Enamuna Yoowiiriha Weemya Ekeekhai Amusi Ahikhanle Anamoona

‘MUROKE owannyu, mwalèle amus’inyu sothene siwirenlyaweni Yehova, n’ikharari somorenlyaweni’. Waaniheryasa masu ala Yesu Kristu aalavunle oryeene oGatara, mpantta onikela nsuwa wa okuusini ephareya ya oGalileya, vaavo iira awe olavulaka ni mulopwana mmosa yoowo aaphavela okhala mutthareli awe. Masu a Yesu anooniherya wira owo aanisuwela wira okhala wene apinaatamu waasivela waleela amusi aya itthu sooreera ni sootthuneya.​—Mar. 5:19.

Olelo-va ninnoona-tho etthu emosaru, nnaamwi ilapo sikina eyo etepaka wiiraneya ovikana ilapo sikina. Tivonto okathi mutthu onikhala awe murumeyi a Yehova, Muluku eekeekhai, mutthu owo onniphavela waaleela amusi awe etthu yiixuntte awe niinaano. Masi orumeeleke enamuna xeeni? Onrowa owerya sai omwiiriha mmusi awe weemya ekeekhai, mmusi yoole orina etiini ekina, wala ohirina-tho etiini? Biibiliya onnivaha miruku sooloka ni sinivareleya muteko.

“NOMPHWANYA MESIYA”

Eseekulu yoopacerya, Andreya taapacenrye onweha Yesu khusuwela wira aari Mesiya. Nto nuumala onweha, aaronwe omuleela tipani? “Andreya ahipacerya orowa omphwanya Simoni, munn’ awe, khumuhimerya wira: ‘Nomphwanya Mesiya!’ (Mesiya onihimya wira “Kristu Mòpoli”)”. Vano Andreya aahimurowana Pedru wa Yesu, nuumala-vo Yesu aahinvaha Pedru eparakha ya okhala mwiixutti awe.​—Yoh. 1:35-42.

Nuuvira iyaakha sowiiraka 6, okathi Pedru aarya awe oYope, owo aahirummwa orowa oKesareya owannyawe Kornelio, muulupale aanakhotto. Nto ti pani Pedru aaphwannye awe athukumanne mpaani? Aayo ‘Kornelio, aanimulipelela [Pedru vamosa ni ale yeettana awe] nave aahiwiitthana amusi awe wira akhale vamosa ni apatthani awe’. Kornelio aahivaha eparakha emusi awe wira epacerye omwiiwa Pedru alavulaka, ni opaka soothanla moovarihana ni ele yaiwale aya.​—Mit. 10:22-33.

Etthu xeeni eniixutta ahu voohimya sa moota Andreya ni Kornelio saathokorenrye aya amusi aya?

Andreya ni Pedru khiyaahiyale wira itthu siireye mekhayaru. Andreya mwaneene aahimooniherya Pedru opuro waari Yesu, nto Kornelio aahipaka marehereryo wira emusi awe ewerye wiiwa ele Pedru yaarowa awe ohimya. Masi Andreya ni Kornelio khiyakhanyerenrye amusi aya wala khiyarumeelale olavilavi wira amusi aya akhale atthareli a Kristu. Niireke munniweha etthu eniixutta ahu-va? Nihaana opakaka etthu emosaru. Pooti wira hiyo ninniwerya olavula ni amusi ahu ni owiiriha okhalana eparakha ya wiiwa ekeekhai ya mBiibiyani ni wataana ni atthu akina oorormeleya. Hata vari siiso, nihaana ottittimiha otaphuwa orina aya wa opaka soothanla ni ohiwiiriha woona wira hiyo nnimwaakhanyererya. Wira nlikanyiherye moota wowaakhaliherya amusi, nrowe nithokorerye ntakiheryo na Jürgen ni Petra, anamathelana a wAlemanha.

Petra aahimusoma Biibiliya ni Anamoona a Yehova nto nuuvira okathi aahibatiziwa. Masi iyawe oniitthaniwa Jürgen aari mukhulupale aanakhotto. Wuupaceryani, Jürgen khaasiveliwe ni yoothanla yaapanke mwaarawe. Masi nuuvira okathi, ahoona wira ekeekhai Anamoona a Yehova yaalaleya aya yaakhuma mBiibiliyani. Tivonto owo ahaakhulela khivahererya wa Yehova, vano onirumeela ntoko mutokweene a mmulokoni. Miruku xeeni sinivahaawe voohimya sa owiixuttiha ekeekhai amusi arina etiini ekina?

