Ninrowa Omwaakhula Sai “Khula Mutthu”?

“Molumo anyu ekhaleke òrera, . . . musuwele omwakhula khula mutthu ntoko vanrerelaya”.​—AKOL. 4:6.

MWAAROWA WAAKHULA SAI?

Xeeni varyaaya vooloka ophavela osuwela moonelo aya ale anniwiriyana nipakaka makoho ookhalela?

Exeeni enirowa onikhaliherya otthokiherya oratteene ele Biibiliya enihimya awe?

Ninrowa orumeela sai malikanyiho ooloka okathi ninlaleerya ahu?

1, 2. (a) Muhimye yoowiiraneya emosa enooniherya oreera waya opaka makoho ookhalela. (Nwehe elatarato yoopacerya.) (b) Xeeni vahinireerela ahu woovaka othokorerya myaha soovila otthokiherya?

IYAAKHA sinceene sivinre, murokora mmosa aatthokiherya aiyawe yahaakhanle Namoona, masu a mBiibiliyani. Khalai mulopwana ole eetta ekerexa ya eKristau yoowootha. Ariki ovaanela mulopwana ole aahihimya wira aanikupali yowiixuttiha yoowi ahaavo aMuluku Araru. Mwaha woosuwela wira iyawe khaasuwela wira ele yaakupali awe yaari ethiru, mwa miruku owo aamukonhe so: “Kiireke munikupali wira ohaavo Muluku, ni wira Yesu ti Muluku, nave munepa wootteela ti Muluku-tho; ni wira khakhanle aMuluku araru, masi orivo Muluku mmosa paahi?” Moohipisa iyawe aahaakhula oriki: “Nnaari, khahiyo yeeyo enikupali aka!” Nto nuumala-vo yaahivaanela oratteene voohimya sa Muluku.

² Yowiiraneya eyo enooniherya oreera waya waarumeela ankhili wira mutthu opake makoho ookhalela. Nave-tho ennittittimiherya eponto emosa yuulupale: Hiyo nihooveke othokorerya myaha ntoko iye sa aMuluku Araru, omooroni, wala okhala wa Mpattuxa. Akhala wira ninnimuroromela Yehova ni soolakiherya sinnivaha awe, ikwaha sinceene nnooweryaka owaakhula mookuxa murima, mpakha oriiriha murima wa ale anniwiriyana. (aKol. 4:6) Vano nrowe nivarerye ele anamalaleerya anikhumela saana anipaka aya yaathokoreryaka myaha iyo. Ninrowa othokorerya moota (1) woopaka makoho wira nisuwele ele enuupuwela awe mutthu owo, (2) otthokiherya ele enihimya awe Biibiliya ni (3) orumeela malikanyiho animwiiriha mutthu owo wiiwexexa mwaha owo.

MPAKEKE MAKOHO WIRA MUSUWELE MOONELO WA MUTTHU OWO

3, 4. Xeeni varyaaya vootthuneya opaka makoho wira nisuwele ele mutthu enaamini awe? Nvahe ntakiheryo.

³ Makoho anooniiriha osuwela ele mutthu owo enikupali awe. Xeeni varya aya vootthuneya? Miruku 18:13 onihimya so: “Onakhula ahinatthi wiwa, muloló, onimùliwa muru vamaithoni v’atthu othene”. Tivonto, nihinatthi opacerya omuleela ele Biibiliya enihimya awe sa mwaha owo, nihaana omananiha osuwela ele mutthu owo enikupali awe. Naahiire siiso, nnoohonona okathi munceene nimananihaka waakhula mwaha ehikhanle yeele mutthu owo enikupali awe!—1 aKor. 9:26.

⁴ Niire nyuwo munilavula sa omooroni ni mutthu owo. Muhiliyale wira khahiyo atthu otheene anikupali wira nookhala tthiri nipuro nirina mooro ninriheliwa atthu wira ahaaxiwe. Anamunceene anikupali wira awo makhalelo a mutthu animwiiriha orakamelana ni Muluku voolakelela. Nto hiyo pooti ohimya so: “Okhala wira atthu aakhalana miyuupuwelelo soovirikana voohimya sa mwaha ola, kaaphavela wookohani, nyuwo munoonela sai?” Nuumala owiriyana waakhula wawe, nto hiyo nnoowerya omukhaliherya wiiwexexa ele Biibiliya enitthokiherya awe voohimya sa mwaha owo.

