Malakiheryo a Moota Woopaka Muthukumano wa Okumi ni Orummwa Ahu wa Ekristau

Myaha Sinithokoreriwa

1. Malakiheryo ari etukumento ela animwaakhaliherya atthu ootheene aniirela mpantta muthukumano Okumi ni Orummwa Ahu wa Ekristau. Muhinatthi olokiherya mpantta anyu, mpaceryeke toko osoma malakiheryo a Ekaderno Okumi ni Orummwa Ahu wa Ekristau ni malakiheryo ari etukumento ela. Anamalaleerya ootheene ahaana otumereriwa wiira avaheke masina aya para opaka mipantta sa anaxikola. Nave anaxikola a Biibiliya ahincompela mithukumano pooti wiirela mpantta akhala wiira anneemererya itthu Biibiliya oniixuttiha awe ni anneettela malakiheryo a mbiibiliyani mookumini mwaya. Mutokweene a muthukumano Okumi ni Orummwa ahu ohaana othokorerya itthu sinivekeliwa mbiibiliyani ni anaxikola a Biibiliya ahikhanle anamalaleerya wiira oweha akhala wiira anniphwanelela aahiiso nnaari, nuumala-vo ohaana waaleela akhala wiira anniphwanelela aahiiso khaniphwanelela. Owo ohaana opaka eyo ori ene ni namalaleerya onimusomiha mutthu owo (aahiiso ori ene ni paapa aahiiso maama awe akhala wiira Anamoona a Yehova). Itthu sinivekeliwa ti seiye anivekeliwa aya ale aniphavela okhala anamalaleerya oohipatisiwa. — od muru 8, ettima 8.

MASU OOPACERYA

2. 1 minuutu. Khula esumana, nuumala wiipiwa nsipo noopacerya ni opakiwa nivekelo, muhooleli a Okumi ni Orummwa Ahu ohaana olavula itthu vakhaani sinrowa othokoreriwa wiira aakhaliherye alipa-oowiriyana osiveliwa myaha sinrowa othokoreriwa. Nave muhooleli ohaana ottittimiherya iponto sinrowa waakhaliherya vanceene alipa-oowiriyana.

MIHAKHU SINIKHUMA MBIIBILIYANI

3. Mwaha: 10 minuutu. Okumi ni Orummwa Ahu, Ekaderno Enirumeeliwa Omuthukumanoni enniruuha muru ni iponto piili aahiiso tthaaru sa mwaha owo. Mpantta ola ohaana ovahiwa mutokweene aahiiso murumeyi ookhaliherya oophwanelela. Esumana enipacerihiwa aya osommwa eliivuru emosa ya mbiibiliyani, enimooniheriwa eviidiyu ya masu oopacerya a eliivuru eyo ya mbiibiliyani. Mulipa-oolavula mwaha ohaana wooniherya ovarihana okhanle eviidiyu ni mwaha onilavula awe. Nave ohaana otthokiherya oratteene iponto sootheene sa mwaha owo siri Ekaderno Enirumeeliwa Omuthukumanoni. Nave wakhala okathi, mulipa-oolavula mwaha ohaana otthokiherya ifootu siri Ekaderno Enirumeeliwa Omuthukumanoni, seiyo sipakiwe para wiiwanyeiha oratteene mwaha owo. Nave-tho, mulipa-oolavula mwaha pooti orumeela iponto sikina akhala wiira iponto iyo sinookhaliherya ottittimiherya iponto siri Ekaderno Enirumeeliwa Omuthukumanoni.

4. Itthu sa Efaita sa Mbiibiliyani: 10 minuutu. Mpantta ola ti wa makoho ni waakhuliwa, khompirisari olavula masu oopacerya aahiiso oomaliherya. Nave mpantta ola ohaana opakiwa ni mutokweene aahiiso murumeyi ookhaliherya oophwanelela. Owo ohaana opaka makoho ootheene. Nave-tho, owo pooti othanla osoma aahiiso ohisoma soolepa siromoliwe. Alipa-oowiriyana ahaana okomentari isekuntu 30 aahiiso ohiphiya.