Jürgen onihimya so: “Wiixuttiha wahu ohikhaleke wookhanyererya, ni wowaattiherya itthu voohimya sa Biibiliya. Okhala wira eyo yaarowa owiiriha atthu awo ovikaniha ovaanyiha. Mwa okathi munceene vannireera omwiixuttiha ekeekhai ntoko etthu enamulawihiwa vakhani-vakhani. Ti vooreera-tho owiiriha amusi ahu waasuwela anna arina iyaakha ni mikhalelo sinilikana ni mmusi ahu owo. Opaka eyo onnikhweiherya wiixutta ekeekhai.

Murummwa Pedru ni amusi a Kornelio naananoru yaheemya ekeekhai ya mBiibiliyani. Atthu akina yaakhala eseekulu yoopacerya, yaahiviriha okathi munceene ahinatthi waakhulela ekeekhai.

SAI VOOHIMYA SA ANNAWE YESU?

Amusi anceene a Yesu mowaakuveya yaahimwaamini Yesu okathi yoole aalaleya awe. Mwa ntakiheryo, vanikhala ntoko wira Yakobo ni Yohani yaari anna a Yesu erukulu ekina; nto maama aya itthaaniwa Salome, aari khuulu awe Yesu. Pooti wira Salome ti mmosa mwa ‘athiyana akina’ anceene yaamukhaliherya Yesu vamosa ni arummwa, arumeelaka mihakhu saya.​—Luka 8:1-3.

Amusi akina a Yesu khiyamwaaminni Yesu mowaakuveya. Mwa ntakiheryo, ekwaha emosa nuuvira eyaakha ntero Yesu abatiziwe, muttitthi muulupale waahithukumana vapuwani ophavelaka wiiwa ele Yesu aahimya awe. “Masi amusi awe Yesu, vaiwalyaya siso, yahimurowela wira emukuxe, mana yanihimya wira: ‘Orovahuwa’”. Okathi mukina muhoolo mwaya, okathi munna awe Yesu aamukonhe awe sa mukwaha aaphavela awe weetta, Yesu khaamwaakhunle mooluluwanya. Mwaha wa xeeni? Mwaha woowi ‘mmusi awe ole, khamwamini Yesu’.​—Mar. 3:21; Yoh. 7:5.

Etthu xeeni eniixutta ahu sa moota Yesu saathokorenrye awe amusi awe? Yesu khaananarinwe nuumala amusi akina ohimya wira owo aaroovahuwa. Nuumala wiiviwa nto khuhihimuxiwa Yesu aahivikaniha waalipiha amusi awe, owo aahipaka eyo, okhumelelaka wa munna awe iitthaniwa Yakobo. Vanikhala ntoko wira Yesu omukhumelela wawe Yakobo, waahimukhaliherya Yakobo ni aana awe okupali wira Yesu aari tthiri Mesiya. Ekeekhai, anna awe Yesu yaari ni arummwa vamosa ni atthu akina, esaala ya vasulu oYerusalemu; nto woonasa wene awo yahaakhela munepa wowaarya. Nuuvira okathi, Yakobo ni Yuda, yaari-tho annawe Yesu, yaahihakalala waakhela iparakha suulupale.​—Mit. 1:12-14; 2:1-4; 1 aKor. 15:7.

