Opaka Soothanla Mwa Miruku Okathi wa Omiravo

1. Itthu xeeni sooreera sinivariwa ni amiravo eeKristau anceene?

HIYO NINKHALA okathi oniireya itthu sookuxa murima. Enniraneya etthu ehitonko wiireya khalai, atthu anceenexa a maloko otheene anneemya okokhorela wekeekhai. (Wis. 7:9, 10) Amiravo anceene annihakalala vaavo vanaakhaliherya aya atthu akina wiiwexexa ekeekhai ya mBiibiliyani enoopola ekumi. (Wis. 22:17) Amiravo akina anniiriha soosoma sa Biibiliya, khiyaakhaliherya akina okhalana okumi wootepexa oreera. Akina annikhalela nthiti olaleya ihapari sooreera, arowaka mittetthe sa nttaava nikina. (Esal. 110:3; Yes. 52:7) Nto nyuwo munrowa opaka exeeni wira nvare muteko mmosaru owo woohakalaliha onivariwa ni atthu a Muluku?

2. Moota xeeni ntakiheryo na Timootheyo nnooniherya aya wira Yehova onniphavela waavaha amiravo miteko suulupale? (Nwehe elatarato yoopacerya.)

² Nyuwo amiravo, vano muhaana opaka soothanla seiyo sinrowa ohula mukhora wa iparakha sinceene mmuteko wa Yehova. Mwa ntakiheryo, Timootheyo oListra, woonasa wene aahipaka soothanla saamukhalihenrye wira ovahiwe muteko wa emisionaario, waaniheryasa vaavo aarina awe iyaakha 17 mpakha 19, wala iyaakha saavikana 20. (Mit.16:1-3) Waaniheryasa siira sivinre ene miyeeri vakhaani paahi, vaavo Paulo anvekenle awe mmiravo Timootheyo, wira aalipihe anna a muloko wa oTesalonika, weiwe Paulo ahaareere awe olupatthiwa, mpakha okhuma voohitthuna arowaka muttetthe mukina. (Mit. 17:5-15; 1 aTes. 3:1, 2, 6) Niireke munniwerya woona moota Timootheyo soonenle awe nuumala orummwa ni Paulo?

YOOTHANLA ANYU YOOTEPEXA OTTHUNEYA

3. Yoothanla xeeni yootepa otthuneya ekhanle anyu oopaka mookumini, nto liini vanireerela anyu opaka eyo?

³ Okathi wa omiravo, tukathi wooreerela opaka soothanla sootthuneya. Masi yoothanla ya omurumeela Yehova ti yootthuneya ovikana soothanla sikina. Nto liini vanireerela aya opaka yoothanla eyo? Yehova onihimya so: ‘Muhimuliyale . . .òpattunxeni, nlelo muri mmiravo’. (Mus. 12:1) Enamuna emosa yoreerela, ya ‘ohimuliyala’ Yehova, ori omurumeela owo ni murima ahu wotheene. (Otum. 10:12) Yoothanla anyu ya omurumeela Muluku ni murima anyu wotheene, teri yoothanla yootepexa otthuneya ovikana soothanla sikina. Maana tenrowa weettihaka okumi anyu wotheene muhoolo.​—Esal. 71:5.

4. Soothanla xeeni sootthuneya sikhanle oolipiha wala otteettheiha omurumeela wanyu Muluku?

⁴ Ekeekhai wira yoothanla anyu ya omurumeela Yehova, khahiyo tenirowa weettiherya okumi anyu paahi wa muhoolo. Mwa ntakiheryo, nyuwo pooti wiikohaka akhala wira vannireerela othela, mutthu ene oorowa othelana, ni moota woophwanya musurukhu wowiikhalihana. Tthiri itthu iyo ti sootthuneya, masi nyuwo munimwiira saana akhala wira wanipacerya munithanla omurumeela Yehova ni murima anyu wotheene, moovarihana ni ele eniwerya anyu. (Otum. 30:19, 20) Mwaha wa xeeni? Mwaha woowi soothanla iyo sinnivarihana ekina ni ekhwaaya. Yoothanla anyu voohimya sa othela, muteko woovara, enoowerya olipiha wala otteettheiha omurumeela wanyu Muluku. (Mulikanyihe ni Luka 14:16-20.) Mwa enamuna emosaru, othanla wanyu omurumeela Muluku onoowerya wookhaliheryani opaka soothanla sooreera voohimya sa othela ni muteko woovara. Tivonto muthanleke etthu yoopacerya otthuneya.​—aFil. 1:10.