5. Omuleeri Biibiliya: 4 minuutu. Mpantta ola ohaana ovahiwa mulopwana. Owo ohaana osoma paahi mpantta othanleliwe awe, voohilavula etthu wanipacerya nnakhala wanikisa. Muhooleli a muthukumano ohaana ophavela woona vakhala wiira naxikola owo ovahiwe onnisoma oratteene, voowiiwanyeya, ottittimiherya masu voophwanelela, oturuka nsu, omumulela olavula ni olavula voohimutakiha mutthu. Okhala wiira iveersu sikina sa mbiibiliyani ti sookhuveya ni sikina ti soorakama muhooleli a muthukumano ohaana osuwela makhalelo anaxikola ohinatthi waathanlela ipantte saya.

MUKHALELEKE NTHITI MUTEKO WOOLALEERYA

6. 15 minuutu. Mpantta ola opakiwe wiira owiixuttiheke atthu ootheene moota woolaleerya, osuwela ovaanela, olaleerya ni wiixuttiha. Vaareerelaka, axitokweene pooti ovahiwa mipantta sa anaxikola. Khula naxikola ohaana osoma ni weettela malakiheryo a soosoma sa ebroxuura Wiixuttiha aahiiso ebroxuura Waaphenta Atthu, soosoma iyo siri entreparênteses waattamela yoothanleliwa anyu Ekaderno Enirumeeliwa Omuthukumanoni. Okathi mukina onookhalaka mpantta orina malakiheryo ani: “Mwaha ni makoho”. Nto, mpantta owo ohaana othanleliwa mutokweene aahiiso murumeyi ookhaliherya oophwanelela. — Nwehe ettima 15 voohimya sa mipantta sirina malakiheryo ani: “Mwaha ni makoho”.

7. Ovaanela Woopacerya: Mpantta ola pooti opakiwa ni alopwana aahiiso athiyana. Akhala muthiyana namakhaliherya awe ohaana okhala muthiyana, akhala mulopwana, namakhaliherya awe ohaana okhala mulopwana aahiiso ohaana okhala mmusi aahiiso a etthoko emosaru. Awo pooti othanla weemela aahiiso okilaathi. — Wiira nwehe soohimmwa sikina sa yoothanleliwa eyo ni myaha sene mukhanle anyu oorumeela, nwehe ettima 12 ni 13.

8. Ohihiya Waakhaliherya: Mpantta ola pooti opakiwa ni alopwana aahiiso athiyana. Akhala muthiyana namakhaliherya awe ohaana okhala muthiyana, akhala mulopwana, namakhaliherya awe ohaana okhala mulopwana. (km-T 5/97 epaaxina 3) Ale anipaka mpantta ola pooti weemela aahiiso okilaathi. Naxikola owo ohaana wooniherya etthu yoohimya okathi nnaakhaliherya ahu atthu yaasiveliwe okathi woovaanela woopacerya. — Wiira nwehe soohimmwa sikina sa yoothanleliwa eyo ni myaha sene mukhanle anyu oorumeela, nwehe ettima 12 ni 13.

9. Waapaka Awiixutti:. Mpantta ola pooti opakiwa ni alopwana aahiiso athiyana. Akhala muthiyana namakhaliherya awe ohaana okhala muthiyana, akhala mulopwana, namakhaliherya awe ohaana okhala mulopwana. (km-T 5/97 epaaxina 3) Ale anipaka mpantta ola pooti weemela aahiiso okilaathi. Mpantta ola ohaana wooniherya yoosoma ya Biibiliya epacenrye ni enikela vahoolo. Khompirisari olavula moolumo oopacerya aahiiso oomaliherya, vahikhanle wiira mpantta owo onivekela opaka eyo. Nave khompirisari osoma moowiiwanyeya ittima sa mpantta owo, masi vaareerelaka pooti opaka eyo.

