Mmwaattamele Muluku
Yehova Onoovekelani Exeeni?
EXEENI Yehova eninvekela awe ole oniphavela weemereriwa okokhorela wawe? Niireke onivekela okhala atthu oomalela, nto khiyoona orika omuhakalaliha? Wala owo oniphavela paahi ele eniwerya ahu? Waakhuliwa waya makoho ala ohaana efaita akhala wira ninniphavela ohakalala omukokhorela wahu Muluku. Niwehe moota profeta Mikeya aatokonse awe soovekela sa Muluku.—Mmusome Mikeya 6:8.
‘Apwiya, ànixuttiha itthu sorera . . . anihimerya itthu sinnivekelaya’. Hiyo khannihoverya ele Muluku ennivekela awe. Owo onninleela soovekela sawe siri mBiibiliyani. Itthu Muluku sinnivekela awe ‘ti sorera’. Owo khannivekela soohiloka. ‘Muluku ophenta’, nto owo onnipaka itthu mwa mureerelo ahu. (1 Yohani 4:8; 5:3) Wiiwelela malamulo awe, khahiyo animusiveliha Muluku paahi, masi-tho anninihakalaliha.—Otumererya 10:12, 13.
Nto Yehova onoovekelani exeeni? Niireke Muluku ookhalana edireitu ya woovekelani etthu? Aayo owo ohaana. Hiyo nihaana omwiiwelelaka, owo ti Maphattuwelo a okumi ahu, Tonivaha ekumi. (Esalimo 36:10) Nto exeeni owo onnivekela awe opaka? Mikeya aahitthokiherya ifrase tthaaru soovekela sa Muluku. Yoovekela yoopacerya ti enamuna enaathokorerya ahu apinaatamu akhwiihu ni wataana wahu ni Muluku.
‘Nvareke miteko sa exariya’. Mwa nttaava na eHeeberi, nuulumo noowi: ‘exariya’, moovarihana ni ireferensia, nintaphulela ‘okhalana ehakhi ni okhapelelana saana eriyari ya apinaatamu’. Muluku oniphavela wira naathokoreryeke akina mooloka nittharaka malamulo awe. Ninnooniherya exariya, vaavo nihinaathanla ahu atthu, nikhalaka oororomeleya, ni okhalana mweettelo wekeekhai ni akhwiihu. (Onamukuttho 19:15; Yesaya 1:17; aHéberi 13:18) Nawiirela exariya akina, awo nave anooniirela exariya.—Matheyo 7:12.
‘Ophenta orera murima’. Muluku onninivekela wira niphenteke oreera murima ohiya paahi ophavela wooniwa. Nuulumo noowi ‘orera murima’ (cheʹsedh), nttaava na eHeeberi nintaphulela ‘ororomeleya’, wala ‘ophenta woororomeleya’. Mulipa ootokosa myaha sa mBiibiliyani onihimya so: “Nuulumo [che’sedh]; nitaphuleliwe ni masu oowi: “Ophenta, omoriwa ikharari, ni oreera murima, khahiyo moolumo oomalelaxa, masi nihaana otakaaherya otheene ala”. Akhala wira ninniphenta oreera murima, ninnooniherya ni murima wotheene ni waakhaliherya ale anitthuneya. Nto opaka eyo ninnihakalala mwaha wa ovaha wahu.—Miteko 20:35.
‘Mwetteke ni wiyeviha vamaithoni va Muluku’. MBiibiliyani nuulumo noowi: ‘mwetteke’, nintaphulela “otthara mweettelo wala opaka etthu”. Ninneetta ni Muluku vaavo nneettela ahu sooruma sawe siri mBiibiliyani. Nihaana ‘wiiyevihaka’ wira niwerye weettela. Moota xeeni? Wiiyeviha wala osuwela mukano ahu, onooniiriha otokosa makhalelo ahu ni osuwela wira khaninwerya opaka itthu sotheene ntoko owo. Nave-tho, ‘weetta mowiyeviha’ onitaphulela okupaleela itthu Muluku sinnivekela awe ni osuwela ele eniwerya ahu onvaha.
Ti voohakalaliha osuwela wira Yehova khankela onivekela etthu ehiniwerya ahu. Owo onnihakalala ni wiilipiha wahu wira nimurumeeleke. (aKolosi 3:23) Muluku onnisuwela itthu nihinwerya ahu. (Esalimo 103:14) Niraka itthu mowiiyeviha, ni okupaleela mukhalelo ahu, ninrowa ohakalala neettaka ni Muluku. Nto xeeni muhipaceryaka wiixutta moota woweetta ni Muluku? Mwiira siiso, onimoovahani mareeliho manceene.—Miruku 10:22.