5. Moota xeeni makoho akhanle aya oonikhaliherya osuwela ele enimwiiriha mutthu okhalana moonelo orina awe?

⁵ Opaka makoho mooreerela murima onooniiriha osuwela ele enimwiiriha okupaliki etthu eyo. Mwa ntakiheryo, mwaarowa opaka exeeni mwamphwannye mutthu onihimya wira khonimwaamini Muluku? Ti vookhweya wuupuwela wira mutthu owo onitthara moonelo wa mulaponi wa othatuwa. (Esal. 10:4) Masi anamunceene, aahiya omwaamini Muluku mwaha wa masooso manceene yoonale aya yiireyaka wala yaakhumelenle. Nto mwaha wa masooso awo, vannaavila okupali okathi omosaru, wira ookhala Mpattuxa oophenta. Ti maana aya akhala wira nomphwanya mutthu ohinaamini wira Muluku ookhala, hiyo pooti omukoha so: “Okhala wene munuupuwela siiso?” Akhala wira mutthu owo onaakhula wira nnaari, nto pooti omukoha akhala wira ehaavo etthu enimwiiriha ohaamini wira Muluku ookhala. Etthu enirowa awe waakhula enoonikhaliherya woona enamuna yoomukhaliherya.—Musome Miruku 20:5.

6. Nuumala opaka nikoho niireke exeeni?

⁶ Nuumala okoha, nihaana owiriyana waakhula wawe ni ovaha efaita moonelo awe. Mwa ntakiheryo, mutthu owo pooti ohimya wira ehasara emukhumelenle tenimwiiriha ohikupali wira ookhala Mpattuxa oophenta. Nto muhinatthi omooniherya etthu enikupaliha wira Muluku ookhala, muhaana omoonela othunku ni omuleela wira khahiyo vootthekeya oxanka okathi onihaawa ahu. (Hab. 1:2, 3) Opixa wahu murima ni olavulana moophenta onoomwiiriha mutthu owo ophavela wiiwa.a

MUTTHOKIHERYE ELE ENIHIMMWA MBIIBILIYANI

7. Okhumela wahu saana naalaleeryaka onlipa ni exeeni?

⁷ Vano nrowe nithokorerye moota wootthokiherya ele Biibiliya enihimya awe. Biibiliya tori ekaruma ahu yuulupale, okathi woolaleerya. Owo tonnikhaliherya “ovara miteko sothene sorera”. (2 Tim. 3:16, 17) Okhumela wahu saana naalaleeryaka, khonlipa ni osoma soolepa sinceene, masi onilipa ni enamuna enitthokiherya ahu soolepa sinisoma ahu. (Musome Miteko 17:2, 3.) Mwa ntakiheryo, nrowe nithokorerye inamuna tthaaru.

8, 9. (a) Enamuna xeeni ekhanle ahu oomutthokiherya mutthu onihimya wira Yesu onoolikana ni Muluku? (b) Enamuna xeeni ekina ya otthokiherya mwaha ola yoonale anyu okhala yoovareleya muteko?

⁸ Enamuna yoopacerya: Naalaleeryaka, khumphwanya mutthu onikupali wira Yesu onoolikana ni Muluku. Yoolepa xeeni yaarowa ahu ovarihela muteko wira nitthokiherye mwaha ola? Hiyo pooti omulattula mutthu owo wira omusome Yohani 6:38, yeeyo enihimya wira Yesu aalavunle so: “Miyo nkikhurunwe wirimu wira kìreke otthuna waka, kikhuruwenlé wira kìreke otthuna wawe ole okirumme”. Nuumala othokorerya eversu eyo, hiyo pooti omukoha mutthu owo so: “Akhala wira Yesu ti Muluku nto aarummwale naani okhuruwa wiirimu? Nto ole aamurumme khahiyo muulupale onvikana Yesu? Okhala wene, ole oniruma ti muulupale onvikana ole onirummwa”.