10. Otthokiherya Sookupali Sanyu: Akhala wiira mpantta ola onrowa okhala mwaha, ohaana ovahiwa mulopwana. Akhala wiira yoowooniherya pooti opakiwa ni muthiyana aahiiso mulopwana. Akhala muthiyana namakhaliherya awe ohaana okhala muthiyana, akhala mulopwana, namakhaliherya awe ohaana okhala mulopwana, aahiiso ohaana okhala mmusi wala mutthu a etthoko emosaru. Naxikola owo ohaana waakhula nikoho na mwaha mwa enamuna yoowiiwanyeya ni mooreerela murima, owo ohaana orumeela ereferensia eromoliwe. Naxikola owo pooti othanla oromola aahiiso ohiromola opuro okumihiwe aya mwaha awe.

11. Mwaha: Mpantta ola ohaana ovahiwa mulopwana ni ohaana olavula mwaha ntoko myaha sinilavuliwa mmulokoni. Akhala wiira mwaha awe onivarihana ni apendise A a ebroxuura Waaphenta Atthu, naxikola owo ohaana wooniherya moota yoolepa aahiiso soolepa sikhanle aya oorumeeliwa okathi woolaleerya. Mwa ntakiheryo, owo pooti otthokiherya okathi ekhanle aya oorumeeliwa yoolepa, ele enitaphulela aya ni moota woovaanela aahiiso waatthokiherya atthu akina. Akhala wiira mwaha owo onivarihana ni yoosoma ya ebroxuura Waaphenta Atthu, naxikola owo ohaana ottittimiherya moota nikhanle ahu ooweettela itthu nniixutta ahu naalaleeryaka. Owo pooti ottittimiherya ntakiheryo na eponto ya yoosoma aahiiso soolepa sikina siheliwe muhina yoosoma eyo, vakhala wiira sinookhaliherya vanceene.

12. Myaha Para Orumeela: Malakiheryo ari ettima ela ni ettima enittharelana anivarihana ni soothanleliwa sini: “Ovaanela Woopacerya” ni “Ohihiya Waakhaliherya”. Vaahikhale wiira eri etthu ekina ehimmwale, yoolakela ya naxikola owo omuleela mutthu onivaanelana awe ekeekhai ya mbiibiliyani ya efaita yinceene enrowa omusivela mutthu owo ni ohiya nikoho para otthikela omuxukurya aahiiso ovaanela. Naxikola owo ohaana othanla mwaha wooreerela, onrowa omukhaliherya mutthu owo okathi wooreerela ni onrowa waakhaliherya atthu a muttetthe owo. Owo pooti othanla akhala wiira onoovaha eliivuru aahiiso wooniherya eviidiyu eri ekaaxa ahu ya Ikaruma Sinnikhaliherya Wiixuttiha. Ohiya otekorari aahiiso ohela mmuru enamuna ya opaceriha ovaanela, naxikola owo ohaana wiixutta osuwela opaceriha ovaanela, ooniheryaka mikhalelo ntoko waathokorerya atthu ni olavula ntoko ninlavula ahu khula nihiku.

13. Mipantta: Naxikola ohaana orumeela mipantta othanleliwe awe ni ovarihela muteko moovarihana ni makhalelo a mapuro awo. Mwa ntakiheryo:

(1) Olaleerya mmaitthokoni: Mpantta ola onihela muhina olaleerya empa ni empa, ni telefoni aahiiso olepa ikarta. Nave onihela muhina omukhaliherya mutthu onisiveliwa ikeekhai namphwannye ahu nirumeelaka inamuna iyo tthaaru, seiyo sinihela muhina olaleerya mmaitthokoni.
(2) Olaleerya moohiilokiherya: Mpantta ola onnooniherya moota woottottela mureerelo khula eparakha enikhumelela wiira nilaleerye moohiilokiherya. Pooti ohela muhina waaleela atthu yoolepa ya mbiibiliyani omutekoni, oxikola, mavisiinyu ahu, muxaapani aahiiso mapuro makina nivaraka miteko sahu sa khula nihiku.
(3) Olaleerya mapuro oowaatta atthu: Mpantta ola onihela muhina olaleerya ni ekarinyu, waalaleerya atthu mapuro oneettiwa nakoso, mustaraatani, mpaarikhi, mapuro aneemela ikaaro ni mapuro makina nnaaphwanya ahu atthu.

