WAAPAKA AWIIXUTTI
YOOSOMA 12
Ohoovelela
Yoolepa: “Sowunkhela n’irupani, otteliha murima: miruku sa mpatthani, olipiha eroho”. — Mir. 27:9.
Etthu Yesu Aapanke Awe
1. Nwehe EVIIDIYU, aahiiso mmusome Marko 10:17-22. Nuumala-vo, mwaakhule makoho anittharelana:
Woonasa wene, mikhalelo xeeni sooreera Yesu anwehanne awe mmiravo ole namalamulela?
Xeeni Yesu aareerela awe wooniherya ophenta ni ohoovelela, wiira onvahe miruku mulopwana ole?
Etthu Yesu Onniixuttiha Awe
2. Hiyo nihaana omooniherya naxikola ahu wiira ninnimphenta. Masi-tho nihaana omutthokiherya etthu onireerela awe opaka wiira otepeke olipiha waataana wawe ni Yehova.
Mmutakiheke Yesu
3. Mmukhaliherye naxikola anyu osuwela itthu okhanle awe oopaka ni moota okhanle awe oopaka.
Murumeele mpantta oni “Yoolakela aka”, ori khula yoosoma ya eliivuru Okumi Woohimala!
Mmukhaliherye naxikola anyu oweha itthu onireerela awe opaka, wiira ophwanye itthu oniphavela awe niinaano-va ni ohoolo.
Okathi ti okathi, mmuttottopeleke naxikola anyu mwaha woowi onnikelela ohoolo.
4. Nweheke itthu sinimukhoottiha naxikola anyu okelela ohoolo, nave mmukhaliheryeke oxintta itthu iyo.
Mwiikoheke so:
‘Akhala wiira naxikola aka khonirowa ohoolo wiira opatisiwe, etthu xeeni enimukhoottiherya?’
‘Kipake exeeni wiira kimukhaliherye?’
Munvekeleke Muluku wiira oovaheeni olipa murima, wiira muhoovelele omuleela naxikola anyu mwa enamuna yooreerela, etthu okhanle awe oopaka.
5. Muhiye omusomiha Biibiliya naxikola ohinrowa ohoolo.
Wiira musuwele vakhala wiira naxikola anyu a Biibiliya onnirowa ohoolo, mwiikoheke so:
‘Kiireke naxikola aka onneettela itthu oniixutta awe?’
‘Kiireke onnirowela mithukumano sa mmulokoni ni onnaaleela atthu akina itthu oniixutta awe?’
‘Vakhala wiira woovira okathi omusomaka Biibiliya, kiireke onniphavela okhala Namoona a Yehova?’
Etthu yoopaka vakhala wiira naxikola a Biibiliya khonirowa ohoolo:
Munvekele wiira uupuwele etthu woonasa wene enimukhoottiherya orowa ohoolo.
Mwa enamuna yooreerela murima, mmutthokiherye mathowa aniwiirihani ohiya omusomiha Biibiliya.
Mmuleele itthu sinireerela awe olokiherya, muhinatthi otthikela omusomiha Biibiliya.