⁹ Yoolepa ekina yoolikana ni ele esomme ahu, ti aFilipi 2:9, yoowo onihimya wira murummwa Paulo ootthokiherya wira Muluku aahimuhihimuxa Yesu mookhwaani. Eveersu eyo eniira so: “Muluku ònvuwiha vanjene [Yesu] khunvaha nsina novikana masina othene”. Wira nimukhaliherye mutthu owo wiiwexexa yoolepa eyo, nimukoheke so: “Vaakhanle wira Yesu aamulikana ni Muluku ohinatthi okhwa, muhoolo mwaya Muluku khunvaha nsina nuulupale ovikana masina otheene, nto eyo khiyaarowa omwiiriha Yesu okhala muulupale onvikana Muluku? Nto vaniweryaneya sai mutthu mukina okhala muulupale onvikana Muluku?” Akhala wira mutthu owo onnittittimiha Nuulumo na Muluku ni tooreerela murima, eyo enoomukhaliherya ophavela otokosa oratteene mwaha owo.​—Mit. 17:11.

10. (a) Ninrowa omukhaliherya sai mutthu onaamini ohukhummwa wa anatampi omooroni? (b) Enamuna xeeni ekina etonko anyu orumeela wira mutthokiherye mwaha wa omooroni?

¹⁰ Enamuna ya nenli: Omphwanya mutthu ootepexa waamini etiini awe, yoowo onoona ovila okupali wira atthu ootakhala khanrowa ohukhummwa omooroni voohimala. Waamini wawe wira atakhali anrowa oriheliwa mmooroni pooti okhalaka ele enitthuna murima awe owoona atakhali alivihiwaka mwaha wa sootakhala sipanke aya. Nto ninrowa omukhaliherya sai mutthu orina muupuwelo owo? Wanipacerya nihaana omulipiherya wira atakhali anrowa ohukhummwa tthiri. (2 aTes. 1:9) Nuumala-vo, nihaana osoma hoothe Maphattuwelo 2:16, 17, yoowo onooniherya wira okhwa toniliverya etampi. Hiyo pooti omutthokiherya-tho wira mwaha wa yoottheka ya Adamu, apinaatamu otheene ayariwe oottheka. (aRom. 5:12) Masi hiyo pooti omooniherya wira Muluku khonalavule wira aarowa waahukhumu atthu omooroni. Nuumala-vo nimukohe-tho so: “Yaakhanle wira Adamu ni Eva yaarowa ohukhummwa voohimala, khivaarowa okhala vooloka oleeliwa vahinatthi?” Nuumala-vo musomeke Maphattuwelo 3:19, yoowo onihimya sotheene saarowa aya wiirihiwa Adamu ni Eva yamutthekela Muluku, masi omooroni khiwaaromoliwe. Masi, Adamu aaleelinwe wira aarowa otthikela ontthupini. Nto nimukoheke so: “Niireke vaamukhalela omuleela Adamu wira aarowa otthikela vatthayani oriki aaroowa omooroni?” Akhala wira mutthu owo onniphavela wiixutta etthu, makoho awo anoomwiiriha wuupuwela saana mwaha ola.

11. (a) Enamuna xeeni enireerela omukhaliherya mutthu yoole onikupali wira atthu otheene ooreera murima anirowa wiirimu? (b) Enamuna xeeni ekina etonko anyu orumeela mmwaha wa orowa wiirimu yoonale anyu oreerela?