14. Orumeela Iviidiyu ni Iliivuru Sahu: Moovarihana ni makhalelo naxikola pooti othanla ottittimiherya eviidiyu aahiiso eliivuru. Akhala wiira mpantta wa naxikola owo onihela muhina eviidiyu aahiiso onithanla ottittimiherya eviidiyu, owo pooti ohimya eviidiyu ene ni olavula sa eviidiyu eyo, masi khokhanle oowooniherya.

MAKHALELO A MAKRISTAU

15. Nuumala wiipa nsipo, minuutu 15 sinittharelana sinrowa orumeeliwa wiira opakiwe mpantta mmosa aahiiso miili, sinrowa waakhaliherya alipa-oowiriyana weettela oratteene Nuulumo na Muluku. Vaahikhale wiira eri yoohimmwa ekina, myaha sa mpantta ola ahaana ovahiwa axitokweene ni arumeyi ookhaliherya oophwanelela, masi mpantta wa sootthuneya sa mmulokoni ahaana ovahiwa axitokweene paahi. Akhala wiira mpantta owo aakhala malakiheryo anihimya wiira: “Mwaha ni makoho”, ohiya paahi opaka makoho a mmpantta owo, mulipa-oolavula mwaha pooti opaka makoho makina khula okathi onipaka awe mpantta awe. Owo ohaana olavula moolumo oopacerya moowaakuveya wiira okhalane okathi wooreerela wiira ottittimiherye iponto suulupale ni alipa-oowiriyana wiirela mpantta. Akhala wiira mpantta owo wookhalana entrevista, ti vooloka vaaweryaneyaka mutthu owo waakhula ori ene opalkuni ohiya opuro okilaathale awe.

16. Yoosoma ya Biibiliya ya Muloko: 30 minuutu. Okhala wene mpantta ola ohaana ovahiwa mutokweene oosuwela wiixuttiha. (Miloko seiye sirina axitokweene vakhaani, pooti waathanla arumeyi ookhaliherya oophwanelela, vaareerelaka.) Nikhuuru na axitokweene nihaana waathanla ale aniphwanelela ohoolela Yoosoma ya Biibiliya ya Muloko. Ale anithanliwa ahaana osuwela weettiha muthukumano owo wiira ahivirihe okathi. Nave ahaana wiiwanyeiha saana soolepa sinittittimiherya mwaha owo, ni waakhaliherya alipa-oowiriyana woona ovareleya waya muteko mwaha owo onithokoreriwa ni moota woweettela. Nto anna awo anihoolela, ahaana otthara malakiheryo a moota wohoolela mpantta orina makoho ni waakhuliwa. (w23.04 epaaxina 24, ekaaxa). Nuumala woona wiira mwaha onithokoreriwa oohiiwanyeya saana khivanpirisari waattiha soohimya. Vaweryaneya ahaana orumeeliwa anna oovirikana wiira ahooleleke ni asomeke ittima khula esumana. Akhala wiira muhooleli a muthukumano Okumi ni Orummwa Ahu onnivekela wiira yoosoma eyo ehiphiye minutu 30, ole onihoolela yoosoma eyo ohaana weettiha moovarihana ni yooveka eyo. Nto, owo pooti othanla ohisommwa ittima sikina, masi opaka makoho paahi.

MASU OOWUULUULA

17. 3 minutu. Muhooleli a Muthukumano Okumi ni Orummwa Ahu, ohaana wuuluula iponto soovara murima sithokoreriwe muthukumano wootheene. Ohaana ohimya myaha sinrowa othokoreriwa esumana enittharelana. Nave wahala okathi, owo pooti ohimya masina a anaxikola anrowa okhalana ipantte esumana enittharelana. Vakhala wiira sookhala soohimmwa aahiiso osoma ekarta, muhooleli ohaana orumeela okathi awe wa masu ookiserya wiira opake soohimmwa iyo aahiiso osoma ekarta vaahikhanle wiira eri etthu ekina. Soohimmwa ntoko mareheryo a limpesa a Empa ya Omwene ni muteko woolaleerya, ahisommweke vatribuna masi ahaana othomeiwa va kwaaturuni ya soohimmwa. Pooti wiira minuutu 3 khasinrowa ophiyerya opaka soohimmwa ni osoma ekarta aahiiso ikarta sootheene. Nto, akhala wiira eyo enimwiiraneya, muhooleli a muthukumano ohaana omananiha ophavela okathi, woonasa wene aavekelaka anna anipaka ipantte sa Makhalelo a Makristau wiira amuhiyerye okathi vakhaani. (Nwehe ettima 16 ni 19.) Muthukumano ohaana omalihiwa ni nsipo ni nivekelo.