MUNROWA OPAKA EXEENI NI OMIRAVO ANYU?

5, 6. Muhimye ntakiheryo nnooniherya wira opaka soothanla sooloka onnikumiherya iparakha soohakalaliha. (Nwehe mwaha oni: “Etthu yaathanlale aka kiryeene Mwaana”, erevista yeela.)

⁵ Nuumala othanla omurumeela Muluku, muhaana opaceryaka wuupuwela ele Muluku enoovekelaweni, nto nyuwo muhaana othanla enamuna yomurumeela owo. Mmiravo mmosa oJapão olempe so: “Okathi kaarina aka iyaakha 14, kaahirowa olaleerya ni mutokweene mmosa a muloko, yoowo oonale wira olaleerya khiwaakisivela. Mooreerela murima owo aahimmye so: ‘Yuichiro murooke owaani. Mwakilaathi vameesa ni muupuwele saana ele Yehova opanke awe wa nyuwo’, Nto eyo ti etthu yaapanke aka. Mwa mahiku manceene kaahivikaniha wuupuwelela ni ovekela. Vakhaani-vakhaani, muupuwelo aka woohiloka waahiturukeya. Moohipisa kaahoona wira omurumeela Yehova waanikisivela. Nto kanoona oreera osoma myaha saalavula mamisionaario, kipacerya wuupuwela omurumeela Yehova ni murima wotheene”.

⁶ Yuichiro onnivikaniha oriki: “Nto kaahipacerya opaka soothanla seiyo muhoolo, saarowa okiiriha omurumeela Yehova elapo ekina. Mwa ntakiheryo, kaahithanla omwiira kursu a nttaava na Enkelexi. Kimalihakaru osoma, kaahithanla ovara muteko woosomiha Enkelexi yoowo waakiphwanyiha okathi worumeela ntoko pioneero. Nuumala ophiyeriha iyaakha 20, kaahipacerya wiixutta nttaava na oMongolia ni kirowa oxukurya ekrupu ya anamalaleerya a nttaava na oMongolia. Nto nuuvira iyaakha piili 2007, kaahirowa oxukurya elapo ya oMongolia. Okathi kaarowaka olaleerya hoothe ni mapioneero kanaaweha atthu anceene yaaphavela wiixutta ekeekhai, nto kaahuupuwela orowa waakhaliherya atthu awo. Kaahitthikela oJapão wira khaitthokihe. Vano kinnirumeela oMongolia okhuma Abril 2008. Khivanikhweya okhala elapo ela. Masi atthu annaakhulela ihapari sooreera, nto miyo vannikisivela waakhaliherya atthu awo omwaattamela Yehova. Kinoona wira etthu ethanlale aka enamuna ya muteko wootepexa oreera mookumini mwaka”.

7. Soothanla xeeni sinitthuneya ahu opaka, nto ntakiheryo xeeni Moise nivanhe awe?

⁷ Khula mutthu ohaana opaka sothanla sawe sa moota sinrowa awe orumeela okumi awe ntoko Namoona a Yehova. Hiyo khanikhanle owoleelani etthu ekhanle anyu oopaka mmyaha sa othela, mutthu ene oothelana, wala enamuna ya muteko okhanle anyu oovara. Niireke munrowa othanla muteko ohinvekela okathi munceene mutthu omwiiraka kursu? Amiravo akina ari maKristau anikhala mittetthe soohaawiwa, akina anikhala isidade sowaatta atthu arina musurukhu. Olumwenku wotheene amiravo ari maKristau makhalelo aya toovirikana, niire so, osuwela waya, itthu siwiiranenle, itthu sinaasivela, ni waamini waya ti woovirikana. Woonasa wene ovirikana wanyusa, onilikana ni amiravo aHeberi yaakhala wEjiitu yaawo yaari oovirikana ni Moise. Orye ene mmiravo, Moise aahikhalana itthu sinci mwaha wookhala vatthokoni va Mwene, masi aHeeberi akina yaari ipottha. (Okhu. 1:13, 14; Mit. 7:21, 22) Ntoko siniireya aya ni nyuwo vano, awosa yaakhala okathi wiiraneya itthu sookuxa murima. (Okh. 19:4-6) Khula mutthu aahaana othanla etthu yakhanle awe oopaka orumeelaka okumi awe. Moise aahipaka yoothanla yooreera.​—Mmusome aHéberi 11:24-27.

