Muteko Wa Opioneero Onnilipiha Wataana Wahu Ni Muluku

‘Etthu yorera owipela Apwiya! Etthu yophwanela omuttottopela Muluku ahu’.​—ESAL. 147:1.

MAKOHO ANIREERELA WUUPUWELELA

Moota xeeni muteko wa opioneero onlipiha aya wataana wahu ni Yehova?

Akhala wira nyuwo mwa pioneero, exeeni enrowa wookhaliheryani ovikaniha muteko ola wa mareeliho wa opioneero?

Akhala wira vano nyuwo khahiyo mwa pioneero, malokiheryo xeeni akhanle anyu oopaka wira mukele muteko wa opioneero?

1, 2. (a) Exeeni enikhumelela naamuupuwelelaka ni olavula voohimya sa ole onimphenta ahu? (Moone efootu eri wanipacerya wa yoosoma.) (b) Makoho xeeni ninrowa ahu othokorerya?

OMUUPUWELA ni olavulaka voohimya sa mutthu onimphenta ahu, pooti olipiha ompatthani ahu nuuwo. Nto eyo, pooti wiiraneyaka ni wataana wahu ni Yehova Muluku. Okathi Davidi aari awe makampusi, owo aaniviriha ohiyu munceene awehaka wiirimu woosareya itheneeri uupuwelelaka okhulupale ohinlikaniwa wa Mpattuxa. Owo aahilepa ariki: ‘Vanwehaka erimu muteko wa matata anyu kònaka mweri ni itheneri sipwehalyanyu-vo kinnithamala wira: Omphwanela-ni mutthu, wira ùpuweliwe ni nyuwo? Oniphwanela-ni mwanadamu, wira akhapeleliwe ni nyuwo?’ (Esal. 8:3, 4) Nuumala Paulo othokorerya moota yoolakela ya Yehova yiiraneya aya orweela wa Isarayeli oomunepani mmukhalelo wootikiniha, owo aahilavula mootikiniheya ariki: ‘Vekekhai, othajiri wa Muluku n’ankhili awe n’usuwela wawe ti wulupale’!​—aRom. 11:17-26, 33.

² Okathi onilaleerya ahu nnimulavula Yehova ni omuupuwelela. Opaka eyo paahi, etthu yooreera. Anamunceene yaale aniwerya okela muteko wa okathi wotheene, annoona mareeliho anikhumelela mwaha wa ovaraka muteko wa Omwene vaavo aninnuuherya aya omphenta waya Muluku. Hata nyuwo muriki okelaru muteko wa okathi wotheene, wala muniimananiha okela, muhaana othokorerya nikoho nla: Moota xeeni onvarela muteko Muluku okathi wotheene onaataaniha aya ni Yehova? Akhala wira mwa pioneero, mwiikoheke so: ‘Exeeni enrowa okikhaliherya ovikaniha muteko aka wa opioneero’? Akhala wira khahiyo mwa pioneero, mwiikoheke so: ‘Mirukunuxo xeeni kiniwerya aka opaka wira kikhale pioneero’? Nrowe nithokorerye inamuna sinikhaliherya aya onvarela muteko Muluku okathi wotheene.

MUTEKO WA OKATHI WOTHEENE NI WATAANA WAHU NI MULUKU

3. Ninttottela sai mureerelo naalaleeryaka ni olavula mareeliho a Omwene anirwa?

³ Othokorerya mareeliho a Omwene a muhoolo ni akina onninataaniha ni Yehova. Yoolepa xeeni enoosivelani osoma mwaarowaka olaleerya khula empa? Niireke sinoosivelani ti: Esalimo 37:10, 11; Daniyeli 2:44; Yohani 5:28, 29; wala Wisupulula 21:3, 4? Khula okathi ninthokorerya ahu soolaiherya iya ni atthu akina, ninuupuxeriwa wira Muluku ahu oovaha tthiri owo ti mulipa oovaha ‘eparakha yotheene yophaveleya ni sovahiwa sotheene sorera’. Ela enninaataaniha nuuwo.​—Yak. 1:17.