AMUSI AKINA ANITTHUNEYA OKATHI MUNCEENE

Ntoko siiraneya aya eseekulu yoopacerya, amusi anceene a mahiku ala anitthuneya ovileliwa okathi munceene wira arukunuxe muupuwelo aya. Mwa ntakiheryo, Roswitha, muthiyana ahaareere okhalela nthiti eKatoolika, iyawe omalakaru obatiziwa ntoko Namoona a Yehova eyaakha ya 1978. Okhala wira aakupalexa ekerexa awe paahi, wanipacerya Roswitha anavaanyiha aiyawe. Masi nuuvira iyaakha, ovaanyiha wawe waahivukuwa, nto khuweha wira Anamoona anniixuttiha ekeekhai. Tivonto 2003 owo aahibatiziwa. Etthu xeeni yaamukhalihenrye opaka marukunuxo awo? Iyawe khaananariwe ni ovaanyiha wa Roswitha, aanimureerela murima ophavelaka wira muhoolo mwaya orukunuxe muupuwelo awe. Nto muthiyana ola onivaha miruku xeeni? Owo onihimya so: “Okhala oopixa, opixa murima, tthiri opixa murima, onnimwiiriha mutthu woona etthu yooloka”.

Monika obatiziwe 1974, masi saahivira iyaakha muloko wira anaawe anli yeemye okhala Namoona. Ohiya vo, nnaamwi Hans, iyawe Monika, ahaatonko onyohola waamini wa mwaarawe, soovira iyaakha oheemyale, owo obatiziwe mwaakha wa 2006. Okhala wira emusi ela yaahikumanana etthu ntoko eyo, niireke sihaavo miruku sikhanle aya oonivaha? Eyo enihimya so: “Nvikanihe omuroromela Yehova, ni muheemererye waamini wanyu otthikelaka ottuli”. Masi, omananiha waya omooniherya Hans wira yanimphenta ti etthu yaamukhalihenrye. Emusi ele khiyaakhulumunwe yaanikupali wira nihiku nlo aamweemya ekeekhai.

WAARIIRIHA MURIMA NI MAASI EEKEEKHAI

Ekwaha emosa, Yesu aahimyale wira ekeekhai eri ntoko maasi anivaha okumi woohimala. (Yoh. 4:13, 14) Nto nimphavela wira amusi ahu awurye maasi ooriirya, maasi ooreera eekeekhai. Khinimphavela waatepiha woona oriirya mwaha wowiitthelela maasi manceene mowaakuveya. Tivonto sotheene sinlipa ni moota onaatthokiherya ahu amusi ekeekhai enisuwela ahu. Biibiliya onihimya wira: ‘Naxariya onimupuwela wira akhule’ nto ‘musuweli t’òpisa olavula onipajerya wupuwela tokó, molumo awe annitepa wemereriha’. Ninrowa orumeela sai miruku iya?​—Mir. 15:28; 16:23.

Niire muthiyana ootheliwa oniphavela omutthokiherya iyawe soowaamini sawe. Akhala wira onnuupuwela saana ohinatthi wakhulaka, onrowa oothanlela moolumo ooreera, ohiya waakuvela olavula. Ohikhaleke ntoko wira owo mekhawe paahi tonisuwela itthu sooloka, waavikana akina. Moolumo awe oolavuliwa saana, anoowerya oriiriha murima ni okumiherya murettele. Owo aikoheke so: okathi xeeni aiyaka anikhala aya oohakalala nto khiyaphavela ovaanela? Myaha xeeni sinimusivela olavula wala osoma? Kiireke myaha sa siensia ipoliitika wala axooku? Kinrowa owerya sai omooniherya sowiixuttiha sa Biibiliya, okathi omosaru kittittimihaka moonelo ni soophavela sawe? Wuupuwelela iponto iyo onoomukhaliherya muthiyana owo olavula ni opaka itthu mwa miruku.

Waatthokiherya sookupali sahu paahi khoniphiyerya wira niwiirihe amusi ahu ahikhanle Anamoona weemya ekeekhai. Masi onnihela-tho muhina mweettelo ahu wooloka.

OKHALANA MWEETTELO WOOLOKA

Jürgen yoowo ohimmwale wanipacerya, onitthokiherya so: “Muhihiye weettela malakiheryo a Muluku khuta nihiku. Etthu ekina enitepa okhaliherya ori omwiiriha mmusi ole oweha mwaneene, hata owo ohirowaka waakhulela mowaakuveya”. Hans yoole obatiziwe sivinreene iyaakha 30, nuumala mwaarawe obatiziwa onihimya so: “Ti vootthuneya muKristau okhalana mweettelo wooloka, wira mmusi ole ohikhanle namoona, ooneke ele enikhumelela mwaha woweettela ekeekhai”. Amusi ahu ahaana oweryaka woona wira waamini wahu onniniiriha okhala oovirikana mwa enamuna yooloka, ohiya enamuna yoohiloka.