8. Makhaliheryo xeeni akhanle wa amiravo yaale aniphavela opaka soothanla mookumini mwaya?

⁸ Yehova onnookhaliheryani opaka soothanla okathi wa omiravo anyu. Owo onniixuttiha orumeelaka malakiheryo a mBiibiliyani, yaawo aniwerya anyu ovarela muteko moovarihana ni makhalelo anyu. (Esal. 32:8) Ohiya vo, anamuyari anyu maKristau, ni axitokweene a mmulokoni anoowerya wookhaliheryani osuwela moota munrowa anyu orumeela malakiheryo awo. (Mir. 1:8, 9) Vano nrowe nithokorerye malakiheryo a Biibiliya maalupale mararu, yaawo anrowa wookhaliheryani opaka soothanla sa miruku ni ophwanya mireerelo muhoolo.

MALAKIHERYO MARARU A BIIBILIYA ANIWERYA WOOKHALIHERYANI

9. (a) Yehova oninttittimiha sai vaavo vannivaha awe otaphuwa woothanla itthu sinnisivela? (b) Opacerya ophavela Omwene onikumiherya eparakha xeeni?

⁹ Mpaceryeke ophavela Omwene wa Muluku ni wiwelela otthuna wawe. (Mmusome Matheyo 6:19-21, 24-26, 31-34.) Yehova onninttittimiha, tivonto onnivaha awe otaphuwa woothanla itthu siniphavela ahu. Owo khonihimya okathi ene okhanle anyu ooviriha mulaleeryaka ihapari sa Omwene. Masi Yesu oonivaha malakiheryo annikhaliherya opacerya ophavela Omwene. Enamuna enirumeela anyu ele Yesu yaahimmye awe, enoowiirihani wooniherya moota sinimphenta anyu Muluku, owoonela wanyu othunku anamwaattamanani anyu, ni ovaha wanyu efaita yoolipelela ya okumi woohimala. Okathi munuupuwela anyu othela wala ophwanya muteko, muhaana ovareryaka saana akhala wira yoothanla anyu enrowa wookumiheryani othanana mwaha wa itthu sa werutthuni wala wooniherya nthiti mmuteko wa Omwene wa Muluku, vamosa ni exariya awe.

10. Exeeni yaamwiiriha Yesu ohakalala, ni soothanla xeeni sinrowa woophwanyihani ohakalala?

¹⁰ Mwaakhaliheryeke akina wira mphwanye ohakalala. (Musome Miteko 20:20, 21, 24, 35.) Mooreerela murima Yesu, oonivaha malakiheryo awo ari ootthuneya mookumini. Yesu aari mutthu oohakalala saana, okhala wira khaapaka otthuna wawe masi aapaka otthuna wa Tiithi awe. Yesu aanihakalala vaavo aaweha awe atthu oomaala yaakhulelaka ihapari sooreera. (Luka 10:21; Yoh. 4:34) Pooti wira nyuwo mootoko woona ohakalala onikhumelela mwaha wa waakhaliherya atthu akina. Akhala wira soothanla sanyu sinrowa ovarihanaka ni ele Yesu aixuttinhe awe, moohaaniherya nyuwo munoophwanya ohakalala, ohiya-vo Yehova onrowa-tho ohakalala.​—Mir. 27:11.

11. Exeeni yaamwiirinhe Barukhi ohihakalala, nto miruku xeeni Yehova sanvanhe awe?

¹¹ Omurumeela Yehova ti etthu enikumiherya ohakalala wuulupale. (Mir. 16:20) Woonasa wene, Barukhi sekretaario a Yeremiya, aahiliyala mwaha owo. Maana ohaavo okathi mookumini mwawe, ahoona awe oreera omurumeela Yehova. Tivonto Yehova aahimmye so: ‘Nyuwo munniphavela itthu suulupale. Muhiphaveleke-tho itthu iyo. Maana kinimwaruhela ehasara atthu othene,  . . nto kinimopola ekumi anyu, ntoko etthu yoowaakhiwa, opuro othene onirowa anyu’. (Yer. 45:3, 5, NM.) Munoonela sai? Exeeni yaarowa omwiiriha Barukhi ohakalala? Niireke waavya itthu suulupale, wala okhala oororomeleya wa Muluku wira oopowe okathi woopwetexiwa Yerusalemu?​—Yak. 1:12.

