Makoho Anikohiwa ni Ale Anisoma Irevista Sahu
Niireke aIsarayeli owiiva waya anakrime yaamwaahopha vamwirini?
▪ Maloko manceene a wIsarayeli a khalai, yaaniwiiva anakrime yaakhomelaka vamwirini woweemexiwa. ARoma yaanimutthukwelela wala omukhomela ni ipregu nakrime nto anamaliha mahiku manceene avoliwaka etala, ntthona, woona owereya ni itthu sotheene soohaaxa. Atthu a oRoma, yoonela wira mutthu ootepa okhala nakrime, taaphwanela okhomeliwa.
Ankhi nloko na Isarayeli a khalai? Niireke anaIsarayeli yaaniwiiva anakrime orweela mwa waahopha vamwirini? Nlamulo na Moise naahimya so: “Mulopwana otthenke yottheka yokhwa, ìviwe ni atthukeleliwe vamwirini: ohihiye murutthu awe otthukeleliwene vamwirini ohiyu wothene, onvithe nihiku nenlo”. (Otum. 21:22, 23, Biblya Exirima) Vannisuwanyeya wira okathi wa Soolempwa sa eHeeberi mutthu aaphwanela okhwa, wanipacerya ahaana wiiviwa nuumala vo anahomphwa vamwirini.
Mmwaha ola, Onamukuttho 20:2 onihimya so: “Akhalá mutthu a Isarayeli walá namurwa ontthuna omuhela mwan’awe mukuttho emwirelaka Moloki, ìviwe avonyakasiwaka maluku n’atthu a mulaponi memmo”. Nave yaale yaarowa ‘okoha minepa walá inyaka’ yaahaana wiiviwa. Moota xeeni? Yaahaana ‘ovonyakasiwa ni maluku mpakha okhwa’.—Onam. 20:27.
Yoolepa ya Otumererya 22:23, 24 eni: “Mulopwana mmosá akumaná mmuttettheni ni mwali àkameliwe ni mulopwana mukina khurupana, mwaroihe òwanli aya va mukhora va muttetthe owo, mwavonyakase ni maluku mpakha owiva. Mwali uwo ìviwe, okhala wira khakhuwenle avekelaka okhaliheriwa, ohiya wira àkhala mmuttettheni; nave-tho mulopwana ìviwe mulattu w’onveha mwali akameliwe ni mukhw’awe. Siso munokumiha sotakhala eriyari anyu.” Nto eriyari ya anaIsarayeli a vathi, atthu yaale yaapaka ikrime suulupale yiiviwa ni maluku.a
Otumererya 21:23 oolavula wira: ‘Mutthu òhomphwa òtakhaliwa wa Muluku’. Mwaha woohiiwa vanlakani vene murutthu wa nakrime ole, eyo yaaniwiiriha anaIsarayeli woova. Nto okhomeliwa wa mutthu owo ootakhala, yaari enamuna emosa ya waalopola akina.
[Enoota]
a Alipa ootokosa myaha anneemererya wira okathi wa Nlamulo na Moise, mutthu aapaka ekrime aaniiviwa ohinatthi okhomeliwa vamwirini. Masi, sookhala itthu sikina sinooniherya wira eseekulu yoopacerya, anakrime akina yaanikhomeliwa vamwirini aryeene akumi ni aYuda nto khiyakhwa vamwirini vaavo.
[Eponto yuulupale ya epaaxina 13]
Vannisuwanyeya wira mutthu aaphwanela okhwa, wanipacerya ahaana wiiviwa nuumala vo anahomphwa vamwirini.