4. Xeeni ovaha wahu efaita oreera murima wa Muluku onincerereya aya naaweha ale anihaawela yoolya yomunepani?

⁴ Waaweha ehaawelaka yoolya yomunepani ale anaalaleerya ahu, onninnuuherya ovaha wahu efaita ekeekhai. Atthu a mulaponi kharina etthu yoororomela oweettiha wira ekhumeleke saana ni ohakalala. Anamunceene annoova itthu sa muhoolo, nave kharina nlipelelo. Awo anniphavela makhalelo a okumi wekeekhai? Hata yaale arina etiini, khanisuwela saana Soolempwa. Awo anlikana ni atthu a khalai a oNiinive. (Mmusome Yona 4:11.) Vaavo nninnuuherya ahu muteko woolaleerya, ninniweha ovirikana okhanle wa mukhalelo womunepani eriyari ya ale anaalaleerya ahu ni atthu a Yehova. (Yes. 65:13) Ninnuupuxeriwa oreera murima wa Yehova mwaha wa ohiya onivaha yoolya paahi yomunepani, masi-tho, onninlattula otheene ahu wira naakhele olipihiwa womunepani ni nlipelelo neekeekhai.​—Wis. 22:17.

5. Moota xeeni waakhaliherya akina onivukula aya mixankiho sahu?

⁵ Waakhaliherya akina mmukhalelo wa omunepani onninikhweiherya ovukula oriipiwaka murima mootepana mwaha wa mixankiho sahu. Teresa yoowo onivara muteko wa opioneero wookilaatheya, onnikupali eyo okathi anamuyari awe yaamwalanne aya. Owo onihimya so: “Owo waari okathi wookiriipiha murima vanceene mookumini mwaka”. Nihiku nimosa, okathi oriipiwa murima waavukunwe aya ni amaaleleya owaani, hata vari siiso, owo aahirowa waasomiha anamwane araru yaawo yaakhala etthoko emosa ya mixankiho suulupalexa. Tiithi aya ahaatthyawa, nave murokoraya muulupale aanaanyoonyiha. Teresa onihimya so: “Khula muxankiho waakiphwanya, waakhala mwaamukhaani kalikanyiha ni mixankiho saya. Nto okathi naasoma ahu, maitho aya yaanooniherya ohakalala ni otteeliwa murima. Anamwane ale yaari yoovaha ya Yehova, vanceenexa nihiku nenle”.

6, 7. (a) Nroromelo nahu ninlipa sai okathi nniwiixuttiha ahu Biibiliya atthu akina? (b) Naawehaka ale anaasomiha ahu Biibiliya yeettelaka sooruma sa Biibiliya, onincerereya sai waavaha wahu efaita ankhili a Muluku?

⁶ Owiixuttiha atthu akina Biibiliya, onnilipiha nroromelo nahu. Murummwa Paulo, aahaalepela aYuda a okathi awe yaale yahiira itthu yaalaleya aya, ariki: ‘nyuwo muniwixuttiha atthu akina, vankhala sai muhisixuttihaka mmansinyu?’ (aRom. 2:21) Eyo etthu yoovirikana ni mapioneero a mahiku ala! Opaka eyo enivekela wiitthokiha khula yoosoma nave waaniheryasa opaka sootokosa wira yaakhule makoho. Murokora onivara muteko wa opioneero oniihaniwa Janeene onihimya so: “Khula okathi kinnaavya enamuna ya owiixuttiha akina ekeekhai, nto kinnoona wira masu awo aniixuttiha aka annisukeya mmuuruni ni vamurimani vaka. Nto eyo enniiriha waamini waka oheemela, masi ovikaniha wunnuwa”.

⁷ Waaweha ale animusoma Biibiliya erukunuxaka mweettelo aya, vaavo aneettela aya ikano sa Biibiliya, nto enninnuuherya ovaha wahu efaita ankhili a Muluku. (Yes. 48:17, 18) Eyo enninikhaliherya ovikaniha weettelaka malakiheryo awo mookumini mwahu. Adriana, yoowo onivara muteko wa opioneero, onihimya so: “Atthu yaale aneettela miruku saya paahi, okumi aya khonikhalana nlipelelo. Masi vaavo anipacerya aya waaroromela ankhili a Yehova, awo anniphwanya mireerelo”. Nave-tho, Fili onihimya so: “Nyuwo munniwerya oweha moota Yehova oniwerya awe waarukunuxa atthu yaale yahaawerya opaka marukunuxo mmensaya”.