12. Yoothanla xeeni yaamwiirinhe Ramiro ophwanya ohakalala?

¹² Munna mmosa yoowo ophwannye ohakalala mwaha wowaarumeela akina, ti Ramiro. Owo onihimya so: “Miyo kiyariwe emusi yoohaawa, yaakhala muttetthe mwaamukhaani, myaako sa Andes. Nto okathi yoole muulupale aka aivahenrenrye awe okiliverya wira kasome universidade, kaahoona okhala eparakha yuulupale. Masi kiira kibatiziwene niinano ntoko Namoona a Yehova, ni kaahivahiwa eparakha ekina, pioneero mmosa aahikilattula orowa olaleerya muttetthe mwaamukhaani aakhala awe. Kaahirowa muttetthe ole kiixutta moota woothikila maihi, nto kitthukula opuro wowaamettha atthu wira kiphwanyeke musurukhu woowiikhaliheryano. Vaavo vaivahererya ahu owiixuttiha atthu Biibiliya, atthu anceene yanaakhulela. Muhoolo mwaya kaahirowa muloko waatthukuliwe niinano, yoowo waarumeela nttaava na muttetthe yoole. Vano kinnirumeela mmuteko wa okathi wotheene, etthu yowiiraka iyaakha muloko. Khuuvo muteko mukina waarowa okiphwanyiha ohakalala, ovikana waakhaliherya atthu akina wiixutta ihapari sooreera arumeelaka nttaava naya nooyaraniwa”.

13. Xeeni omiravo oryaaya wooreerela omurumeela Yehova ni murima wotheene?

¹³ Muhakalaleke okathi onimurumeela anyu Yehova muryeene mmiravo. (Mmusome Musuweli 12:1.) Nyuwo amiravo muhooneke wira muhaana toko okhalana itthu sinci wira nto mmurumeeleke Yehova. Okathi wa omiravo anyu tori okathi woreerela opacerya omurumeelaka saana Yehova. Amiravo anceene kharina miritti sinci ntoko othokorerya emusi, ni aakhalana okumi wooloka ni ikuru siniwiiriha oweryaka orowa mittetthe sooxankiha. Etthu xeeni eniphavela anyu opaka wira munvarele muteko Yehova? Woonasawene yoolukama anyu ti orumeela ntoko pioneero. Pooti wira muniphavela orumeela muttetthe wa nttaava nikina. Aahiiso muhoona inamuna sikina soorumeela saana muloko oryaanyu vano. Hata vari siiso, muhaana okhalana muteko onrowa woophwanyihakani musurukhu wira muweryeke waakhwaniherya yoolukama anyu mmuteko wa Muluku. Nto muteko xeeni onirowa anyu othanla, okathi xeeni onitthuneya wira mwiixutte muteko owo? Nto munrowa othanla exeeni?

MURUMEELE MALAKIHERYO A BIIBILIYA WIRA MPAKE SOOTHANLA MWA MIRUKU

14. Ephoole xeeni mutthu onitthuneya awe okhalana okathi onimpaka awe palano a muteko wa muhoolo?

¹⁴ Malakiheryo mararu a Biibiliya athokorenrye ahu, anoowerya wookhaliheryani okathi woothanla muteko woovara. Ekeekhai wira mapurusoore anyu annisuwela itthu sinci voohimya sa muteko woovara mapuro anikhala anyu. Wala pooti wira atthu oGuvernu annisuwela muteko okhanle, opuro ene woovara, waaniheryasa opuro yoole oniphavela anyu orowa orumeela. Miruku sinivahiwa ni atthu awo, sinoowerya omukhaliherya mutthu, masi muhaana okhalana ephoole. Atthu yaale ahinimphenta Yehova, pooti owiirihani ophentaka itthu sa mulaponi vamurimani vanyu. (1 Yoh. 2:15-17) Okathi onaavya anyu muteko wa mulaponi, murima anyu pooti woowokani.​—Musome Miruku 14:15; Yer. 17:9.

