WAAKHULIWA WA MAKOHO A MBIIBILIYANI
Niireke Muluku onniwiriyana mavekelo otheene?
Muluku onnaawiriyana atthu a maloko otheene. (Esalimo 145:18, 19) Nuulumo nawe, Biibiliya, ninnitumererya olavula nuuwo mmyaha sotheene sinnixankiha. (aFilipi 4:6, 7) Masi, mavekelo makina khanimusivela Muluku. Mwa ntakiheryo, owo khoniwiriyana mavekelo oosukiwa mmuru.—Mmusome Matheyo 6:7.
Nave, Yehova khoniwiriyana mavekelo a atthu ahiniiwelela malamulo awe moolakela. (Miruku 28:9) Mwa ntakiheryo, okathi wa Biibiliya, Muluku khaawiriyana mavekelo a aIsarayeli yaawiiva atthu oohittheka. Nto, wira Muluku owiriyane mavekelo ahu, nihaana wiiwelelaka sooruma sawe.—Mmusome Yesaya 1:15.
Nipakeke exeeni wira Muluku awiriyaneke mavekelo ahu?
Khaninwerya omwaattamela Muluku nihimwaaminiki. (Yakobo 1:5, 6) Nto nihaana okupaliki wira owo ohaavo ni onninthokorerya. Nnoowerya olipiha waamini wahu nimusomaka Biibiliya, maana waamini wekeekhai wookhalana mathipelo a itthu sowooneya ni olipiheriwa ni Nuulumo na Muluku.—Mmusome aHéberi 11:1, 6.
Nave-tho, nihaana ovekelaka mwekeekhai ni mowiiyeviha. Hata mwaana a Muluku, Yesu, okathi aavekela awe aari oowiiyeviha. (Luka 22:41, 42) Tivonto, ohiya omuleela Muluku yoopaka, nihaana wiiwexexaka sooruma sawe orweela mwa omusoma Biibiliya. Niira siiso, nnoowerya ovekela moovarihana ni yootthuna awe.—Mmusome 1 Yohani 5:14.
Wira musuwele soohimmwa sikina, muwehe muru 17 wa eliivuru ela, Biibiliya Oniixuttiha Exeeni Tthiri?, yoolaleiwa ni Anamoona a Yehova
Mubaxari va www.jw.org
[Elatarato epaaxina 16]
Xeeni Muluku ohiniwiriyana awe mavekelo makina?