8. Moota xeeni ovara muteko woolaleerya ni anna oopatthaneya vaniloka aya?

⁸ Olaleerya vamosa mowataana ni anna, onnilipiha omunepani wahu. (Mir. 13:20) Mapioneero anceene, anniviriha okathi munceene elaleeryaka ni maKristau akhwaaya. Eyo ennikumiherya okathi wa ‘olipihana’. (aRom. 1:12; mmusome Miruku 27:17.) Murokora Lisa onivara muteko wa opioneero oolavula ariki: “Mapuro anivariwa muteko, ikwaha sinceene atthu anniphavela oxinttana wala okhalelana nrima. Khula nihiku munniwiiwa atthu ewaapaka akina ni olavula mooruwana. Nto mapuro awo, mutthu onivara muteko mooxankiheya. Ikwaha sikina mutthu onniveehiwa ni oruwaniwa mwaha wa mweettelo wa eKristau. Masi, ovara muteko woolaleerya ni maKristau akina, ti etthu yoohakalaliha. Wookiseryani wa nihiku, kinitthikela owaani oohakalala nnaamwi kivenle ene”.

9. Ovara muteko wa opioneero hoothe ni ole othelanne anyu, onlipiha sai etthoko?

⁹ Ovara muteko wa opioneero mutthu ni mwaarawe wala iyawe, onnilipiha ekasamento. (Mus. 4:12) Madalena, yoowo onivara muteko wa opioneero ni aiyawe, onilavula wira: “Miyo ni aiyaka, ninniviriha okathi nilavulaka naarowaka olaleerya voohimya sa etthu esomme ahu mBiibiliyani wira noone moota woorumeela mmuteko woolaleerya. Khula mwaakha onivara ahu muteko wa opioneero hoothe, ninnitepa wataana”. Moolikanasa, Teresa onihimya so: “Otheene ahu ninnisyaka okopha, nto hiyo khanniwana mwaha wa musurukhu. Muteko onivara ahu nnipacerya okathi omosa ni ophera okathi omosaru, nto ninniwerya orowa waaxekurya hoothe atthu nnaalaleerya ahu ni opaka soosoma sa Biibiliya, nto eyo enninikhaliherya olikanaka mukhalelo ahu wa omunapani, ni ohakalala wahu”.

10. Vaavo nimpaceriha ahu miteko sa Omwene ni oweha nikhaliheryo na Muluku, nto omuroromela wahu Yehova onikhala sai?

¹⁰ Omuroromela wahu Yehova onninnuwa, vaavo nimpweha ahu opuro woopacerya miteko sa Omwene, ni okhaliheriwaka ni Yehova ni waakhulaka mavekelo ahu. Tthiri eyo ekeekhai, nto enniiraneya wa maKristau otheene oororomeleya. Masi ale aninvarela muteko okathi wotheene Yehova, anniphwanya nikhaliheryo nlo wira evikaniheke muteko wa opioneero. (Mmusome Matheyo 6:30-34.) Munna Curt, yoowo ori pioneero ni namaranttela a mutokweene onixukurya miloko, aahivekeliwa oxekurya muloko, yoowo orekamela waya ti wa iwoora piili nnimeya. Owo ni amwaarawe mapioneero, nto gasolina aarimo mukaaroni mwaya aaphiyerya orowa paahi, nave yaanihala esumana emosa wira yaakhele musurukhu omutekoni waya. Curt onnilavula wira: “Kaahipacerya wiikoha akhala wira kaahipaka yoothanla yooloka”. Nuumala ovekela, awosa yahoona wira yanwerya muteko, eroromelaka wira Muluku aarowa waavaha itthu saathowa. Okathi yaakhuma aya, murokora mmosa aahiwiitthana anaaleela wira oniphavela waavaha etthu. Nto murokora owo aahiruuha tthiri musurukhu yoole waahalela wira emalelihe ekwaha aya. Munna Curt oni: “Vaavo mutthu sinimwiiraneela aya itthu ntoko iya ikwaha sincene, okhweya oweha nikhaliheryo na Yehova”.

