WAAKHULIWA WA MAKOHO VOOHIMYA SA BIIBILIYA
Nsina na Muluku Tinivi?
Atthu otheene a vatthokoni vahu aakhalana nsina naya. Hata akwaatu ni alapwa anihuiwa, annivahiwa masina! Nto khamunoona okhala vooreerela wira Muluku ohaana okhalana nsina? MBiibiliyani, Muluku ohaana maihaneliwo manci, ntoko ala: Muluku Oowerya Sotheene, Mukhulupale Pwiya, ni Mpattuxa; masi owo ookhalana nsina nawe.—Yesaya 42:8, Biblya Exirima.
ABiibiliya anceene ataphuleliwe anniromola nsina na Muluku Musalimo 83:18. Mwa ntakiheryo, Tradução do Novo Mundo das Escrituras Sagradas, eveersu eyo enihimya so: “Nyuwo nsina nanyu niri Yehova, nyuwo paahi ti muri Mukhulupalexa a elapo yotheene”.
Xeeni Vanitthuneya Ahu Orumeela Nsina na Muluku?
Muluku oniphavela wira nirumeeleke nsina nawe. Ninnirumeela nsina na mutthu okathi onivaanela ahu ni ale anaaphenta ahu, ale ari apatthani ahu vanceenexa akhala wira annisiveliwa orumeeliwa nsina naya. Niireke eyo ennivirikana ni okathi onilavula ahu ni Muluku? Ohiya-vo Yesu ahaatumererya atthu orumeelaka nsina na Muluku.—Mmusome Matheyo 6:9; Yohani 17:26.
Masi, wira nikhale apatthani a Muluku nihaana omusuwela saana Muluku, ohiya nsina nawe paahi. Mwa ntakiheryo: Muluku ori sai? Vanniweryaneya tthiri omwaattamela Muluku? Nyuwo munoophwanya waakhuliwa wa makoho awo mBiibiliyani.
Mwaphavela soohimmwa sikina, nwehe ekapiitulu 1 ya eliivuru ela, Biibiliya Oniixuttiha Exeeni Tthiri?, epakiwe ni Anamoona a Yehova.
[Elatarato epaaxina 16]
Ninnirumeela masina okathi ninvaanela ahu naale anaaphenta ahu, ale ari apatthani ahu.