MWAHA WOOPACERYA

Niireke Muhaana Ovekelaka?

Nyuwo pooti okoha so: ‘Akhala wira Muluku onnisuwela itthu sotheene, ohela muhina miyuupuwelo ni soophavela saka, xeeni kinitthuneya aka ovekela?’ Nlo nikoho nootthuneya. Tthiri Yesu aahihimya wira Muluku ‘onnisuwela simphavelanyu, nyuwo muhinatthi onvekela’. (Matheyo 6:8) Mwene Davidi a wIsarayeli a khalai, aanikupali eyo ni oolepa iiraka: “Miyo kihinatthi olavula, nyuwo Apwiya [Yehova], munnisuwela enrowaka ohimya”. (Esalimo 139:4) Nto xeeni vanitthuneya aya onvekela Muluku? Nrowe nithokorerye ele Biibiliya onihimya awe sa mavekelo yaapakiwa ni arumeyi a Muluku.a

OVEKELA ONNINAATTAMELIHA MULUKU

Nnaamwi Biibiliya ohimyaka wira Yehovab Muluku onnisuwela itthu sotheene, masi-tho onnooniherya wira Muluku khonipweha mmuupuweleloni mwawe khula etthu enipakiwa ni arumeyi awe. (Esalimo 139:6; aRoma 11:33) Muupuwelo awe ohinimala khonlikana ni komputadore yoowo onipweha myaha sinilempwa ni atthu. Tthiri, Muluku onniphavela vanci osuwela miyuupuwelo sahu mwaha woowi oniphavela wira nimwaattameleke. (Esalimo 139:23, 24; Yakobo 4:8) Ti maana aya Yesu aatumerenrye awe atthareli awe wira avekeleke, nnaamwi Tiithi awe osuwelaka saana sootthuneya sahu. (Matheyo 6:6-8) Onvekela Mpattuxa ahu moohihiyererya, onooniiriha omwaattamela.

Ikwaha sikina, pooti ohisuwela saana etthu yoovekela. Okathi owo, Muluku onoosuwela itthu saaphavela ahu oveka ni onoorumeela osuwela wawe woomalela wira onikhaliherye. (aRoma 8:26, 27; aÉfeso 3:20) Vaavo nnoona ahu wira Muluku oonikhaliherya hata mwa enamuna yoovila osuwela, nto eyo enooniiriha omwaattamela.

NIIREKE MULUKU ONNAAKHULA MAVEKELO OTHEENE?

Biibiliya onninlipiherya wira Muluku Oowerya Sotheene onaakhula mavekelo a arumeyi awe oororomeleya. Masi-tho onnihimya mathowa aya ohiniwiriyana awe mavekelo makina. Mwa ntakiheryo, okathi otakhala wuulanne aya wIsarayeli, Muluku aahimuruma profeta Yesaya waaleela atthu wira: “Mwathipelelaka okivekela, miyo nkinowiriyanani. Tthiri matat’anyu t’òsareya ephome”. (Yesaya 1:15) Nto, ale ahinimwiiwelela Muluku, wala anivekela ni muupuwelelo woohiloka, khanaakhuliwa mavekelo aya.​—Miruku 28:9; Yakobo 4:3.

Masi Biibiliya onnihimya wira: “Hiyo nosuwela wira Muluku onninìwa nanvekelaka etthu, nanvekelakaru sintthara otthuna wawe”. (1 Yohani 5:14) Niireke eyo ennitaphulela wira Muluku onimwaavaha arumeyi awe itthu sotheene aniveka aya? Nnaari. Muthokorerye yowiiraneya ya murummwa Paulo yoowo anvekenle Muluku ikwaha 3 wira omalihe “ohawa” wawe. (2 aKorinto 12:7, 8) Waaniheryasa maitho a Paulo yaarina eretta yahaavoniwa. Tthiri owo aanixankiheya vanci! Paulo aahivahiwa eparakha yowaapenuxa atthu ni waahihimuxa, masi owo aahaana ovilela eretta awe. (Miteko 19:11, 12; 20:9, 10) Hata mavekelo awe yahaakhuliwe mwa enamuna aaphavela awe, Paulo aaheemya mooxukhurela waakhula wa Muluku.​—2 aKorinto 12:9, 10.

Ekeekhai wira atthu akina aniromoliwa mBiibiliyani yahaakhuliwa mavekelo aya orweela wa miiriirya. (2 Mamwene 20:1-7) Masi Muluku khaarumeela enamuna eyo ikwaha sotheene. Arumeyi akina yaanixanka yoonaka wira Muluku khaakhula mavekelo aya. Mwene Davidi aahikoha so: “Muluku! Mpakha lini mukiliyalaka? Mpakha mahiku othene?” (Esalimo 13:2) Masi vaavo Davidi aasuwenle awe wira aanikhaliheriwa ni Yehova, aahilipiherya omuroromela Muluku. Nave-tho owo aahihimya wira: “Tthirí miyo kinniroromelexa okiphenta wanyu”. (Esalimo 13: 6) Ntoko Davidi, olelo-va arumeyi a Yehova ahaana ovilelaka vaavo anilipelela aya waakhuliwa mavekelo aya ni Muluku.​—aRoma 12:12.

MULUKU ONAAKHULA SAI MAVEKELO?

Muluku onninivaha sootthuneya sahu.

Mwa mathowa ooloka, anamuyari oophenta khanaavaha anaaya itthu sotheene okathi aniveka aya. Moolikanasa, Muluku pooti ohaakhula mavekelo ahu wa moota nnuupuwelela ahu wala okathi ninlipelela ahu. Masi, ntoko Tiithi oophenta, niroromeleke wira Mpattuxa ahu onoonivaha soophavela sahu mwa okathi ni enamuna yooreerela.​—Luka 11:11-13.

