BIIBILIYA ONNIRUKUNUXA MIRIMA SA ATTHU

Awo yaanimurumeela Biibiliya wira yaakhule makoho aka otheene!

Yowiiraneya Elavuliwe ni: Isolina Lamela

MWAAKHA OYARIWE AWE: 1950

ELAPO OYARIWE AWE: WESPANYA

MWAHA ENE: AARI FRERA KATOOLIKA

MWEETTELO AKA WA KHALAI: Okathi kaayariwe aka, anamuyari aka yaahikhalana ematta yaamukhaani muttetthe wa oGalícia, mpantta onikhuma nsuwa wEspanya. Miyo kaari mwaana a neexexe wa anamwane 8. Emusi ahu yaari yoohakalala. Okathi ole, waahilema wEspanya anamwane oroihiwa osoma exikola ya etiini wala okhala enupa ya mafrera. Araru a hiyo naahitthara yoolema eyo.

Kirina ene iyaakha 13, kaahirowa okhala oMadri enupa ya mafrera weiwo aakhala awe muulupale aka. Opuro owo khiwaakhanle opatthani, yaari malamulo paahi, mavekelo, ni wiittottopa. Voosisu, hiyo naanirowa okerexa wira napake yoolema ya wuupuwelela, masi ikwaha sinci miyo nkuupuwela etthu. Nave-tho naaniipa isipo ni opaka Missa a ekerexa, nirumeelaka nttaava na Elatim. Khiivo etthu kiixutta aka, ni kuupuwela wira Muluku aari otteiwene wa miyo. Opuro ole khineemereriwa olavula vanci. Hata okathi kaakumana aka ni muulupale aka, naalavulihana paahi niiraka: “Ihaali Maria Oowaarya”. Mafrera yaaneemererya ovaanela minutu 30 nuumala olya. Eyo khiyiiraneya mweemusini mwaka okathi kaarowa aka oxukurya! Miyo kaaniriipiwa murima ni ikwaha sinceene kaaninla.

Nnaamwi kahuupuwela wira kaahimwaattamela Muluku, masi kirina ene iyaakha 17 kaahikhala frera. Miyo kaapanke etthu yaatumereriwe aka, masi kaaniikoha akhala wira Muluku aahikithanla ovara muteko ole. Mafrera yaahimya wira mutthu aarina muupuwelo owo, aarowa omooroni! Masi, nlelo kaanivikaniha waaniheryasa. Kaanisuwela wira Yesu Kristu aakhala ni atthu akina owiixuttihaka ni waakhaliherya. (Matheyo 4:23-25) Kirina ene iyaakha 20, miyo nkaasuwela nthowa naya kavikaniha aka okhala frera. Mootikiniha, frera aahoolela opuro ole, aahikihimeerya wira akhala wira nkaakupali itthu kaixuttihiwa aka, kaahaana okhuma opuro ole mowaakuveya. Waaniheryasa owo oona wira miyo kanwiiriha akina okhalana muupuwelo aka. Nto kaahikhuma enupa ya mafrera.

Nuumala otthikela owaani, anamuyari aka yaahikireerela murima. Nto, okhala wira waanithowa muteko, kaahithaamela wAlemanya weiwo aakhala awe murokoraka. Owo eetta ni egrupu ya maKomunista yaawo yaakhuma wEspanya. Kaahoona okhweya wuuraana ni atthu awo yaakiherya idiretu sa anamuteko ni ottittimihiwa wa athiyana. Miyo kaahikhala Komunista ni kaahitheliwa ni mulopwana a egrupu yeeyo. Kuupuwela wira kiira etthu yooloka, vaavo kaavahaka iliivuru sa eKomunista, ni wiirela mpantta ikampanya saya.

Masi, muhoolo mwaya kaahipacerya ohisiveliwa. Kaanoona wira ikwaha sinceene maKomunista khiyaapaka ele yaalaleya aya. Nto kaahitepa oxankiheya mwaakha wa 1971, vaavo amiravo akina a egrupu ahu yaapanhe aya embaixada ya wEspanya yaari oFrankfurt. Awo yaahipaka etthu eyo mwaha woohisiveliwa ni olamulelo wootakhala a wEspanya. Masi kaakupali wira eyo khahiyo yaari enamuna yooloka yowooniherya ohisiveliwa.

Nuumala omuyara mwanaka oopacerya, kahaaleela aiyaka wira kaamuhiya othukumana ni maKomunista. Kaahoona wira nkaakhaliheriwa maana khuuvo mpatthani aka aarwiiye okixukurya nuumala oyara. Nkaasuwela yoolakela ya okumi. Niireke vaanireerela wiimananiha olokiherya itthu sa molumwenkuni?

MOOTA BIIBILIYA ORUKUNUNXE AWE OKUMI AKA: Mwaakha wa 1976, Namoona mmosa ni mwaarawe yaari a wEspanya, yaahikixukurya ni akivaha iliivuru sa Biibiliya. Ekwaha ya nenli naavaanenle ahu, kaahipaka makoho manceene voohimya sa ohaawa, ovirikana wa makhalelo, ni ohixariya. Kaahitikinihiwa maana awo yaanimurumeela Biibiliya wira yaakhule makoho aka otheene! Nto kaaheemya yoosoma ya Biibiliya.

Wanipacerya, waakisivela wiixutta itthu sowiiraneya paahi. Masi muupuwelo aka waahiturukeya vaavo miyo ni aiyaka naapacenrye ahu orowa Empa ya Omwene ya Anamoona. Okathi owo, naarina anamwane anli. Mooreera murima, Anamoona yaaninikuxa mukaaroni mwaya ni onikhaliherya waakhapelela aniihu omuthukumanoni. Kaanisiveliwa ni moota Anamoona yaakithokorerya aya.

Masi, nlelo saahikhala itthu sa etiini kaahoverya aka. Nto Kaahirowa waaxukurya amusi aka wEspanya. Ataata, yaari muhooleli a etiini yaahimananiha okihiiha omusoma Biibiliya. Masi Anamoona a opuro ole, yaahikikhaliherya vanceene. Awo yaanakhula makoho aka amurumeelaka Biibiliya ntoko Anamoona a wAlemanya. Nuutthikela wAlemanya, kaahivikaniha omusoma Biibiliya. Masi aiyaka yaahihiya omusoma. Mwaakha wa 1978, kaahibatiziwa ntoko Namoona a Yehova.

MOOTA OTTOTTENLE AKA MUREERELO: Ekeekhai ya Biibiliya, yookiiriha osuwela yoolakela ya okumi ni okhalana mweettelo wooloka. Mwa ntakiheryo, 1 Pedru 3:1-4 onnaatumererya athiyana ootheliwa wira ‘awìweleleke axiyaya vorera ni vottittimiheya’ ni okhalana ‘murima womàla ni wa murettele yoowo ori wulupale vamaithoni va Muluku’. Malakiheryo awo aakikhaliherya okhala muthiyana ootheliwa ni maama ooloka.

Soovira iyaakha 35 kikhanle aka Namoona. Kinnihakalala omurumeela Muluku ntoko emusi yowiiraana yekeekhai ya olumwenku wotheene. Nave, mwa anamwane 5 kirina aka, 4 annimurumeela Yehova.