OTTOTTOPELA NI OVAHA MIRUKU

18. Nuumala khula naxikola opaka mpantta awe, muhooleli a muthukumano Okumi ni Orummwa Ahu ookhalana 1 minutu wiira omuttottopele ni onvaha miruku naxikola owo moovarihana ni yoosoma aathanleliwe awe. Okathi muhooleli onimwiitthana awe khula naxikola, muhooleli khonrowa ohimya yoosoma othanleliwa awe. Masi, nuumala naxikola omaliha mpantta awe, muhooleli ohaana omuttottopela ni murima wootheene ni aphavela pooti ohimya yoosoma naxikola owo aathanleliwe awe ni ohimya itthu sooloka naxikola owo opanke awe saana aahiiso omutthokiherya mooreerela murima etthu onireerela awe olokiherya ni moota okhanle awe oopaka eyo. Nave muhooleli pooti ohimya itthu sikina, akhala wiira itthu iyo sinoomukhaliherya naxikola owo ni alipa-oowiriyana. Aphavela, wanikisa wa mithukumano aahiiso okathi mukina, muhooleli pooti onvaha miruku sinrowa omukhaliherya naxikola owo sinivarihana ni ebroxuura Waaphenta Atthu, ebroxura Osoma ni Wiixuttiha aahiiso eliivuru Beneficie-se voohimya sa mpantta aathanleliwe awe aahiiso etthu ekina. — Soohimmwa sikina voohimya sa muteko wa muhooleli a Muthukumano Okumi ni Orummwa Ahu ni namavaha miruku ookhaliherya, nwehe ettima 19, 24, ni 25.

OKATHI

19. Khuuvo mutthu oneemereriwa oviriha okathi othanleliwe awe. Hata muhooleli a muthukumano Okumi ni Orummwa Ahu, khoneemereriwa oviriha okathi. Nnaamwi Okumi ni Orummwa Ahu wa Ekristau — Ekaderno Enirumeeliwa Omuthukumanoni ehimyaka okathi wa khula mpantta, eyo khentaphulela wiira nuumala otthokiherya oratteene mpantta anyu onahala okathi, muhaana ohimya itthu sikina wiira mmalihe okathi oromoliwe. Akhala wiira munna onniviriha okathi, owo ohaana ovahiwa miruku ni muhooleli a muthukumano Okumi ni Orummwa Ahu wa Ekristau aahiiso ni namavaha miruku ookhaliherya. (Nwehe ettima 24 ni 25.) Muthukumano wootheene ohela muhina isipo ni mavekelo ohaana omala muhina mwa ewoora 1 ni 45 minuutu.

ESUMANA ONIXUKURYA AWE MUTOKWEENE A ESIRKWIITU

20. Okathi mutokweene a esirkwiitu onixukurya awe muloko, muthukumano ohaana opakiwa moovarihana ni Ekaderno Okumi ni Orummwa Ahu. Masi Yoosoma ya Biibiliya ya Muloko eri mpantta wa Makhalelo a Makristau ehaana oranttelihiwa ni mwaha woopacerya wa mutokweene a esirkwiitu. Ohinatthi olattuliwa mutokweene a esirkwiitu, munna onihoolela muthukumano wa Okumi ni Orummwa Ahu ohaana wuuluula myaha sithokoreriwe ni ohimya sa esumana enittharelana, opaka soohimmwa sootheene, aahiiso osoma ikarta saakheliwe, nuumala-vo omwiitthaneke mutokweene a esirkwiitu. Nuumala olavula mwaha awe, mutokweene a esirkwiitu onrowa omaliha muthukumano ni nsipo othanlale awe. Nave pooti omulattula munna wiira opake nivekelo nookiserya. Okathi mutokweene a esirkwiitu onixukurya awe muloko, khivanipirisari okhala esaala ekina enipakiwa ipantte sa nttaava na muloko owo. Akhala wiira muloko owo wookhalana ekurupu, pooti opaka mithukumano esaala ekina. Masi ekurupu eyo ehaana okhala ni muloko onixukuriwa okathi wa mwaha wa mutokweene a esirkwiitu.

