MMWAATTAMELE MULUKU

‘Owo . . . Muluku Àtthu Akumi’

Niireke okhwa ti woowerya onvikana Muluku? Nnaari! Vaniweryaneya sai okhwa wala munyokhani mukina okhala oowerya onvikana Muluku? (1 aKorinto 15:26; Okhuma 6:3) Muluku ookhalana owerya wowaahihimuxa ale akhwiiye, nto owo onnilaiherya opaka eyo elapo awe esya.a Ninsuwela sai wira yoolaiherya eyo enimwiiraneya tthiri? Yesu, Mwaana a Muluku aahilavula etthu eniiriha murima ahu okhalana nlipelelo.​—Mmusome Matheyo 22:31, 32.

Olavulaka ni aSaduki, yaawo yahaakupali ohihimuxiwa wa atthu, Yesu aahimmye so: ‘Vano, mwaha w’ohihimuwa w’alipa-òkhwa, khamunasome sohimenryaweni Muluku, iraka: ‘Miyo ka Muluku a Abrahamu, ni a Isakhi ni a Yakobe’?, Owo khahiyó Muluku a atthu òkhwa, Muluku a atthu akumi’. Moolumo ala, Yesu onihimya ele yiiranen’ye okathi Muluku aalavunle awe ni Moise vamwirini aavarela mooro iyaakha 1514 AEC. (Okhuma 3:1-6) Yesu aaphavela ohimya wira, moolumo a Yehova wa Moise oowi: ‘Miyo ka Muluku a Abrahamu, ni a Isakhi ni a Yakobe’, anitaphulela wira yoolaiherya ya ohihimuwa wa atthu, enrowa wiiraneya tthiri. Moota xeeni?

Nkuupuwelani saana ele yiiranen’ye. Okathi Yehova aalavunle awe ni Moise, amuhavinre alopwana Abrahamu, Isakhi, ni Yakobe yiira akhwiiye ene, eyo piiyo, nuumala okhwa Abrahamu saahivira iyaakha 329, Isakhi 224 nto Yakobe 197. Ohiya-vo, Yehova khaahimyale so: “ Miyo kaari Muluku aya, masi aahimmye so: Miyo ka Muluku aya. Yehova aahilavula sa amuhavinre ale araru okhalaka ntoko wira nlelo yaari akumi. Mwaha wa xeeni?

Yesu aahimyale so: ‘Owo [Yehova] khahiyó Muluku a atthu òkhwa, Muluku a atthu akumi’. Vano nkuupuwelani vakhaani yootaphulela ya masu awo. Akhala wira atthu khanrowa ohihimuwa, nto Abrahamu, Isakhi ni Yakobe yaarowa oliyaliwa mahiku otheene. Akhala wira anooliyaliwa mahiku otheene, nto Yehova aarowa okhala Muluku a atthu ookhwa. Tivonto eyo yaarowa otaphulela wira okhwa ti woowerya onvikana Yehova, okhalaka ntoko wira owo khoniwerya owoopola arumeyi awe wookhwaani.

Nto exeeni ekhanle ahu owuupuwela voohimya sa Abrahamu, Isakhi, Yakobe, ni arumeyi akina oororomeleya a Yehova yaale akhwiiye? Yesu aahihimya eponto ela yootepexa olipiha: “Tthiri othene akhalana ekumi mwaha wa yowo”. (Luka 20:38) Aayo, yoolakela ya Yehova ya waahihimuxa arumeyi awe akhwiiye, enrowa wiiraneya tthiri, tivonto onaalavula awe arumeyi awe okhala ntoko wira awo nlelo akumi. (aRoma 4:16, 17) Okhala wira Yehova toomalela, owo onoowuupuwelaka mpakha okathi othanlale awe wira aahihimuxe.

Niireke murima anyu onnihakalala mwa yoolipelela eyo ya owoona alipa-ookhwa aryeene akumi? Nto muupuweleke wira owerya onikumiheriwa ni okhwa khonivikana owerya wohimala wa Yehova. Khiivo etthu enrowa omukhoottiherya yoolaiherya awe ya waahihimuxa ale akhwiiye. Nto xeeni ohimananihaka wira musuwele sikina voohimya sa yoolaiherya ya ohihimuxiwa, ni Muluku onrowa opaka eyo? Opaka eyo onowiirihani omwaattamela Yehova, ‘Muluku àtthu akumi’.

Malakiheryo a omusoma Biibiliya, Feverero

Matheyo 22-28–Marko 1-8

[Enoota]

[Eponto yuulupale ya epaaxina 7]

Owerya onikumiheriwa ni okhwa khonivikana owerya wohimala wa Yehova