Wiiyeviha

Yoolepa: “Mwiiyeviheke, khula mutthu awooneleke vatthu akhwaawe ovikana mmensawe”. — aFil. 2:3.

Etthu Paulo Aapanke Awe

Murummwa Paulo otthukweleliwe ene ni kwaarta, omulavulihaka Mwene Agripa, Kuvernatoro Festo, ni Berenisi.

EVIIDIYU: Paulo Omulaleeryaka Mwene Agripa

1. Nwehe EVIIDIYU, aahiiso musome Miteko 26:2, 3. Nuumala-vo, mwaakhule makoho anittharelana:

Paulo oonihenrye sai wiira aari mutthu oowiiyeviha, okathi aalavunle awe ni mwene Agripa?
Ohiya ophavela okupaliwa yena, murummwa Paulo anvuwihale sai Yehova ni oonihenrye sai wiira itthu iixuttiha awe saakhuma mBiibiliyani? — Nwehe Miteko 26:22.

Etthu Paulo Onniixuttiha Awe

2. Ihapari ninlaleya ahu, sinnitepa waavara murima atthu, akhala wiira ninlavula mwa enamuna enooniherya wiiyeviha ni nttittimiho.

Mmutakiheke Paulo

3. Mulavuleke mwa enamuna enooniherya nttittimiho. Musyakeke omwiiriha mutthu owo woona wiira nyuwo munnisuwela itthu sootheene, masi owo khonisuwela etthu.

4. Atthu aweryeke woona wiira itthu muniixuttiha anyu sinkhuma mBiibiliyani. Moolumo ari mBiibiliyani, pooti onvara murima mutthu. Okathi nimmurumeela ahu Biibiliya, ninnaakhaliherya atthu okupali Nuulumo na Muluku, ohiya okupali muupuwelelo ahu.

5. Nvoleke murima. Muhithipeleleke ophavela wooniherya wiira mookhalana erasau. Hiyo, khanimphavela onyakulihana. Mwiiyeviheke ni nvoleke murima. Nave musuweleke okathi onireerela aya okhuma vatthokoni-vo. (Mir. 17:14; Tito 3:2) Akhala wiira munoomwaakhula mutthu owo muhinanariwe, pooti omwiiriha ophavela owiriyana nihiku nikina.

NWEHE-THO SOOLEPA IYA:

aRom. 12:16-18; 1 aKor. 8:1; 2 aKor. 3:5.