ESUMANA YA ASEMBELEYA AAHIISO KONGRESU

21. Esumana ya asembeleya aahiiso kongresu, khasinipakiwa mithukumano mmulokoni. Atthu ootheene a mmulokoni ahaana wuupuxeriwa ni otumereriwa othokorerya owaani eprograma ya esumana eyo.

ESUMANA YA WUUPUWELELA OKHWA WA KRISTU

22. Akhala wiira Wuupuwelela onrowa okhala eriyari ya esumana, muthukumano wa Okumi ni Orummwa Ahu, khonrowa okhala.

MUTOKWEENE A MUTHUKUMANO OKUMI NI ORUMMWA AHU

23. Nikhuuru na axitokweene, nihaana omuthanla mutokweene mmosa wiira okhale mutokweene a muthukumano Okumi ni Orummwa Ahu. Owo tokhanle oweha akhala wiira mithukumano ti sootthokiheya ni annitthariwa malakiheryo ninvahiwa ahu. Nave owo ohaana ovaanelaka oratteene ni namavaha miruku ookhaliherya. Nuumala okumiheriwa Okumi ni Orummwa Ahu wa Ekristau — Ekaderno Enirumeeliwa Omuthukumanoni, mutokweene a muthukumano Okumi ni Orummwa Ahu ohaana waathanlela anna ni arokora anrowa opaka ipantte mithukumano sa eriyari ya esumana para myeeri miili. Eyo enihela muhina ipantte sihikhanle sa anaxikola. Nave ohaana omuthanla muhooleli a mithukumano sa eriyari ya esumana (masi ahaana okhala axitokweene athanliwe ni nikhuuru na axitokweene) ni soothanleliwa sa anaxikola. (Nwehe ettima 3-16 ni 24.) Okathi onipaka awe soothanleliwa sa anaxikola, owo ohaana oweha iyaakha ni itthu onisuwela awe naxikola owo ni akhala wiira onoowerya olavula ni otthokiherya oratteene mwaha ene. Owo ohaana opaka etthu emosaru okathi onaathanlela awe ipantte sikina anna. Khula yoothanleliwa ohaana waavahererya axineene sihalaka isumana tthaaru. Owo ohaana orumeela eformulaario Yoothanleliwa ya Muthukumano Okumi ni Orummwa Ahu wa Ekristau (S-89) para soothanleliwa sa anaxikola. Mutokweene a muthukumano Okumi ni Orummwa Ahu ohaana oweha akhala wiira eprokrama ni soothanleliwa sa anaxikola sookolariwa ekwaaturu ya soohimmwa. Nikhuuru na axitokweene nihaana omuthanla mutokweene aahiiso murumeyi ookhaliherya mukina wiira omukhaliheryeke mutokweene a muthukumano Okumi ni Orummwa Ahu. Masi axitokweene paahi takhanle opaka soothanleliwa sihikhanle sa anaxikola.

