akina anrowa aya woonela ikuwo sahu. Nave nihaana wiimananiha wira enamuna ninwara ahu ehaakwattulihe atthu akina. Yoolakela ahu ori ‘ophavela omusiveliha mukhwiihu ninvarelaka itthu sooreera, wira nimulipihe’.—Mmusome aRoma 15:1, 2.
3. Enamuna ninwara ahu enrowa waakhaliherya sai atthu akina omusuwela Yehova?
Hiyo nihaana wiitthokiha saana okathi wootheene. Otepexa wene okathi ninrowela ahu mithukumano ni olaleerya. Khanimphavela wira enamuna ninwara ahu, ewiiriheke atthu akina ohisiveliwa ihapari ninlaleya ahu. Ohiya-vo, nimphavela owara ni wiitthokiha mwa enamuna ‘enireeriha mwiixuttiho wa Moopoli ihu, Muluku’. Niira siiso, atthu akina anoophavela omusuwela Yehova.—Tito 2:10.
MWIIXUTTE ITTHU SIKINA
Nwehe moota ninwara ahu ni wiitthokiha onaakhaliherya aya atthu akina woona wira na makristau eekeekhai.
Moota ninwara ahu ni wiitthokiha, ennooniherya akhala wira ninnaattittimiha makhulupale a kuvernu aahiiso nnaari. Mwa enamuna emosaru, moota ninwara ahu ni wiitthokiha, ennooniherya akhala wira ninnimuttittimiha Yehova, hata owo osuwelaka ele eri vamurimani vahu
4. Wiitthokiha saana onnooniherya wira ninnimuttittimiha Yehova
Etthu xeeni yuulupale enniiriha ovarerya enamuna ninwara ahu ni wiitthokiha? Musome Esalimo 47:3, nuumala-vo mwaakhule makoho anittharelana:
Hiyo na arumeyi a Yehova. Osuwela eyo, ennikhaliherya sai owara saana?
Xeeni vari aya vooloka ovarerya moota ninwara ahu naarowaka omuthukumanoni ni olaleerya? Mwaha wa xeeni?
5. Etthu xeeni enrowa onikhaliherya opaka soothanla sooloka sa moota woowara ni wiitthokiha?
Khivanitthuneya ikuwo sahu okhala sa musurukhu munceene. Masi sihaana okhala sooloka, sookatthiwa ni sinivarihana ni opuro ni okathi owo. Mmusome 1 aKorinto 10:24 ni 1 Timootheyo 2:9, 10. Nuumala-vo, nwehe xeeni ninreerela ahu ohiwara ikuwo . . .
soonanara ni soohikhalela.
sootita, soopera-periwa, soowoonela muhina aahiiso sookhuveya.
Khalai, omurumaka Moise, Yehova aahaavaha Malamulo manceene arumeyi awe. Makristau khanikhanyereriwa wiiwelela malamulo Yehova anvanhe awe Moise. Masi malamulo awo, anniniixuttiha vanceene etthu Yehova onuupuwela awe. Mmusome Otumererya 22:5, nuumala-vo mwaakhule nikoho ninttharelana:
Xeeni ninreerela ahu ohiwara ikuwo ni olokiherya ikharari sinawiiriha atthu ohisuwela naari ene mulopwana aahiiso muthiyana?
Mmusome 1 aKorinto 10:32, 33 ni 1 Yohani 2:15, 16, nuumala-vo mwaakhule makoho anittharelana:
Xeeni vari aya vooloka wiikoha so: ‘Kiireke enamuna kiniwara aka ni wiitthokiha pooti omukwattuliha munna a mmulokoni aahiiso atthu a muttetthe kinikhala aka?’
Elapo munikhala anyu, atthu aniwara sai ni aniitthokiha sai?
Munoona wira vaamureerela mukristau owara ni wiitthokiha ntoko atthu a elapo munikhala anyu? Nthowa xeeni?
Hiyo pooti owara ni wiitthokiha mwa inamuna soovirikana. Hata vari siiso, nnamusiveliha Yehova
ATTHU AKINA ANIHIMYA WIRA: “Miyo kookhalana ediretu yoowara ntoko kiniphavela aka, moohicikha moota atthu akina anoonela aya”.
Nyuwo munnikupali eyo? Mwaha wa xeeni?
IPONTO SUULUPALE
Okathi nimpaka ahu soothanla sooloka sa moota ninwara ahu ni wiitthokiha, ninnooniherya wira ninnimuttittimiha Yehova ni atthu akina.
Wuuluula
Xeeni Yehova onivaha awe efaita enamuna ninwara ahu ni wiitthokiha?
Miruku xeeni sa mBiibiliyani sinrowa onikhaliherya opaka soothanla sooloka sa moota woowara ni wiitthokiha?
Moota xeeni enamuna ninwara ahu ni wiitthokiha enrowa aya waakhaliherya atthu omusuwela Yehova aahiiso ohimusuwela?
NWEHE ITTHU SIKINA
Okathi atthu aniweha aya ikuwo sanyu, anuupuwela exeeni voohimya sa nyuwo?
Nwehe itthu munreerela anyu wuupuwela muhinatthi ompaka tatuwaaxe.
“Biibiliya Onihimya Exeeni sa Ompaka Tatuwaaxe?” (Mwaha ori va jw.org)
Nwehe miruku sinrowa wookhaliheryani othanla ikuwo munreerela anyu owara.
“Niireke Mawarelo Anyu Anninvuwiha Muluku?” (Owehaweha, Setembro 2016)
Nwehe etthu yaamukhalihenrye muthiyana mmosa aaphavela omusiveliha Muluku weemererya enamuna atthu akina aniwara aya.
“Moota Kaawara Aka ni Wiitthokiha Naari Nluku Naakikwattuliha” (Nvenye!, 22 a Dezembro, 2003)