11. Niireke muteko wa opioneero onnivaha mareeliho ekeekhai? Mutthokiherye.

¹¹ Tthiri, mapioneero ikwaha sinceene anniphwanya mareeliho awo, vaavo aniilipiha aya ovara muteko wa Yehova ni wataana nuuwo, ni ‘oreriwa wothene’ vaavo anivahiwa aya mareeliho oohimala. (Otum. 28:2) Masi, muteko wa opioneero wookhalana mixankiho saya. Khuuvo murumeyi a Muluku ohirina mixankiho sikumiheriwe ni ohiiwelela wa Adamu. Mwaha wa itthu iyo, mapioneero akina aahiyererya okathi vakhaani muteko wa opioneero; nto mixankiho sikina sinniweryaneya ophuka ni osyaka. Exeeni enkela waakhaliherya mapioneero ovikaniha ohakalala ni eparakha ya muteko wa opioneero?

OVIKANIHA MMUTEKO WA OKATHI WOTHEENE

12, 13. (a) Akhala wira pioneero khaniwerya omaleliha iwoora sawe ohaana opaka exeeni? (b) Efaita xeeni erina aya omusoma Biibiliya, okhalana yoosoma, ni wuupuwelela ele enisoma ahu?

¹² Mapioneero anceene, eprograma aya ti yoosareya. Pooti okhala vooxankiha ovara khula etthu, nto ti vooloka mutthu olokiherya miteko sawe. (1 aKor. 14:33, 40) Akhala wira pioneero onnikhalana muxankiho wa ophiyeriha iwoora sawe, owo ohaana otokosa saana moota onirumeela awe okathi awe. (aÉf. 5:15, 16) Owo aikoheke so: ‘Iwoora kavi kiniviriha aka kitthekulaka wala ophavela ovara miteko sikina? Kiireke kihaana opacerya wiihiiha? Kiireke kihaana ovukula iwoora kiniviriha aka kivaraka muteko wa mulaponi?’ Khula muKristau onneemererya wira okhweya mutthu osarihela muteko mukina vaprogramani; masi, ale aninvarela Muluku okathi wotheene, ahaana otokosaka khula okathi makhalelo aya wira elokiheryeke etthu enitthuneya.

¹³ Omusoma Biibiliya, opaka yoosoma ahu, ni wuupuwelela, sihaana okhala vaprogramani va pioneero. Nto, pioneero ohaana wiihiihaka ophavela ovara miteko sikina sihirina efaita seiyo saarowa onanariha okathi othanlale awe wira avare itthu sa efaita. (aFil. 1:10) Mwa ntakiheryo, nkahaya siitthu ene munwehe pioneero aphiyaka vate akhumaka woolaleeryani nuumala iwoora sinceene. Vano oniphavela orumeela oxekuwa ole wira atthokihe mithukumano. Masi wanipacerya owo onimusoma e-mail wala mensage. Nuumala-vo, onrowa vakomputadoreni khiyasoma mensage makina ni wira attikihe. Vaavo owo nlelo oninvarakasa awe komputadore, onnirowa-tho oWeb site wira awehe akhala wira ipreso sa itthu siniphavela awe othuma, soovukuliwa. Nto ahisuwelaka, soovira iwoora piili, nto owo nlelo khopacenrye yoosoma yeele uupuwenle awe ohiyu yoole. Xeeni vanitthuneya ahu okhalana ephoole ni etthu ela? Atthu yaale muteko aya ari axooku a otthimaka, ahaana okhalana ephoole ni erutthu aya wira epise ni muteko aya. Vamosaru, mapioneero anitthuneya ovikaniha yoosoma aya ya Biibiliya wira elipiheke omunepani waya akhala wira aniphavela ovikaniha mmuteko wa okathi wotheene.​—1 Tim. 4:16.

14, 15. (a) Xeeni mapioneero anisyaka aya wiixaattiherya itthu mookumini mwaya? (b) Pioneero samphwanyaka mixankiho ohaana opaka exeeni?

