Makoho Anipakiwa ni Ale Anisoma Irevista Sahu

Xeeni Yesu aamoronxe awe maithori wala wunla ahinatthi omuhihimuxa Lazaro, ntoko sinihimya awe Yohani 11:35?

▪ Vaavo vanikhwa awe ole onimphenta ahu, hiyo ninninla okhala wira noomuyeleela. Okhala wira Yesu aahipatthana ni Lázaro, nto owo aahinla okathi Lázaro aakhwiiye awe. Yesu aahinla mwaha wa othunku oona awe okhwa wa Lázaro, ntoko sinihimya awe Yohani.—Yoh. 11:36.

Okathi Yesu aiwale awe wira Lázaro onoowereiwa, owo khaakuvenle orowa ompenuxa. Biibiliya onihimya so: “Vano [Yesu] vaiwalyawe wira Lázaro anwereiwa ahilekela mahiku manli nipuro nenlo naryawe”. (Yoh. 11:6) Xeeni Yesu ohalaka opisa? Owo aahikhalana yoolakela awe. Owo aalavunle wira: ‘eretta eyo khinruha okhwa, enithonyerya ovuwa wa Muluku, wira avuwihiwe-tho mwana a Muluku mwaha wa yeyo’. (Yoh. 11:4) Okhwa khahiyo waari yoolakela ya oretta ole, wala owereiwa wa Lázaro. Yesu aaphavela orumeela okhwa wa Lázaro wira ‘anvuwihe Muluku’. Moota xeeni? Yesu aarowa opaka mutikiniho muulupale wira amuhihimuxe mpatthani awe mmahiye.

Okathi Yesu aavaanela awe ni awiixutti awe sa mwaha ole, owo aahilikanyiha okhwa ni orupa, niire so, ni ikhove. Ti nthowa naya Yesu aalenle awe wira ‘mpatthanihu Lázaro, onorupa, vano kinrowa onvenxa’. (Yoh. 11:11) Yesu onvenxa wawe Lázaro mookhwaani, waalikana ni tiithi wala maama oninvenxa mwanawe aarupa. Mwaha wa osuwela eyo, waanimwiiriha ohitepa oxanka ni okhwa wa Lázaro.

Nto exeeni yaamwiiriha Yesu wunla? Sowiiraneya sa mwaha ola, sinnooniherya nthowa naya. Yesu vamoonalyaawe murokorawe Lázaro iihaniwa Maria anlaka ni wiikhupanyerya ni atthu akina yinlaka, owo nave ‘ahiripiwa ni winiwa murima’. Waaweha atthu ale axankaka, wahimwiiriha Yesu woona owereya vamurimani ‘khuripiwa murima’. Nto eyo, yaahimwiiriha ‘Yesu wunla’. Tthiri vaahimuriipiha murima ni onwereya Yesu onweha mpatthani awe aryeene mmahiye.​—Yoh. 11:33, 35.

Yowiiraneya ela, enooniherya wira Yesu ookhalana owerya wa waahihimuxa ale anaaphenta ahu, akhwiiye wira akhalane ekumi mwa elapo esya enirwa. Eyo nave ethoonyeryo yoowi Yesu onniwoonela othunku ale anikhweliwa mmusi aya mwaha wa etampi ya Adamu. Etthu ekina eniixutta ahu mwa yowiiraneya ela, tiila: Nihaana owoonelaka othunku ale anikhweliwa mmusi aya wala apatthani aya.

Yesu aanisuwela wira aarowa omuhihimuxa Lázaro. Masi hata vari siiso, owo aahinla mwaha wa ophenta ni omoonela othunku apatthani awe. Nave-tho hiyo, owoonela wahu othunku akina oniiriheke ‘ojikhula [wunla], vamosa nale anìkhupanyerya’. (aRom. 12:15) Oriipiwa murima moota owo khonitaphulela wira mutthu khonaamini ohihimuwa. Tthiri, Yesu oovaha ntakiheryo nooloka na owoonela othunku akina okathi anikhweliwa aya nto khiyanla nnaamwi aasuwela wira aarowa omuhihimuxa Lázaro.

[Elatarato epaaxina 32]