15, 16. Ti pani okhanle owoovahani miruku sooloka voohimya sa muteko?

¹⁵ Nuumala osuwela makhalelo a muteko oniphavela anyu, nyuwo muhaana waavya miruku sooreerela. (Mir. 1:5) Nto ti pani okhanle owookhaliheryani ophwanya muteko wooreerela moovarihana ni malakiheryo a Biibiliya? Muhaana owiiwaka saana atthu animphenta Yehova, anoophentani, ni anisuwela saana makhalelo anyu. Awo animookhaliherya ovarerya saana wira musuwele ele eniwerya anyu, ni itthu siniphavela anyu. Woonasa wene etthu enrowa aya woona, enimookhaliheryani wuupuwela saana soolakela sanyu. Akhala wira anamuyari anyu annimphenta Yehova, awo anoowerya wookhaliheryani saana mmwaha owo. Ohiya-vo, axitokweene a muloko anyu, yaawo ari alopwana arina soophwanelela somunepani, anoowerya woovahani malakiheryo ookhalela. Wuncererya-vo, mulavule ni mapioneero ni mutokweene onixukurya muloko. Mwaakoheke so: Xeeni ahalaka othanla omurumeela Yehova mwa enamuna eyo? Yaawenrye sai opacerya orumeela ntoko pioneero, ni yaawenrye sai ophwanya muteko woowiikhaliherya? Ohakalala xeeni orina aya mwaha wa muteko oninvarela aya Muluku?​—Mir. 15:22.

¹⁶ Tthiri ale anoosuwelani saana, anoowerya woovahani miruku sookhalela. Mwa ntakiheryo, niire so, nyuwo mumphavela ohiya universidade ni opacerya opioneero mwaha wa woonaka ovila osoma universidade. Mutthu onoophentani, pooti woona etthu ene eniwiirihani ohiya osoma, ni wookhaliheryani woona wira ovikana mixankiho iyo sa oxikola, onoowiirihani ohaakuvela wooceela etthu, nto mukhalelo owo ti wootthuneya akhala wira muniphavela omurumeela Yehova.​—Esal. 141:5; Mir. 6:6-10.

17. Enamuna xeeni ya muteko enitthuneya ahu okhootta?

¹⁷ Khula mutthu onimurumeela Yehova, onrowa okumanana itthu siniwerya otteettheiha omurumeela wawe Yehova. (1 aKor. 15:33; aKol. 2:8) Masi inamuna sikina sa muteko, pooti okhala sowaakuva otteettheiha omunepani wahu, ovikana itthu sikina. Niireke aakhala mmuttettheni mwanyu atthu akina ‘ahononne wamini waya’ mwaha woothanla enamuna emosa ya muteko woohiloka? (1 Tim. 1:19) Tthiri etthu yamiruku ori okhootta othanla muteko onirowa otteettheiha wataana wanyu ni Yehova.​—Mir. 22:3.

MUHAKALALEKE MWAHA WOOKHALA MMIRAVO MUKRISTAU

18, 19. Etthu xeeni enitthuneya anyu opaka akhala wira khivanoosivelani omurumeela Yehova?

¹⁸ Akhala wira mookhalana vamurimani vanyu ophavela omurumeela Yehova, muttottele mureerelo iparakha sinikhumelela sa orumeela mwaha wookhala mmiravo oowaataana ni Muluku. Mpakeke soothanla sinrowa owiirihani omurumeela Yehova okathi ola oniireya itthu sookuxa murima.​—Esal. 148:12, 13.

¹⁹ Nto etthu xeeni enitthuneya anyu opaka akhala wira khivanoosivelani omurumeela Yehova? Mmananiheke olipiha waamini wanyu, nto muhooceye. Nuumala murummwa Paulo ohimya wiimananiha wawe okhalana mweettelo waarowa oreelihiwa ni Muluku, owo aalempe so: ‘Nto yakhalá antthokelela mota mukina Muluku onimwamwalela etthu pitthu enkhumelela, vavo vaphiyalyahu, nivikaniheke nettaka ephiro emosaru’. (aFil. 3:15, 16) Nvikaniheke ovaha efaita ophenta wa Muluku, ni miruku sawe sooloka. Yehova voohikhala mutthu mukina, onrowa wookhaliheryani opaka soothanla sooloka, okathi wa omiravo anyu.