Muluku onnaakhula mwa inamuna sinvila osuwela.

Sai naavekelaka wira Muluku omalihe muxankiho ahu ohinimala? Niireke olelo-va Yehova khonaakhula-tho mavekelo mwaha woowi khonirumeela miiriirya? Nnaari. Hiyo nihaana wuupuwela moota Yehova onnikhaliherya awe mwa inamuna soovila osuwela. Mwa ntakiheryo, waaniheryasa mpatthani ahu pooti onikhaliherya mwa okathi wootthuneya. (Miruku 17:17) Woonasa wene Yehova tomurumenle mpatthani ahu owo wira onikhaliherye. Nave, Muluku onnaakhula mavekelo ahu omurumeelaka Biibiliya. Owo onoonivaha miruku wira nivilele muxankiho ahu.​—2 Timótheyo 3:16, 17.

Ohiya omaliha muxankiho, ikwaha sinci Muluku onnaavaha ikuru arumeyi awe wira avilele muxankiho owo. (2 aKorinto 4:7) Mwa ntakiheryo, vaavo Yesu anvekenle awe Tiithi awe wira omalihe muxankiho awe, oonaka wira waarowa oveehiha nsina na Muluku, Yehova aahiruma nlaikha wira namulipihe Mwanawe. (Luka 22:42, 43) Moolikanasa, Muluku pooti omurumeela mpatthani ahu wira onilipihe. (Miruku 12:25) Okhala wira nikhaliheryo nlo pooti okhumelela mwa enamuna enivila osuwela, hiyo nihaana owehaweha moota Muluku onaakhula awe mavekelo ahu.

Muluku onaakhula okathi onuupuwela awe okhala wooreerela.

Biibiliya onihimya wira Muluku Oowerya Sootheene, onaakhaliherya atthu oowiiyeviha “okathi othanlalyawe”. (1 Pedru 5:6) Nto, akhala wira nnoona opisa waakhuliwa wa mavekelo ahu, eyo khentaphulela wira Yehova khonnithokorerya. Okhala wira Mpattuxa ahu oophenta onnisuwela itthu sinci onivikana hiyo, owo onnaakhula mavekelo ahu moovarihana ni ele onoona awe oreerela wa hiyo.

Wira nlikanyihe: Nkuupuwelani wira mookhalana mwaana mwaamukhaani onoovekelani omuthuma bisikeleta. Niireke naananoru mwammuthumela? Akhala wira munuupuwela wira yena khoniwerya omweettiha bisikeleta, waaniheryasa mwaarowa omuthumela okathi mukina munoona anyu okhala wooreerela. Moolikanasa, Muluku onoonivaha itthu ‘sothene simphavela ahu’ okathi wooreerela akhala wira nnoovikaniha ovekela.​—Esalimo 37:4.

MUKUPALI WIRA YEHOVA ONNIWIIRIYANA MAVEKELO

Biibiliya onnaatumererya maKristau wira avaheke efaita mavekelo. Akina pooti ohimya so: ‘Eyo etthu yookhweya olavula ohiya opaka’. Ekeekhai wira pooti okhala vooxankiha olipelela waakhuliwa vaavo ninvilela ahu muxankiho ohinimala, wala okathi ninhaaxiwa ahu. Ti vooloka wuupuwelela ele Yesu aixuttinhe awe voohimya sa ovekela moohihiyererya.

Yesu aahivaha nlikanyiho na naamukhweli oohaawa aavikaninhe onvekela mulipa-oophuka milattu oohixariya wira ophuke mwaha awe. (Luka 18:1-3) Wanipacerya mphuki ole aahikhootta omukhaliherya, masi muhoolo mwaya aahuupuwela oriki: “Kinrowa omwirela exariya namukhweli ula, mana kharere okùkhula, wira ahitepé okinyonyiha mahiku othene”. (Luka 18:4, 5) Moovarihana ni nttaava na eGriki, mphuki ole aahimwiirela exariya naamukhweli ole oovaka “onyoholiwa ni atthu akina”.c Moone wira mphuki ole, aanoova onyoholiwa ni atthu akina, ni khumukhaliherya naamukhweli ole; eyo ennooniherya tthiri wira Muluku ahu oophenta onimwaakhaliherya ale “animukhuwelela othana n’uhiyu”. Yesu aahimmye wira Muluku “onowirela exariya nananoru”.​—Luka 18:6-8.

Waaniheryasa hiyo pooti oviriha okathi munceene nivekelaka nikhaliheryo, masi nihooceye. Vaavo ninvilela ahu nivekelaka, hiyo ninnooniherya ophavela wahu nikhaliheryo na Muluku mookumini mwahu. Nave-tho ninniixutta moota Muluku onaakhula awe mavekelo ahu, ni eyo enninikhaliherya omwaattamela yena. Tthiri, ninniroromela wira Yehova onimwaakhula mavekelo ahu ooreerela akhala wira nnoovikaniha ovekela ni nroromelo.​—Luka 11:9.

[Inoota]

[Eponto yuulupale epaaxina 4]

“Mmwattameleke Muluku: Muluku onowattamelani”.​—Yakobo 4:8

[Eponto yuulupale epaaxina 5]

“Hiyo nosuwela wira Muluku onninìwa nanvekelaka etthu, nanvekelakaru sintthara otthuna wawe”.​—1 Yohani 5:14

[Eponto yuulupale epaaxina 6]

“Tivó mwiyeviheke, mwivelelaka wa Muluku òweryexa, wira òvuwiheni okathi othanlalyawe”.​—1 Pedru 5:6

[Eponto yuulupale epaaxina 7]

“Nvekeleke: munovahiwa”.​—Luka 11:9