¹¹ Enamuna ya neeraru: Naalaleeryaka khumphwanya mutthu onikupali wira atthu otheene ooreera murima anrowa wiirimu. Yookupali eyo enoowerya ohapuwela moonelo wa mutthu owo sa moota sinimutthokiherya awe Biibiliya. Mwa ntakiheryo, niire nimphavela ovaanela ni yena sa Wisupulula 21:4 (Mmusome.) Nto mutthu owo khiyahimya wira mareeliho anihimmwa vale ta wiirimu. Munrowa omutthokiherya sai? Khivanitthuneya osoma yoolepa ekina, masi nihaana ottittimiherya itthu sikina sihimmwale va yoolepa ela. Yoolepa eyo enihimya wira “khunrowa okhala-tho okhwa”. Nto nimukoheke mutthu owo akhala wira onnaamini wira etthu enihimmwa wira khenirowa okhala-tho, enihimmwa etthu etonko okhala. Woonasa wene owo onrowa wira aayo. Nto nimuleeleke wira wiirimu khonakhumelele okhwa, valaponi paahi tonikhumelela okhwa. Tivonto, Wisupulula 21:4, onihimya mareeliho a muhoolo elapo yeela ya vathi.​—Esal. 37:29.

MURUMEELEKE MALIKANYIHO WIRA MWIIWANYEIHE ELE ENIHIMYA ANYU

12. Xeeni Yesu aarumeela awe malikanyiho aixuttihaka?

¹² Okathi Yesu aalaleerya awe, aanirumeela makoho vamosa ni malikanyiho. (Mmusome Matheyo 13:34, 35.) Malikanyiho Yesu aarumeela awe yaanimukhaliherya osuwela moonelo wa atthu ale yanwiriyana. (Math. 13:10-15) Malikanyiho yaahiiriha soowiixuttiha sa Yesu ovara murima ni ohiliyaliwa. Nto ninrowa orumeela sai malikanyiho okathi oniixuttiha ahu?

13. Nlikanyiho xeeni naarowa ahu orumeela wira nooniherye wira Muluku muulupale onvikana Yesu?

¹³ Malikanyiho ookhweya tari enamuna yooloka ya wiixuttiha. Mwa ntakiheryo, vaavo vanitthokiherya ahu wira Muluku muulupale onvikana Yesu, woonasa wene pooti weererya orumeela enamuna ela. Hiyo pooti ohimya wira Muluku ni Yesu annivarihela muteko moolumo anooniherya omusi orina aya. Muluku onnimuhimya Yesu okhala Mwanawe, ni Yesu onnimuhimya Muluku okhala Tiithi awe. (Luka 3:21, 22; Yoh. 14:28) Moottharelana, pooti omukoha so: “Mwaakhanle wira mwaaphavela okiixuttiha wira atthu anli anoolikana, mwaarowa orumeela nlikanyiho xeeni wira mooniherye okhala waya amusi atthu awo?” Mutthu owo aarowa waaromola anna anli wala maphapo. Ahimya siiso, naamoona wira oorumeela nlikanyiho nookhalela. Nto hiyo pooti omukoha so: “Vakhala wira nyuwo ni miyo nihiiwexexa saana nlikanyiho nlo, nto Yesu Mwiixuttihi Muulupale khaarowa wuupuwela nlikanyiho noolikana ni nlo? Masi owo aamuhimmye Muluku okhala Tiithi awe. Yesu aamuhimmye Muluku okhala owunnuwela ni a ikuru onvikana yena”.

14. Nlikanyiho xeeni ninnooniherya wira khivaarowa oreerela Muluku omuthanla Satana wira aahukhumeke atthu omooroni?

¹⁴ Thokoreryani ntakiheryo nikina. Atthu akina anihimya wira Satana tori “xeefi” a nlitti na mooro. Nlikanyiho nooloka pooti omukhaliherya mutthu orina anamwane wira khavaniweryaneya Muluku omuruma Satana muteko wa waahukhumu atthu mmooroni. Nto pooti olavula so: “Nkahaya muupuwele, nyuwo mwaarina mwaana oohiiwananeya ni onipaka itthu soohiloka. Mwaarowa opaka exeeni?” Woonasa wene namuyari owo onrowa ohimya wira owo onrowa omukhaliherya mwanawe. Owo pooti wira onrowa omananiha ikwaha sinceene omuttharuxa mwanawe itthu soohiloka. (Mir. 22:15) Okathi owo mmukohe so: sai akhala wira mwaana owo nlelo khoniwiiwelelani mwaarowa opaka exeeni wira mmukhaliherye. Anamuyari anceene yaarowa waakhula wira khiivo enamuna ekina voohikhala omuhukhumu mwaana owo. Vano nihaana omukoha so: “Sai akhala wira muhoona wira mutthu mukina ootakhala tompahunle mwaninyu?” Moohaaniherya, namuyari owo onrowa onanariwa ni mutthu owo. Wira niiwanyeihe oratteene nlikanyiho nla, nihaana omukoha namuyari owo so: “Nuumala osuwela wira mwaninyu owo oroopahuliwa ni mutakhali, nyuwo mwaamunvekela mutakhali owo wira omuhukhumu mwaninyu owo?” Nto waakhuliwa waya waarowa okhala nnaari. Nto, Muluku khaarowa omuthanla Satana wira aahukhumeke atthu ootakhala yaale yaapahunle awe!

