WAAPAKA AWIIXUTTI
YOOSOMA 11
Wiixuttiha Mwa Enamuna Yookhweya
Yoolepa: ‘Mulavuleke moolumo ookhweya wiiwexexa’. — 1 aKor. 14:9.
Etthu Yesu Aapanke Awe
1. Nwehe EVIIDIYU, aahiiso mmusome Matheyo 6:25-27. Nuumala-vo, mwaakhule makoho anittharelana:
Yesu aahimmye exeeni wiira ooniherye moota Yehova onnikhapelela awe?
Yesu aanisuwela itthu sinceene sa axipalame wala axinuuni, masi aaromonle etthu emosa paahi. Etthu xeeni eyo? Xeeni eyo yaari aya enamuna yooreera ya owiixuttiha atthu?
Etthu Yesu Onniixuttiha Awe
2. Naawiixuttihaka atthu mwa enamuna yookhweya, awo animuupuwela itthu ninwiixuttiha ahu, nave nnimwaavara murima.
Mmutakiheke Yesu
3. Muhaatteke soohimya. Ohiya olavula itthu sootheene munisuwela anyu sa mwaha owo, mmutthokiheryeke paahi mwaha onilavuliwa mpantta owo munisoma anyu. Nuumala omukoha etthu naxikola anyu, munvaheke okathi wiira aakhule. Akhala wiira khonisuwela waakhula nikoho nno, aahiiso onihimya etthu enivirikana ni ele Biibiliya oniixuttiha awe, mmukoheke itthu sikina sinrowa omukhaliherya wuupuwelela mwaha owo. Akhala wiira ohiiwa saana mwaha owo, nvikaneke.
4. Mmukhaliherye naxikola anyu woona moota itthu iixuntte awe khalai, sinivarihana aya ni iye oniixutta awe niinaano. Mwa ntakiheryo, muhinatthi opacerya osoma mwaha onilavula sa ohihimuxiwa wa alipa-ookhwa, nyuwo pooti wuuluula ni naxikola owo, itthu iixuntte awe yoosoma yaalavula sa mukhalelo wa alipa-ookhwa.
5. Murumeeleke saana malikanyiho. Muhinatthi olavula nlikanyiho nimosa, mwiikoheke so:
‘Kiireke nlikanyiho nna ti nookhweya?’
‘Kiireke naxikola aka vanoomukhweela wiiwexexa nlikanyiho nla?’
‘Kiireke naxikola aka onrowa wuupuwelaka nlikanyiho nna paahi, aahiiso eponto yuulupale ya mwaha ola?’