Murummwa Pedru oovaha miruku sootthuneya wa muthiyana muKristau othelinwe ni mulopwana ohinaamini, owo ohimmye so: ‘Vano nyuwo athiyana, nwìweleleke aiy’anyu, siso yakhala wira aiy’anyu khanamini masu a Muluku, ephwanyihiweke wamini ni mwettelo anyu worera. Nyuwo khamumphavela olavula, okhala wira awo animona mwettelo anyu worera ni wottittimiheya. Orera wanyu ohikhaleké wa mwerutthuni, ntoko otthava ikharari n’uwara maniya àwero n’ikuwo sorerexa. Nto orera wanyu okhalé murim’anyu, orera iwo ohinòneya, masi ohimpweteya; okhalé orera wa murima womàla ni wa murettele. Orera weiwo ti wulupale va maithoni va Muluku’.​—1 Ped. 3:1-4.

Pedru aahilepa sa alopwana oothela yaarowa orukunuxa murima mwaha wa ntakiheryo nooloka na mwaaraya. Nuumala obatiziwa 1972, Krista aanimananiha orumeela yoolepa eyo wira orukunuxe murima wa iyawe. Nnaamwi iyawe okathi omosa aamusomme Biibiliya, nlelo ekeekhai khemukenle vamurimani. Onnirowa mithukumano sikina sa Anamoona a Yehova ni oolimaleliwa mmulokoni. Nave anna annittittimiha moonelo awe. Vano, Krista oneererya sai ovara murima awe?

Owo onihimya so: “Etthu elakenle aka ori ovarexexa ephiro Yehova okithanlenle awe otthara. Okathi omosaru kinoomananihaka ovara murima wa aiyaka voohirumeela masu, masi mweettelo aka wooloka. Akhala wira etthu enikivekela awe opaka khenivonyola malamulo a Biibiliya, kinnipaka etthu eyo enimusivela. Masi kihaana ottittimiha otaphuwa orina awe wa opaka soothanla, ni omuhiyerya mwaneene Yehova”.

Mweettelo wa Krista onooniherya otthuneya waya okhala ooreerela murima. Owo onnivikaniha okhala oolipa momunepani tivonto khonihiyererya orowa omithukumano, ni orowa olaleerya. Aayo owo oniphavela wooniherya okhala a miruku osuwelaka wira ole othelanne awe onniphwanela ophentiwa, oviriha okathi ni yena ni onvaha ephoole. Okhala a miruku ni oreerela murima ti mweettelo wa miruku wa khuta mutthu onikhala ni amusi ahinaamini. Biibiliya onihimya wira: “Khula etthu yokhalana emar’aya”. Eyo enihela muhina okathi oniviriha ahu nryeene ni amusi ahu, vootepexa ni ole othelanne ahu ohinaamini. Oviriha okathi mukhalaka vamosa onnikumiherya eparakha ya ovaanela. Itthu siiranen’ye sinooniherya wira, oleelihana saana onnivukula moonelo aya woohiloka woowi ari ekhaya, khanicaleliwa, vamosa ni ehace.​—Mus. 3:1

MUHIKHALA-KHALE MOOCEYAKA

Holger, obatiziwe nuuvira iyaakha 20 atthu a emusi awe ebatiziwe ene, onihimya so: “Ti vootthuneya wooniherya wira ninnimphenta mmusi ohinaamini ni wira ninnimulompela”. Krista onincererya ohimyaka wira: ‘khonooceya olipelela wira iya awe, muhoolo onrowa weemya omurumeela Yehova, asuwela ekeekhai’. Moonelo ahu voohimya sa mmusi ohinaamini ohaana okhalaka wooloka, orina nlipelelo.

Yoolukama ahu ori ovikaniha okhalihana saana, owiiriha amusi ahu okhalana eparakha ya osiveliwa ekeekhai ni weemya ihapari sa Biibiliya. Nto mwa itthu sotheene nihaana olavulaka ni ‘molumo òrera ni a nttittimiho’.​—1 Ped. 3:15.