MUHOOLELI A MUTHUKUMANO WA OKUMI NI ORUMMWA AHU

24. Khula esumana, mutokweene mmosa ohaana ohoolela Muthukumano wa Okumi ni Orummwa Ahu. (Miloko sirina axitokweene vakhaani pooti waavaha arumeyi oorumeela aniphwanelela vaareerelaka.) Muhooleli ohaana olavula masu oopacerya ni ookiserya a muthukumano. Nave munna owo tonrowa owiitthanaka anna ootheene aniirela mpantta eprokrama eyo ni moovarihana ni mwaattelo wa axitokweene, owo pooti opaka ipantte sikina sa muthukumano owo otepexa wene ipantte seiye sinrowa wooniheriwa eviidiyu paahi. Ohilavuleke itthu sinceene okathi onimulattula awe mulipa-oolavula mwaha onittharelana. Nikhuuru na axitokweene ti nimmuthanla mutokweene oniphwanelela okhala muhooleli. Anna awo aniphwanelela anrowa oranttelanaka khula esumana. Moovarihana ni makhalelo a muloko owo, mutokweene a Muthukumano a Okumi ni Orummwa Ahu, ohaana ohoolelaka ikwaha sinceene muthukumano ola waavikana axitokweene akina. Akhala wiira mutokweene mmosa onniphwanelela wiiriha Yoosoma ya Biibiliya ya Muloko, owo onniphwanelela-tho ohoolela muthukumano ola. Xontte musuweleke wiira mutokweene onithanliwa wiira ohooleleke muthukumano ola ohaana waattottopela ni murima wootheene, waavaha miruku mooreerela ni waalakiherya anaxikola ootheene. Muhooleli torina muritti wa wiiriha muthukumano owo omala muhina mwa okathi. (Nwehe ettima 17 ni 19.) Mutokweene owo onihoolela muthukumano aphavela ni opuro waaphiyeryaka pooti weemexiwa mikrofooni mukina onrowa awe orumeelaka wiira owiitthaneke ale anrowa olavula myaha, okathi omosaru, ole onrowa olavula mwaha ohaana orowa mikrofooni siri vatribuna. Nave owo pooti othanla okilaathi opalkuni okathi naxikola ommusoma awe Biibiliya ni okathi wa mpantta oni: Mukhaleleke Nthiti Muteko Woolaleerya. Eyo enookhaliherya orumeela saana okathi.

NAMAVAHA MIRUKU OOKHALIHERYA

25. Vaaweryaneyaka ohaana othanliwa mutokweene onlavula saana myaha wiira ovareke muteko ola. Muteko wa munna ola waavaha miruku okhwipi axitokweene ni arumeyi ookhaliherya akhala wiira vannireerela olakiheriwa okathi anilavula aya khula mwaha ohela muhina myaha sa Okumi ni Orummwa Ahu, myaha sa atthu ootheene, ale anihoolela yoosoma ya Owehaweha, Yoosoma ya Biibiliya ya Muloko ni anisoma ittima. (Nwehe ettima 19.) Vakhala wiira muloko owo aakhala axitokweene anceene anisuwela olavula myaha saana ni wiixuttiha, nto khula mwaakha pooti othanliwa mutokweene mukina wiira okhale namavaha miruku ookhaliherya. Namavaha miruku khonitthuneya onvaha miruku khula mutthu onilavula mwaha ohikhanle wiira ori moona wiira vannireerela.

ISAALA SIKINA

26. Moovarihana ni mwaattelo wa anaxikola ari mmulokoni, anaxikola akina pooti othanleliwa opaka isaala sikina. Khula esaala ohaana okhala namavaha miruku oophwanelela vanceenexa ohaana okhala mutokweene. Yathowa axitokweene pooti othanliwa murumeyi ookhaliherya oophwanelela wiira ovaheke miruku. Munna owo ohaana othanliwa ni nikhuuru na axitokweene, nave axitokweene pooti othanlaka wiira munna owo oranttelaneke ni mukina. Namavaha miruku owo ohaana otthara malakiheryo ari ettima 18. Miloko sirina esaala ekina, anaxikola ahaana ovekeliwa wiira arowe esaala eyo nuumala mpantta wa Itthu sa Efaita sa Mbiibiliyani yeeyo eri muhina mwa Mihakhu Sinikhuma Mbiibiliyani. Anaxikola ahaana ohokolowela opuro aya nuumala opakiwa mpantta wookiserya.

IVIIDIYU

27. Okathi wa muthukumano ola sinnirumeeliwa iviidiyu sithanliwe. Iviidiyu sa mithukumano sa eriyari ya esumana sinniphwanyaneya aplikativo JW Library^®, nto iyo pooti wooniheriwa sirumeeliwaka ikaruma sikina.

S-38-MAC 11/23