MUKHALE OOPIXA MURIMA

15, 16. (a) Xeeni vahinireerela aya wuupuwelaka wira atthu otheene analaleerya ahu anrowa weemya ihapari sa Omwene? (b) Niireke hiyo nintthuneya okhala atthu oosomexa wira nisuweleke wiixuttiha? Mutthokiherye. (Nwehe ekaaxa eni: “Ekaruma Ennikhaliherya Waakhula Makoho”.)

¹⁵ Hiyo ninnisuwela wira khivaniweryaneya atthu otheene waakhulela ihapari sa Omwene. (Math. 10:11-14) Tthiri eyo enimwiiraneya hata nipakaka makoho ooloka, nitthokiheryaka saana, ni orumeela malikanyiho ooloka. Hata okathi wa Yesu, atthu vakhaani paahi tiyeemyale ele Yesu aaxuttiha awe, nnaamwi Yesu aari Mwiixuttihi muulupale aakhanle valaponi!​—Yoh. 6:66; 7:45-48.

¹⁶ Masi, hata noonaka wira khannisuwela itthu sinceene, vanniweryaneya okhumela saana nalaleeryaka. (Musome Miteko 4:13.) Nuulumo na Muluku, ti etthu ennikupaliha wira ‘othene ale. . . athanleliwe ekumi ehinimala’ anrowa weemererya ihapari sooreera. (Mit. 13:48) Nto hiyo nihaana okhala oopixa murima ni waaphavela atthu yaale anirowa owiriyana ihapari sa Omwene sinilaleya ahu. Nihaana ottottela mureerelo malakiheryo anivahiwa ahu ni Yehova, ni ororomela wira hiyo ni ale anniwiriyana, ninrowa woopowa. (1 Tim. 4:16) Aayo Yehova onoowerya onikhaliherya hiyo osuwela “omwakhula khuta mutthu”. Ntoko sinrowa ahu woona mwaha onittharelana, enamuna emosa yookhumela saana naalaleeryaka ori otthara Nlamulo na Waakhapelela atthu mooreerela.

[Enoota]

[Ekaaxa epaaxina 10]

Ekaruma Ennikhaliherya Waakhula Makoho

Malikanyiho manceene aromoliwe mwaha ola, akumihiwe myaha sa erevista ya Owehawehab ya atthu otheene myaha sini “Ovaanela Voohimya sa Biibiliya”.

Olavulaka sa moota myaha iya simukhalihenrya aya mmuteko wa olaleerya, murokora mmosa olempe so: “Myaha iya sinnikiixuttiha moota womwiiriha mutthu wiiwexexa saana, moota woopaka makoho ooreerela, ni moota wowaakhula saana”. Owo ahincererya-tho oriki: “Vannimukhweela wiixutta akhala wira onnooniheriwa moota woopaka etthu eyo, nto myaha iyo ti etthu enooniherya moota woolaleerya”.

Myaha iya siniirela mpantta malakiheryo oomunepani anivahiwa ahu ni Yehova wira naakhwaniherye saana muteko ahu. (Esal. 32:8) Nto nihaana oxukhurela yoovaha ela ennikhaliherya ovara saana muteko ahu woolaleerya!

[Enoota]