¹⁴ Pioneero onikhumela saana onniilipiha okhweeherya okumi awe. Yesu ahaatumererya awiixutti awe okhalana niitho nooluluwanya. (Math. 6:22) Yesu aahikhweeherya okumi awe wira avare saana muteko awe moohixankiheya. Nto aahiwerya olavula so: ‘Akhwatté àkhalana mittupha saya, axipalame a musulu àkhalana ipuro saya: masi Mwana a Mutthu kharina nipuro n’omumula’.(Math. 8:20) Aphavelaka wiixutta ntakiheryo na Yesu, pioneero onkela opaka saana wuupuwelela so, akhala wira onookhalana mihakhu sinceene owo onrowa ovirihaka okathi munceene aphavelaka itthu sikina, olokiherya ni orantteliha.

¹⁵ Mapioneero annisuwela wira eparakha ya muteko aya khahiyo wira arookhalaxa oottittimiheya waavikana akina. Ohiya-vo, khula eparakha ya muteko onivahiwa ahu, mwaha wa ikharari sa Muluku seiyo nahaapwanela ahu. Nto wira mutthu avikanihe okhala pioneero khula mmosa ohaana omuroromela Yehova. (aFil. 4:13) Mixankiho pooti okhumelelaka (Esal. 34:20) Okathi sinaaphwanya aya mixankiho iyo mapioneero ahaana omuroromelaka Yehova wira aakhaliherye, ohiya waakuvela ohiya muteko wa opioneero. (Musome Esalimo 37:5.) Vaavo anikhaliheriwa aya ni Muluku oophenta, anrowa otepaka wataana nuuwo envarelaka muteko Tiithi aya a wiirimu.​—Yes. 41:10.

NYUWO MOOKHALA OOWERYA OKELA MUTEKO WA OPIONEERO?

16. Akhala wira nyuwo munniphavela opioneero, muhaana opaka exeeni?

¹⁶ Akhala wira munniphavela waakhela mareeliho aniphwanya aya yaale anivara muteko wa okathi wotheene, mmuleele Yehova yoophavela anyu. (1 Yoh. 5:14, 15) Nvaanele ni yaale ari mapioneero. Mulipiherye soolukama sanyu wira mukhale pioneero. Eyo ti etthu aapanke awe Keith ni Erika. Awo yaahitoko okela muteko wa okathi wotheene ntoko anamathelana akina okathi aninnuwa aya, awo yaahithuma empaya ni ekaaro esya nuumala othelana. Nto anihimya so: “Okhala wira naahikhalana itthu iye, hiyo noona wira saarowa onihakalaliha, masi nnaari”. Okathi munna Keith aahin’ye awe ovara muteko, owo aahiilepiha muteko wa opioneero wookhaliherya. Owo onnuupuwela ariki: “Muteko wa opioneero waahikuupuxerya ohakalala wuulupale mutthu waanvarelaka Muluku okathi wotheene”. Awosa yaahipatthana ni namathela mmosa yaari mapioneero yoowo aakhalihenrye oweha ohakalala onikhumelela mwaha wa muteko wa opioneero. Nto exeeni Keith ni Erika yaapanke aya? “Noopaka elista ya soolukama somunepani siniphavela ahu ovara, niphatteya vagilerani, nto nnaweha moota nnaakhwaniherya ahu”. Nuuvira okathi, awo yaahiwerya otthikela opioneero.

17. Xeeni vaniloka aya nyuwo othokorerya wira mulokiherye eprograma anyu ni okhweeherya okumi anyu wira mukhale pioneero?

¹⁷ Nyuwo mookhala oowerya okela muteko wa opioneero? Akhala wira munoona oxankiha, nkahaya mwiimananihe wuncererya wataana wanyu ni Yehova orweela mwa olaleerya vanceene. Nuumala opaka nivekelo, nyuwo munooweha wira pooti ovukula itthu sikina sa eprograma anyu wira moone okhweya okela opioneero. Nyuwo mwawerya okhala pioneero, ohakalala onrowa anyu okhalana onoovikana mixankiho sotheene muxinttale anyu. Munoohakalala mwaha wa opwehaka opuro woopacerya soophavela sa Omwene ovikana sawinyu. (Math. 6:33) Munooweha ohakalala onikhala mwaha wa ophavela waavaha akina. Vanceenexa, munookhalanaka okathi munceene wa omuupuwela ni olavulaka voohimya sa Yehova, nto wira munnuuheryeke omphenta wanyu ni omuhakalaliha.