MMWAATTAMELE MULUKU

“Atthu Anniwerya Osuwela Makhalelo Ahinòneya a Muluku”

Nyuwo munnikupali wira Muluku ohaavo? Vaari siiso, exeeni enookupalihani? Moohaaniherya sihaavo itthu sinci sinoona ahu sinnikupaliha wira Mpattuxa ta miruku, oowerya ni oophenta. Nto itthu xeeni sinookupalihani, ni xeeni sirya aya soovara murima? Wira naakhule, nrowe niwehe moolumo a murummwa Paulo aalempele awe maKristau oRoma.

Paulo aahimyale so: “Okhuma vapattuxalyawe Muluku olumwenku, atthu anniwerya osuwela makhalelo ahinòneya a Muluku, hatá owerya wawe n’oMuluku awe wohimala, yonaka n’utthokelela itthu sipattuxalyawe. Tivó atthu khanleveleleya”. (aRoma 1:20) Muluku oohiya ethoonyeryo awe orweela mwa itthu sipattuxale awe, ntoko soonihenrye awe Paulo. Nrowe nithokorerye moolumo a Paulo.

Paulo ohimyale wira mikhalelo sa Muluku sinnooneya “okhuma vapattuxalyawe . . . olumwenku”. Mwa yoolepa ela, nuulumo na eGriki noowi “olumwenku”, khanintaphulela Elapo ya vathi. Masi, nnaahimya apinaatamu.a Nto, Paulo onihimya wira okhuma okathi yoole apinaatamu apattuxiwe aya, anniwerya oweha mikhalelo sa Muluku mwa itthu sipanke awe.

Sihaavo itthu sinci sinooniherya wira Muluku ohaavo. Iyo khasivithiwe masi “atthu anniwerya osuwela”. Okhuma soopattuxiwa sootepa wunnuwa mpakha sootepa oyeva, sinnooniherya wira Muluku ohaavo, ni wira owo ohaana mikhalelo sooreera. Niireke soopattuxiwa sirina ankhili siri mulaponi khasinooniherya miruku sa Muluku? Wala erimu yoosareya itheneeri ni mawimpi khasinooniherya owerya wawe? Niireke eyoolya yoosiva enilya ahu ni oreera wa okela ni okhuma wa nsuwa, khasinooniherya wira Muluku onnaaphenta apinaatamu?​—Esalimo 104:24; Yesaya 40:26.

Itthu sipattuxiwe sinooniherya exeeni? Itthu iyo sinooniherya wira ohaavo Mpattuxa; tivonto, ale ahinoona itthu iyo wala anikhootta omwaamini Muluku “khanleveleleya”. Musuweli mmosa, onitthokiherya so: Nilikanyihe wira mutthu mmosa oneettiha ekaaro. Nto owo khonicalela ethoonyeryo enihimya wira: “Ephiro yookottoopa, muhapuwele moono woothiyana”. Nto onneemexiwa ni poliisia ni khiyalivihiwa muulutha. Vano ole oneettiha ekaaro onnipacerya onyakulihana ni poliisia ohimyaka wira khiwoonale ethoonyeryo eyo. Nto moolumo awe, khanrowa okhalana efaita maana ethoonyeryo ennooneya saana mphironi ni maitho awe annoona saana. Nave, okhala wira owo toneettiha ekaaro, torina muritti wa oweha ni wiiwelela ithoonyeryo iyo. Moolikanasa, hiyo nihaana ithoonyeryo soowi Muluku ohaavo. Iyo sinnooneya saana. Ntoko soopattuxiwa siniwerya wuupuwela, ninniwerya oweha itthu iyo. Tthiri, ale anikhootta itthu iyo, anoolakela.

Tthiri, itthu sipattuxiwe sinninikhaliherya omusuwela Mpattuxa ahu. Masi ehaavo etthu ekina ennikhaliherya omusuwela saana, eyo piiyo, Biibiliya. Orweela mwa Biibiliya nnoowerya osuwela waakhuliwa wa nikoho nla: Tiivi eri yoolakela ya Muluku wa apinaatamu ni elapo ya vathi? Tthiri, osuwela waakhuliwa wa nikoho nlo onimookhaliheryani omwaattamela Muluku yoowo ‘atthu aniwerya [aya] osuwela makhalelo [awe] ahinòneya’ mwa olumwenku onnirukurerya.

Malakiheryo a omusoma Biibiliya Agosto

aRoma 1-16

[Enoota]

[Eponto yuulupale ya epaaxina 11]

Muluku oohiya ethoonyeryo awe orweela wa itthu sipattuxale awe